1.38.7

सत्त्वाचिन्त्यतया आयुष्मन् शारिपुत्र मनसिकाराचिन्त्यता वेदितव्या

sattvācintyatayā āyuṣman śāriputra manasikārācintyatā veditavyā

1.38.8

सत्त्वानभिसंबोधनतया आयुष्मन् शारिपुत्र मनसिकारानभिसंबोधनता वेदितव्या

sattvānabhisaṃbodhanatayā āyuṣman śāriputra manasikārānabhisaṃbodhanatā veditavyā

1.38.9

सत्त्वायथाभूतार्थाभिसंबोधनतया आयुष्मन् शारिपुत्र मनसिकारायथाभूतार्थाभिसंबोधनता वेदितव्या

sattvāyathābhūtārthābhisaṃbodhanatayā āyuṣman śāriputra manasikārāyathābhūtārthābhisaṃbodhanatā veditavyā

1.38.10

अनेन आयुष्मन् शारिपुत्र एवंरूपेण मनसिकारेण इच्छामि बोधिसत्त्वं महासत्त्वं विहरन्तमनेन विहारेणेति

anena āyuṣman śāriputra evaṃrūpeṇa manasikāreṇa icchāmi bodhisattvaṃ mahāsattvaṃ viharantamanena vihāreṇeti

2.1

तेन खलु पुनः समयेन शक्रो देवानामिन्द्रस्तस्यामेव पर्षदि संनिपतितः संनिषण्णो ऽभूत् चत्वारिंशता त्रयस्त्रिंशत्कायिकैर् देवपुत्रसहस्रैः सार्धम्

tena khalu punaḥ samayena śakro devānāmindrastasyāmeva parṣadi saṃnipatitaḥ saṃniṣaṇṇo 'bhūt catvāriṃśatā trayastriṃśatkāyikair devaputrasahasraiḥ sārdham

2.1.2

चत्वारश् च लोकपाला विंशत्या चातुर्महाराजकायिकैर् देवपुत्रसहस्रैः

catvāraś ca lokapālā viṃśatyā cāturmahārājakāyikair devaputrasahasraiḥ

2.1.3

ब्रह्मापि सहापतिर्दशभिर् ब्रह्मकायिकैर् देवपुत्रसहस्रैः सार्धम्

brahmāpi sahāpatirdaśabhir brahmakāyikair devaputrasahasraiḥ sārdham

2.1.4

पञ्च च शुद्धावासानां देवपुत्राणां सहस्राणि तस्यामेव पर्षदि संनिपतितानि संनिषण्णान्यभूवन्

pañca ca śuddhāvāsānāṃ devaputrāṇāṃ sahasrāṇi tasyāmeva parṣadi saṃnipatitāni saṃniṣaṇṇānyabhūvan

2.1.5

यो ऽपि च देवानां स्वकर्मविपाकजो ऽवभासः सो ऽपि सर्वो बुद्धानुभावेन बुद्धतेजसा बुद्धाधिष्ठानेनाभिभूतो ऽभूत्

yo 'pi ca devānāṃ svakarmavipākajo 'vabhāsaḥ so 'pi sarvo buddhānubhāvena buddhatejasā buddhādhiṣṭhānenābhibhūto 'bhūt

2.2

अथ खलु शक्रो देवानामिन्द्र आयुष्मन्तं सुभूतिं स्थविरमेतदवोचत् इमान्यार्य सुभूते संबहुलानि देवपुत्रसहस्राणि अस्यां पर्षदि संनिपतितानि संनिषण्णानि आर्यस्य सुभूतेरन्तिकात्प्रज्ञापारमितां श्रोतुकामानि बोधिसत्त्वानां महासत्त्वानाम् उपदेशम् अववादानुशासनीं च

atha khalu śakro devānāmindra āyuṣmantaṃ subhūtiṃ sthavirametadavocat imānyārya subhūte saṃbahulāni devaputrasahasrāṇi asyāṃ parṣadi saṃnipatitāni saṃniṣaṇṇāni āryasya subhūterantikātprajñāpāramitāṃ śrotukāmāni bodhisattvānāṃ mahāsattvānām upadeśam avavādānuśāsanīṃ ca

