1.33.4

अनुलोमत्वं सुभूते प्रज्ञापारमिताया महायानमुपदिशसि

anulomatvaṃ subhūte prajñāpāramitāyā mahāyānamupadiśasi

1.33.5

एवमुक्ते आयुष्मान् सुभूतिर्भगवन्तमेतदवोचत् बुद्धानुभावाद्भगवन्

evamukte āyuṣmān subhūtirbhagavantametadavocat buddhānubhāvādbhagavan

1.33.6

अपि नु खलु पुनर्भगवन् पूर्वान्ततो बोधिसत्त्वो नोपैति अपरान्ततो बोधिसत्त्वो नोपैति मध्यतो बोधिसत्त्वो नोपैति

api nu khalu punarbhagavan pūrvāntato bodhisattvo nopaiti aparāntato bodhisattvo nopaiti madhyato bodhisattvo nopaiti

1.33.7

तत्कस्य हेतोर्नोपैति रूपापर्यन्ततया हि बोधिसत्त्वापर्यन्तता वेदितव्या एवं वेदनासंज्ञासंस्काराः

tatkasya hetornopaiti rūpāparyantatayā hi bodhisattvāparyantatā veditavyā evaṃ vedanāsaṃjñāsaṃskārāḥ

1.33.8

विज्ञानापर्यन्ततया हि बोधिसत्त्वापर्यन्तता वेदितव्या

vijñānāparyantatayā hi bodhisattvāparyantatā veditavyā

1.33.9

रूपं बोधिसत्त्व इति नोपैति

rūpaṃ bodhisattva iti nopaiti

1.33.10

इदम् अपि न विद्यते नोपलभ्यते

idam api na vidyate nopalabhyate

1.33.11

एवं वेदनासंज्ञासंस्काराः

evaṃ vedanāsaṃjñāsaṃskārāḥ

1.33.12

विज्ञानं बोधिसत्त्व इति नोपैति इदम् अपि न विद्यते नोपलभ्यते

vijñānaṃ bodhisattva iti nopaiti idam api na vidyate nopalabhyate

1.33.13

एवं भगवन् सर्वेण सर्वं सर्वथा सर्वं बोधिसत्त्वधर्मम् अनुपलभमानो नाहं भगवन् तं धर्मं समनुपश्यामि यस्यैतन्नामधेयं यदुत बोधिसत्त्व इति

evaṃ bhagavan sarveṇa sarvaṃ sarvathā sarvaṃ bodhisattvadharmam anupalabhamāno nāhaṃ bhagavan taṃ dharmaṃ samanupaśyāmi yasyaitannāmadheyaṃ yaduta bodhisattva iti

1.33.14

प्रज्ञापारमिताम् अपि न समनुपश्यामि नोपलभे

prajñāpāramitām api na samanupaśyāmi nopalabhe

1.33.15

सर्वज्ञताम् अपि न समनुपश्यामि नोपलभे

sarvajñatām api na samanupaśyāmi nopalabhe

1.33.16

सो ऽहं भगवन् सर्वेण सर्वं सर्वथा सर्वं तं धर्मम् अनुपलभमानो ऽसमनुपश्यन् कतमं धर्मं कतमेन धर्मेण कतमस्मिन् धर्मे ऽववदिष्यामि अनुशासिष्यामि बुद्ध इति भगवन् नामधेयमात्रम् एतत्

so 'haṃ bhagavan sarveṇa sarvaṃ sarvathā sarvaṃ taṃ dharmam anupalabhamāno 'samanupaśyan katamaṃ dharmaṃ katamena dharmeṇa katamasmin dharme 'vavadiṣyāmi anuśāsiṣyāmi buddha iti bhagavan nāmadheyamātram etat

1.33.17

बोधिसत्त्व इति भगवन् नामधेयमात्रम् एतत्

bodhisattva iti bhagavan nāmadheyamātram etat

1.33.18

प्रज्ञापारमितेति भगवन् नामधेयमात्रम् एतत्

prajñāpāramiteti bhagavan nāmadheyamātram etat

1.33.19

तच्च नामधेयम् अनभिनिर्वृत्तम्

tacca nāmadheyam anabhinirvṛttam

1.33.20

यथा आत्मा आत्मेति च भगवन्नुच्यते अत्यन्ततया च भगवन्ननभिनिर्वृत्त आत्मा

yathā ātmā ātmeti ca bhagavannucyate atyantatayā ca bhagavannanabhinirvṛtta ātmā

1.33.21

एवमस्वभावानां सर्वधर्माणां कतमत्तद्रूपं यद् अग्राह्यम् अनभिनिर्वृत्तम् कतमे ते वेदनासंज्ञासंस्काराः कतमत्तद्विज्ञानं यद् अग्राह्यम् अनभिनिर्वृत्तम् एवमेतेषां सर्वधर्माणां या अस्वभावता सा अनभिनिर्वृत्तिः

evamasvabhāvānāṃ sarvadharmāṇāṃ katamattadrūpaṃ yad agrāhyam anabhinirvṛttam katame te vedanāsaṃjñāsaṃskārāḥ katamattadvijñānaṃ yad agrāhyam anabhinirvṛttam evameteṣāṃ sarvadharmāṇāṃ yā asvabhāvatā sā anabhinirvṛttiḥ

1.33.22

या च सर्वधर्माणाम् अनभिनिर्वृत्तिर्न ते धर्माः

yā ca sarvadharmāṇām anabhinirvṛttirna te dharmāḥ

1.33.23

तत् किम् अनभिनिर्वृत्तिम् अनभिनिर्वृत्त्यां प्रज्ञापारमितायामववदिष्याम्यनुशासिष्यामि न चान्यत्र भगवन् अनभिनिर्वृत्तितः सर्वधर्मा वा बुद्धधर्मा वा बोधिसत्त्वधर्मा वा उपलभ्यन्ते यो वा बोधाय चरेत्

tat kim anabhinirvṛttim anabhinirvṛttyāṃ prajñāpāramitāyāmavavadiṣyāmyanuśāsiṣyāmi na cānyatra bhagavan anabhinirvṛttitaḥ sarvadharmā vā buddhadharmā vā bodhisattvadharmā vā upalabhyante yo vā bodhāya caret

Aṣṭasāhasrikā