2.8.4

गम्भीराद् गम्भीरतरम् आर्यसुभूतिः प्रविशति देशयति भाषत इति

gambhīrād gambhīrataram āryasubhūtiḥ praviśati deśayati bhāṣata iti

2.8.5

अथ खल्वायुष्मान् सुभूतिर्बुद्धानुभावेन पुनर् अपि तेषामेव देवपुत्राणां चेतसैव चेतःपरिवितर्कमाज्ञाय तान् देवपुत्रानामन्त्रयते स्म तेन हि देवपुत्राः यः स्रोतआपत्तिफलं प्राप्तुकामः स्रोतआपत्तिफले स्थातुकामः स नेमां क्षान्तिम् अनागम्य पेयालम्

atha khalvāyuṣmān subhūtirbuddhānubhāvena punar api teṣāmeva devaputrāṇāṃ cetasaiva cetaḥparivitarkamājñāya tān devaputrānāmantrayate sma tena hi devaputrāḥ yaḥ srotaāpattiphalaṃ prāptukāmaḥ srotaāpattiphale sthātukāmaḥ sa nemāṃ kṣāntim anāgamya peyālam

2.8.6

यः सकृदागामिफलं प्राप्तुकामः सकृदागामिफले स्थातुकामः यो ऽनागामिफलं प्राप्तुकामो ऽनागामिफले स्थातुकामः यो ऽर्हत्त्वं प्राप्तुकामो ऽर्हत्त्वे स्थातुकामः यः प्रत्येकबोधिं प्राप्तुकामः प्रत्येकबोधौ स्थातुकामः स नेमां क्षान्तिम् अनागम्य

yaḥ sakṛdāgāmiphalaṃ prāptukāmaḥ sakṛdāgāmiphale sthātukāmaḥ yo 'nāgāmiphalaṃ prāptukāmo 'nāgāmiphale sthātukāmaḥ yo 'rhattvaṃ prāptukāmo 'rhattve sthātukāmaḥ yaḥ pratyekabodhiṃ prāptukāmaḥ pratyekabodhau sthātukāmaḥ sa nemāṃ kṣāntim anāgamya

2.8.7

यो ऽनुत्तरां सम्यक्संबोधिं प्राप्तुकामो ऽनुत्तरायां सम्यक्संबोधौ स्थातुकामः स नेमां क्षान्तिम् अनागम्य

yo 'nuttarāṃ samyaksaṃbodhiṃ prāptukāmo 'nuttarāyāṃ samyaksaṃbodhau sthātukāmaḥ sa nemāṃ kṣāntim anāgamya

2.9

अथ खलु पुनर् अपि तेषां देवपुत्राणामेतदभवत् किंरूपा अस्य आर्यसुभूतेर् धार्मश्रवणिका एष्टव्याः अथ खल्वायुष्मान् सुभूतिर्बुद्धानुभावेन तेषां देवपुत्राणां चेतसैव चेतःपरिवितर्कमाज्ञाय तान् देवपुत्रानामन्त्रयते स्म मायानिर्मितसदृशा हि देवपुत्रा मम धार्मश्रवणिका एष्टव्याः

atha khalu punar api teṣāṃ devaputrāṇāmetadabhavat kiṃrūpā asya āryasubhūter dhārmaśravaṇikā eṣṭavyāḥ atha khalvāyuṣmān subhūtirbuddhānubhāvena teṣāṃ devaputrāṇāṃ cetasaiva cetaḥparivitarkamājñāya tān devaputrānāmantrayate sma māyānirmitasadṛśā hi devaputrā mama dhārmaśravaṇikā eṣṭavyāḥ

2.9.2

तत्कस्य हेतोः तथा हि ते नैव श्रोष्यन्ति न च साक्षात्करिष्यन्ति

tatkasya hetoḥ tathā hi te naiva śroṣyanti na ca sākṣātkariṣyanti

2.10

अथ खलु ते देवपुत्रा आयुष्मन्तं सुभूतिमेतदवोचन् किं पुनरार्य सुभूते मायोपमास्ते सत्त्वा न ते माया एवमुक्ते आयुष्मान् सुभूतिस्तान् देवपुत्रानेतदवोचत् मायोपमास्ते देवपुत्राः सत्त्वाः

atha khalu te devaputrā āyuṣmantaṃ subhūtimetadavocan kiṃ punarārya subhūte māyopamāste sattvā na te māyā evamukte āyuṣmān subhūtistān devaputrānetadavocat māyopamāste devaputrāḥ sattvāḥ

