1.35.13

एवमेवायुष्मन् शारिपुत्र अत्यन्तं प्रतिभाति

evamevāyuṣman śāriputra atyantaṃ pratibhāti

1.36

एवमुक्ते आयुष्मान् शारिपुत्र आयुष्मन्तं सुभूतिमेतदवोचत् धार्मकथिकानामायुष्मान् सुभूतिरग्रतायां स्थापितव्यः

evamukte āyuṣmān śāriputra āyuṣmantaṃ subhūtimetadavocat dhārmakathikānāmāyuṣmān subhūtiragratāyāṃ sthāpitavyaḥ

1.36.2

तत्कस्य हेतोः तथा ह्यायुष्मान् सुभूतिः स्थविरो यतो यत एव परिप्रश्नीक्रियते ततस्तत एव निःसरति धर्मतायाश् च न चलति तां च धर्मतां न विरोधयति

tatkasya hetoḥ tathā hyāyuṣmān subhūtiḥ sthaviro yato yata eva paripraśnīkriyate tatastata eva niḥsarati dharmatāyāś ca na calati tāṃ ca dharmatāṃ na virodhayati

1.36.3

एवमुक्ते आयुष्मान् सुभूतिरायुष्मन्तं शारिपुत्रमेतदवोचत् धर्मतैषा आयुष्मन् शारिपुत्र भगवतः श्रावकाणाम् अनिश्रितधर्माणाम्

evamukte āyuṣmān subhūtirāyuṣmantaṃ śāriputrametadavocat dharmataiṣā āyuṣman śāriputra bhagavataḥ śrāvakāṇām aniśritadharmāṇām

1.36.4

ते यतो यत एव परिप्रश्नीक्रियन्ते ततस्तत एव निःसरन्ति धर्मतां च न विरोधयन्ति धर्मतायाश् च न व्यतिवर्तन्ते

te yato yata eva paripraśnīkriyante tatastata eva niḥsaranti dharmatāṃ ca na virodhayanti dharmatāyāś ca na vyativartante

1.36.5

तत्कस्य हेतोः यथापि नाम अनिश्रितत्वात् सर्वधर्माणाम्

tatkasya hetoḥ yathāpi nāma aniśritatvāt sarvadharmāṇām

1.36.6

एवमुक्ते आयुष्मान् शारिपुत्र आयुष्मन्तं सुभूतिमेतदवोचत् साधु साधु आयुष्मन् सुभूते

evamukte āyuṣmān śāriputra āyuṣmantaṃ subhūtimetadavocat sādhu sādhu āyuṣman subhūte

1.36.7

कतमैषा सर्वधर्मानिश्रितपारमिता बोधिसत्त्वानां महासत्त्वानाम् सुभूतिराह प्रज्ञापारमितैव आयुष्मन् शारिपुत्र सार्वयानिकी सर्वधर्मानिश्रिततया सर्वधर्मानिश्रितपारमिता च

katamaiṣā sarvadharmāniśritapāramitā bodhisattvānāṃ mahāsattvānām subhūtirāha prajñāpāramitaiva āyuṣman śāriputra sārvayānikī sarvadharmāniśritatayā sarvadharmāniśritapāramitā ca

1.36.8

इति हि यस्य बोधिसत्त्वस्य महासत्त्वस्य एवं गम्भीरायां प्रज्ञापारमितायां भाष्यमाणायामेवं देश्यमानायाम् एवम् उपदिश्यमानायां न भवति चित्तस्य अवलीनत्वम् न भवति काङ्क्षायितत्वम् न भवति धन्धायितत्वम् न भवति चित्तस्यान्यथात्वम् वेदितव्यम् अयं बोधिसत्त्वो महासत्त्वो विहरत्यनेन प्रज्ञापारमिताविहारेण अविरहितश्चानेन मनसिकारेणेति

iti hi yasya bodhisattvasya mahāsattvasya evaṃ gambhīrāyāṃ prajñāpāramitāyāṃ bhāṣyamāṇāyāmevaṃ deśyamānāyām evam upadiśyamānāyāṃ na bhavati cittasya avalīnatvam na bhavati kāṅkṣāyitatvam na bhavati dhandhāyitatvam na bhavati cittasyānyathātvam veditavyam ayaṃ bodhisattvo mahāsattvo viharatyanena prajñāpāramitāvihāreṇa avirahitaścānena manasikāreṇeti

