1.23.6

सुभूतिराह बोधिसत्त्वो महासत्त्व इति भगवन्नुच्यते

subhūtirāha bodhisattvo mahāsattva iti bhagavannucyate

1.23.7

यद् अपि तद्भगवन् बोधिचित्तं सर्वज्ञताचित्तमनास्रवं चित्तमसमं चित्तं असमसमं चित्तमसाधारणं सर्वश्रावकप्रत्येकबुद्धैः तत्रापि चित्ते असक्तो ऽपर्यापन्नः

yad api tadbhagavan bodhicittaṃ sarvajñatācittamanāsravaṃ cittamasamaṃ cittaṃ asamasamaṃ cittamasādhāraṇaṃ sarvaśrāvakapratyekabuddhaiḥ tatrāpi citte asakto 'paryāpannaḥ

1.23.8

तत्कस्य हेतोः तथा हि तत्सर्वज्ञताचित्तम् अनास्रवम् अपर्यापन्नं तत् यद् अपि तत्सर्वज्ञताचित्तम् अनास्रवम् अपर्यापन्नम्

tatkasya hetoḥ tathā hi tatsarvajñatācittam anāsravam aparyāpannaṃ tat yad api tatsarvajñatācittam anāsravam aparyāpannam

1.23.9

तत्रापि चित्ते असक्तो ऽपर्यापन्नः

tatrāpi citte asakto 'paryāpannaḥ

1.23.10

तेनार्थेन बोधिसत्त्वो महासत्त्व इति संख्यां गच्छति

tenārthena bodhisattvo mahāsattva iti saṃkhyāṃ gacchati

1.24

अथ खल्वायुष्मान् शारिपुत्र आयुष्मन्तं सुभूतिमेतदवोचत् केन कारणेन आयुष्मन् सुभूते तत्रापि चित्ते असक्तो ऽपर्यापन्नः सुभूतिराह अचित्तत्वादायुष्मन् शारिपुत्र तत्रापि चित्ते असक्तो ऽपर्यापन्नः

atha khalvāyuṣmān śāriputra āyuṣmantaṃ subhūtimetadavocat kena kāraṇena āyuṣman subhūte tatrāpi citte asakto 'paryāpannaḥ subhūtirāha acittatvādāyuṣman śāriputra tatrāpi citte asakto 'paryāpannaḥ

1.25

शारिपुत्र आह किं पुनरायुष्मन् सुभूते अस्ति तच्चित्तं यच्चित्तमचित्तम् सुभूतिराह किं पुनरायुष्मन् शारिपुत्र तत्र अचित्ततायामस्तिता वा नास्तिता वा विद्यते वा उपलभ्यते वा शारिपुत्र आह नो हीदमायुष्मन् सुभूते

śāriputra āha kiṃ punarāyuṣman subhūte asti taccittaṃ yaccittamacittam subhūtirāha kiṃ punarāyuṣman śāriputra tatra acittatāyāmastitā vā nāstitā vā vidyate vā upalabhyate vā śāriputra āha no hīdamāyuṣman subhūte

1.25.2

सुभूतिराह तद्यदि आयुष्मन् शारिपुत्र तत्र अचित्ततायामस्तिता वा नास्तिता वा न विद्यते वा नोपलभ्यते वा तत्कथम् आयुष्मान् शारिपुत्र एवमाह अस्ति तच्चित्तं यच्चित्तमचित्तमिति शारिपुत्र आह साधु साधु आयुष्मन् सुभूते

subhūtirāha tadyadi āyuṣman śāriputra tatra acittatāyāmastitā vā nāstitā vā na vidyate vā nopalabhyate vā tatkatham āyuṣmān śāriputra evamāha asti taccittaṃ yaccittamacittamiti śāriputra āha sādhu sādhu āyuṣman subhūte

1.25.3

यथापि नाम त्वं भगवता अरणाविहारिणामग्रतायां निर्दिष्टो निर्दिशसि

yathāpi nāma tvaṃ bhagavatā araṇāvihāriṇāmagratāyāṃ nirdiṣṭo nirdiśasi

1.26

अथ खल्वायुष्मान् पूर्णो मैत्रायणीपुत्रो भगवन्तमेतदवोचत् महासत्त्वो महासत्त्व इति यदिदं भगवन्नुच्यते महासंनाहसंनद्धः स सत्त्वः

atha khalvāyuṣmān pūrṇo maitrāyaṇīputro bhagavantametadavocat mahāsattvo mahāsattva iti yadidaṃ bhagavannucyate mahāsaṃnāhasaṃnaddhaḥ sa sattvaḥ

1.26.2

महायानसम्प्रस्थितो महायानसमारूढश् च स सत्त्वः

mahāyānasamprasthito mahāyānasamārūḍhaś ca sa sattvaḥ

1.26.3

तस्मात्स महासत्त्वो महासत्त्व इति संख्यां गच्छति

tasmātsa mahāsattvo mahāsattva iti saṃkhyāṃ gacchati

1.27

अथ खल्वायुष्मान् सुभूतिर्भगवन्तमेतदवोचत् महासंनाहसंनद्धो महायानसंनद्ध इति यदिदं भगवन्नुच्यते कियता भगवन् बोधिसत्त्वो महासत्त्वो महासंनाहसंनद्धो भवति भगवानाह इह सुभूते बोधिसत्त्वस्य महासत्त्वस्यैवं भवति अप्रमेया मया सत्त्वाः परिनिर्वापयितव्या इति

atha khalvāyuṣmān subhūtirbhagavantametadavocat mahāsaṃnāhasaṃnaddho mahāyānasaṃnaddha iti yadidaṃ bhagavannucyate kiyatā bhagavan bodhisattvo mahāsattvo mahāsaṃnāhasaṃnaddho bhavati bhagavānāha iha subhūte bodhisattvasya mahāsattvasyaivaṃ bhavati aprameyā mayā sattvāḥ parinirvāpayitavyā iti

1.27.2

असंख्येया मया सत्त्वाः परिनिर्वापयितव्या इति

asaṃkhyeyā mayā sattvāḥ parinirvāpayitavyā iti

1.27.3

न च ते सन्ति यैर्ये परिनिर्वापयितव्या इति

na ca te santi yairye parinirvāpayitavyā iti

1.27.4

स तांस्तावतः सत्त्वान् परिनिर्वापयति

sa tāṃstāvataḥ sattvān parinirvāpayati

1.27.5

न च स कश्चित्सत्त्वो यः परिनिर्वृतो येन च परिनिर्वापितो भवति

na ca sa kaścitsattvo yaḥ parinirvṛto yena ca parinirvāpito bhavati

1.27.6

तत्कस्य हेतोः धर्मतैषा सुभूते धर्माणां मायाधर्मतामुपादाय स्यात्

tatkasya hetoḥ dharmataiṣā subhūte dharmāṇāṃ māyādharmatāmupādāya syāt

1.27.7

यथापि नाम सुभूते दक्षो मायाकारो वा मायाकारान्तेवासी वा चतुर्महापथे महान्तं जनकायमभिनिर्मिमीते

yathāpi nāma subhūte dakṣo māyākāro vā māyākārāntevāsī vā caturmahāpathe mahāntaṃ janakāyamabhinirmimīte

1.27.8

अभिनिर्माय तस्यैव महतो जनकायस्यान्तर्धानं कुर्यात्

abhinirmāya tasyaiva mahato janakāyasyāntardhānaṃ kuryāt

Aṣṭasāhasrikā