1.33.44

तत्कस्य हेतोः तथा हि यो रूपस्यानुत्पादो न तद्रूपम्

tatkasya hetoḥ tathā hi yo rūpasyānutpādo na tadrūpam

1.33.45

यो रूपस्याव्ययो न तद्रूपम्

yo rūpasyāvyayo na tadrūpam

1.33.46

इत्यनुत्पादश् च रूपं च अद्वयम् एतद् अद्वैधीकारम्

ityanutpādaś ca rūpaṃ ca advayam etad advaidhīkāram

1.33.47

इत्यव्ययश्च रूपं च अद्वयम् एतद् अद्वैधीकारम्

ityavyayaśca rūpaṃ ca advayam etad advaidhīkāram

1.33.48

यत्पुनरेतदुच्यते रूपमिति अद्वयस्यैषा गणना कृता

yatpunaretaducyate rūpamiti advayasyaiṣā gaṇanā kṛtā

1.33.49

एवं तथा हि यो वेदनायाः संज्ञायाः संस्काराणाम्

evaṃ tathā hi yo vedanāyāḥ saṃjñāyāḥ saṃskārāṇām

1.33.50

तथा हि यो विज्ञानस्यानुत्पादो न तद्विज्ञानम् यो विज्ञानस्याव्ययो न तद्विज्ञानम्

tathā hi yo vijñānasyānutpādo na tadvijñānam yo vijñānasyāvyayo na tadvijñānam

1.33.51

इत्यनुत्पादश् च विज्ञानं च अद्वयम् एतद् अद्वैधीकारम्

ityanutpādaś ca vijñānaṃ ca advayam etad advaidhīkāram

1.33.52

इत्यव्ययश् च विज्ञानं च अद्वयम् एतद् अद्वैधीकारम्

ityavyayaś ca vijñānaṃ ca advayam etad advaidhīkāram

1.33.53

यत्पुनरेतदुच्यते विज्ञानमिति अद्वयस्यैषा गणना कृता

yatpunaretaducyate vijñānamiti advayasyaiṣā gaṇanā kṛtā

1.34

अथ खल्वायुष्मान् शारिपुत्र आयुष्मन्तं सुभूतिमेतदवोचत् तेन हि यथाहमायुष्मतः सुभूतेर्भाषितस्यार्थमाजानामि तथा बोधिसत्त्वो ऽप्यनुत्पादः

atha khalvāyuṣmān śāriputra āyuṣmantaṃ subhūtimetadavocat tena hi yathāhamāyuṣmataḥ subhūterbhāṣitasyārthamājānāmi tathā bodhisattvo 'pyanutpādaḥ

1.34.2

यदि च आयुष्मन् सुभूते बोधिसत्त्वो ऽप्यनुत्पादः किं बोधिसत्त्वो दुष्करचारिकां चरति यानि वा तानि सत्त्वानां कृतशो दुःखान्युत्सहते प्रत्यनुभवितुम् एवमुक्ते आयुष्मान् सुभूतिरायुष्मन्तं शारिपुत्रमेतदवोचत् नाहमायुष्मन् शारिपुत्र इच्छामि बोधिसत्त्वं महासत्त्वं दुष्करचारिकां चरन्तम् नापि स बोधिसत्त्वो महासत्त्वो यो दुष्करसंज्ञया

yadi ca āyuṣman subhūte bodhisattvo 'pyanutpādaḥ kiṃ bodhisattvo duṣkaracārikāṃ carati yāni vā tāni sattvānāṃ kṛtaśo duḥkhānyutsahate pratyanubhavitum evamukte āyuṣmān subhūtirāyuṣmantaṃ śāriputrametadavocat nāhamāyuṣman śāriputra icchāmi bodhisattvaṃ mahāsattvaṃ duṣkaracārikāṃ carantam nāpi sa bodhisattvo mahāsattvo yo duṣkarasaṃjñayā

1.34.3

तत्कस्य हेतोः न हि आयुष्मन् शारिपुत्र दुष्करसंज्ञां जनयित्वा शक्यो ऽप्रमेयाणामसंख्येयानां सत्त्वानामर्थः कर्तुम्

tatkasya hetoḥ na hi āyuṣman śāriputra duṣkarasaṃjñāṃ janayitvā śakyo 'prameyāṇāmasaṃkhyeyānāṃ sattvānāmarthaḥ kartum

1.34.4

अपि तु सुखसंज्ञामेव कृत्वा

api tu sukhasaṃjñāmeva kṛtvā

1.34.5

सर्वसत्त्वानामन्तिके मातृसंज्ञां पितृसंज्ञां पुत्रसंज्ञां दुहितृसंज्ञां कृत्वा स्त्रीपुरुषेषु

sarvasattvānāmantike mātṛsaṃjñāṃ pitṛsaṃjñāṃ putrasaṃjñāṃ duhitṛsaṃjñāṃ kṛtvā strīpuruṣeṣu

1.34.6

एवमेताः संज्ञाः कृत्वा बोधिसत्त्वो महासत्त्वो बोधिसत्त्वचारिकां चरति

evametāḥ saṃjñāḥ kṛtvā bodhisattvo mahāsattvo bodhisattvacārikāṃ carati

1.34.7

तस्मान्मातृसंज्ञा पितृसंज्ञा पुत्रसंज्ञा दुहितृसंज्ञा बोधिसत्त्वेन महासत्त्वेन सर्वसत्त्वानामन्तिके यावदात्मसंज्ञा उत्पादयितव्या

tasmānmātṛsaṃjñā pitṛsaṃjñā putrasaṃjñā duhitṛsaṃjñā bodhisattvena mahāsattvena sarvasattvānāmantike yāvadātmasaṃjñā utpādayitavyā

1.34.8

यथा आत्मा सर्वेण सर्वं सर्वथा सर्वं सर्वदुःखेभ्यो मोचयितव्यः एवं सर्वसत्त्वाः सर्वेण सर्वं सर्वथा सर्वं सर्वदुःखेभ्यो मोचयितव्या इति

yathā ātmā sarveṇa sarvaṃ sarvathā sarvaṃ sarvaduḥkhebhyo mocayitavyaḥ evaṃ sarvasattvāḥ sarveṇa sarvaṃ sarvathā sarvaṃ sarvaduḥkhebhyo mocayitavyā iti

1.34.9

एवं च सर्वसत्त्वेषु संज्ञा उत्पादयितव्या मयैते सर्वसत्त्वा न परित्यक्तव्याः

evaṃ ca sarvasattveṣu saṃjñā utpādayitavyā mayaite sarvasattvā na parityaktavyāḥ

1.34.10

मयैते सर्वसत्त्वाः परिमोचयितव्या अपरिमाणतो दुःखस्कन्धात्

mayaite sarvasattvāḥ parimocayitavyā aparimāṇato duḥkhaskandhāt

Aṣṭasāhasrikā