1.37

अथ खल्वायुष्मान् शारिपुत्र आयुष्मतं सुभूतिमेतदवोचत् कथमायुष्मन् सुभूते अविरहितो बोधिसत्त्वो महासत्त्वो ऽविरहितो मनसिकारेण भवति यः प्रज्ञापारमिताविहारेण विहरति यदि ह्यायुष्मन् सुभूते बोधिसत्त्वो महासत्त्वो ऽविरहितो मनसिकारेण भवति एवं स विरहितः प्रज्ञापारमिताविहारेण भवति

atha khalvāyuṣmān śāriputra āyuṣmataṃ subhūtimetadavocat kathamāyuṣman subhūte avirahito bodhisattvo mahāsattvo 'virahito manasikāreṇa bhavati yaḥ prajñāpāramitāvihāreṇa viharati yadi hyāyuṣman subhūte bodhisattvo mahāsattvo 'virahito manasikāreṇa bhavati evaṃ sa virahitaḥ prajñāpāramitāvihāreṇa bhavati

1.37.2

यदि च आयुष्मन् सुभूते अविरहितो बोधिसत्त्वो महासत्त्वः प्रज्ञापारमिताविहारेण भवति एवं स विरहितो मनसिकारेण भवति

yadi ca āyuṣman subhūte avirahito bodhisattvo mahāsattvaḥ prajñāpāramitāvihāreṇa bhavati evaṃ sa virahito manasikāreṇa bhavati

1.37.3

यदि च आयुष्मन् सुभूते मनसिकारेणाविरहितो बोधिसत्त्वो महासत्त्वः अविरहित एव प्रज्ञापारमिताविहारेण भवति

yadi ca āyuṣman subhūte manasikāreṇāvirahito bodhisattvo mahāsattvaḥ avirahita eva prajñāpāramitāvihāreṇa bhavati

1.37.4

एवं सति सर्वसत्त्वा अप्यविरहिता भविष्यन्ति प्रज्ञापारमिताविहारेण

evaṃ sati sarvasattvā apyavirahitā bhaviṣyanti prajñāpāramitāvihāreṇa

1.37.5

तत्कस्य हेतोः सर्वसत्त्वा अपि ह्यविरहिता मनसिकारेण विहरन्ति

tatkasya hetoḥ sarvasattvā api hyavirahitā manasikāreṇa viharanti

1.38

एवमुक्ते आयुष्मान् सुभूतिरायुष्मन्तं शारिपुत्रमेतदवोचत् साधु साधु आयुष्मन् शारिपुत्र

evamukte āyuṣmān subhūtirāyuṣmantaṃ śāriputrametadavocat sādhu sādhu āyuṣman śāriputra

1.38.2

अपि तु उपालप्स्ये त्वा

api tu upālapsye tvā

1.38.3

अर्थ एव त्वायुष्मता शारिपुत्रेण भूतपदाभिधानेन परिगृहीतः

artha eva tvāyuṣmatā śāriputreṇa bhūtapadābhidhānena parigṛhītaḥ

1.38.4

तत्कस्य हेतोः सत्त्वास्वभावतया आयुष्मन् शारिपुत्र मनसिकारास्वभावता वेदितव्या

tatkasya hetoḥ sattvāsvabhāvatayā āyuṣman śāriputra manasikārāsvabhāvatā veditavyā

1.38.5

सत्त्वासद्भावतया आयुष्मन् शारिपुत्र मनसिकारासद्भावता वेदितव्या

sattvāsadbhāvatayā āyuṣman śāriputra manasikārāsadbhāvatā veditavyā

1.38.6

सत्त्वविविक्ततया आयुष्मन् शारिपुत्र मनसिकारविविक्तता वेदितव्या

sattvaviviktatayā āyuṣman śāriputra manasikāraviviktatā veditavyā

Aṣṭasāhasrikā