2.10.2

स्वप्नोपमास्ते देवपुत्राः सत्त्वाः

svapnopamāste devaputrāḥ sattvāḥ

2.10.3

इति हि माया च सत्त्वाश् च अद्वयमेतद् अद्वैधीकारम् इति हि स्वप्नश् च सत्त्वाश् च अद्वयम् एतद् अद्वैधीकारम्

iti hi māyā ca sattvāś ca advayametad advaidhīkāram iti hi svapnaś ca sattvāś ca advayam etad advaidhīkāram

2.10.4

सर्वधर्मा अपि देवपुत्रा मायोपमाः स्वप्नोपमाः

sarvadharmā api devaputrā māyopamāḥ svapnopamāḥ

2.10.5

स्रोतआपन्नो ऽपि मायोपमः स्वप्नोपमः

srotaāpanno 'pi māyopamaḥ svapnopamaḥ

2.10.6

स्रोतआपत्तिफलम् अपि मायोपमं स्वप्नोपमम्

srotaāpattiphalam api māyopamaṃ svapnopamam

2.10.7

एवं सकृदागाम्य् अपि सकृदागामिफलमपि अनागाम्य् अपि अनागामिफलमपि अर्हन्न् अपि अर्हत्त्वम् अपि मायोपमं स्वप्नोपमम्

evaṃ sakṛdāgāmy api sakṛdāgāmiphalamapi anāgāmy api anāgāmiphalamapi arhann api arhattvam api māyopamaṃ svapnopamam

2.10.8

प्रत्येकबुद्धो ऽपि मायोपमः स्वप्नोपमः

pratyekabuddho 'pi māyopamaḥ svapnopamaḥ

2.10.9

प्रत्येकबुद्धत्वम् अपि मायोपमं स्वप्नोपमम्

pratyekabuddhatvam api māyopamaṃ svapnopamam

2.10.10

सम्यक्संबुद्धो ऽपि मायोपमः स्वप्नोपमः

samyaksaṃbuddho 'pi māyopamaḥ svapnopamaḥ

2.10.11

सम्यक्संबुद्धत्वम् अपि मायोपमं स्वप्नोपमम्

samyaksaṃbuddhatvam api māyopamaṃ svapnopamam

2.10.12

अथ खलु देवपुत्रा आयुष्मन्तं सुभूतिमेतदवोचन् सम्यक्संबुद्धो ऽप्यार्य सुभूते मायोपमः स्वप्नोपम इति वदसि सम्यक्संबुद्धत्वम् अपि मायोपमं स्वप्नोपममिति वदसि सुभूतिराह निर्वाणम् अपि देवपुत्रा मायोपमं स्वप्नोपममिति वदामि किं पुनरन्यं धर्मम्

atha khalu devaputrā āyuṣmantaṃ subhūtimetadavocan samyaksaṃbuddho 'pyārya subhūte māyopamaḥ svapnopama iti vadasi samyaksaṃbuddhatvam api māyopamaṃ svapnopamamiti vadasi subhūtirāha nirvāṇam api devaputrā māyopamaṃ svapnopamamiti vadāmi kiṃ punaranyaṃ dharmam

2.10.13

ते देवपुत्रा आहुः निर्वाणमप्यार्य सुभूते मायोपमं स्वप्नोपममिति वदसि आयुष्मान् सुभूतिराह तद्यदि देवपुत्रा निर्वाणादप्यन्यः कश्चिद्धर्मो विशिष्टतरः स्यात् तमप्यहं मायोपमं स्वप्नोपममिति वदेयम्

te devaputrā āhuḥ nirvāṇamapyārya subhūte māyopamaṃ svapnopamamiti vadasi āyuṣmān subhūtirāha tadyadi devaputrā nirvāṇādapyanyaḥ kaściddharmo viśiṣṭataraḥ syāt tamapyahaṃ māyopamaṃ svapnopamamiti vadeyam

2.10.14

इति हि देवपुत्रा माया च निर्वाणं च अद्वयम् एतद् अद्वैधीकारम्

iti hi devaputrā māyā ca nirvāṇaṃ ca advayam etad advaidhīkāram

Aṣṭasāhasrikā