2.2.2

तत्कथं बोधिसत्त्वेन महासत्त्वेन प्रज्ञापारमितायां स्थातव्यम् कथं शिक्षितव्यम् कथं योगमापत्तव्यम् स्थविरः सुभूतिराह तेन हि कौशिक उपदेक्ष्यामि ते बुद्धानुभावेन बुद्धतेजसा बुद्धाधिष्ठानेन

tatkathaṃ bodhisattvena mahāsattvena prajñāpāramitāyāṃ sthātavyam kathaṃ śikṣitavyam kathaṃ yogamāpattavyam sthaviraḥ subhūtirāha tena hi kauśika upadekṣyāmi te buddhānubhāvena buddhatejasā buddhādhiṣṭhānena

2.2.3

यैर्देवपुत्रैरनुत्तरायां सम्यक्संबोधौ चित्तं नोत्पादितम् तैरुत्पादयितव्यम्

yairdevaputrairanuttarāyāṃ samyaksaṃbodhau cittaṃ notpāditam tairutpādayitavyam

2.2.4

ये त्ववक्रान्ताः सम्यक्त्वनियामम् न ते भव्या अनुत्तरायां सम्यक्संबोधौ चित्तमुत्पादयितुम्

ye tvavakrāntāḥ samyaktvaniyāmam na te bhavyā anuttarāyāṃ samyaksaṃbodhau cittamutpādayitum

2.2.5

तत्कस्य हेतोः बद्धसीमानो हि ते संसारस्रोतसः

tatkasya hetoḥ baddhasīmāno hi te saṃsārasrotasaḥ

2.2.6

अभव्या हि ते पुनः पुनः संसरणाय अनुत्तरायां सम्यक्संबोधौ चित्तमुत्पादयितुम्

abhavyā hi te punaḥ punaḥ saṃsaraṇāya anuttarāyāṃ samyaksaṃbodhau cittamutpādayitum

2.2.7

अपि नु खलु पुनस्तेषामप्यनुमोदे

api nu khalu punasteṣāmapyanumode

2.2.8

सचेत्ते ऽप्यनुत्तरायां सम्यक्संबोधौ चित्तान्युत्पादयेरन् नाहं कुशलमूलस्यान्तरायं करोमि

sacette 'pyanuttarāyāṃ samyaksaṃbodhau cittānyutpādayeran nāhaṃ kuśalamūlasyāntarāyaṃ karomi

2.2.9

विशिष्टेभ्यो हि धर्मेभ्यो विशिष्टतमा धर्मा अध्यालम्बितव्याः

viśiṣṭebhyo hi dharmebhyo viśiṣṭatamā dharmā adhyālambitavyāḥ

2.3

अथ खलु भगवानायुष्मन्तं सुभूतिमामन्त्रयते स्म साधु साधु सुभूते साधु खलु पुनस्त्वं सुभूते यस्त्वं बोधिसत्त्वानां महासत्त्वानामुत्साहं ददासि

atha khalu bhagavānāyuṣmantaṃ subhūtimāmantrayate sma sādhu sādhu subhūte sādhu khalu punastvaṃ subhūte yastvaṃ bodhisattvānāṃ mahāsattvānāmutsāhaṃ dadāsi

2.3.2

एवमुक्ते आयुष्मान् सुभूतिर्भगवन्तमेतदवोचत् कृतज्ञैरस्माभिर्भगवन् भगवतो भवितव्यं नाकृतज्ञैः

evamukte āyuṣmān subhūtirbhagavantametadavocat kṛtajñairasmābhirbhagavan bhagavato bhavitavyaṃ nākṛtajñaiḥ

Aṣṭasāhasrikā