1.21.9

मा भगवन् नवयानसम्प्रस्थिता बोधिसत्त्वा महासत्त्वा इमं निर्देशं श्रुत्वा उत्त्रसिषुः संत्रसिषुः संत्रासमापत्स्यन्ते

mā bhagavan navayānasamprasthitā bodhisattvā mahāsattvā imaṃ nirdeśaṃ śrutvā uttrasiṣuḥ saṃtrasiṣuḥ saṃtrāsamāpatsyante

1.21.10

भगवानाह यदि सुभूते नवयानसम्प्रस्थिता बोधिसत्त्वा महासत्त्वाः पापमित्रहस्तगता भविष्यन्ति उत्त्रसिष्यन्ति संत्रसिष्यन्ति संत्रासमापत्स्यन्ते

bhagavānāha yadi subhūte navayānasamprasthitā bodhisattvā mahāsattvāḥ pāpamitrahastagatā bhaviṣyanti uttrasiṣyanti saṃtrasiṣyanti saṃtrāsamāpatsyante

1.21.11

अथ चेत्सुभूते नवयानसम्प्रस्थिता बोधिसत्त्वा महासत्त्वाः कल्याणमित्रहस्तगता भविष्यन्ति नोत्त्रसिष्यन्ति न संत्रसिष्यन्ति न संत्रासमापत्स्यन्ते

atha cetsubhūte navayānasamprasthitā bodhisattvā mahāsattvāḥ kalyāṇamitrahastagatā bhaviṣyanti nottrasiṣyanti na saṃtrasiṣyanti na saṃtrāsamāpatsyante

1.22

एवमुक्ते आयुष्मान् सुभूतिर्भगवन्तमेतदवोचत् कानि पुनर्भगवन् बोधिसत्त्वस्य महासत्त्वस्य कल्याणमित्राणि वेदितव्यानि भगवानाह य एनं पारमितासु अववदन्ति अनुशासति

evamukte āyuṣmān subhūtirbhagavantametadavocat kāni punarbhagavan bodhisattvasya mahāsattvasya kalyāṇamitrāṇi veditavyāni bhagavānāha ya enaṃ pāramitāsu avavadanti anuśāsati

1.22.2

ये ऽस्मै मारकर्माण्युपदिशन्ति

ye 'smai mārakarmāṇyupadiśanti

1.22.3

एवं मारदोषा बोद्धव्याः इमे मारदोषाः

evaṃ māradoṣā boddhavyāḥ ime māradoṣāḥ

1.22.4

एवं मारकर्माणि बोद्धव्यानि इमानि मारकर्माणि

evaṃ mārakarmāṇi boddhavyāni imāni mārakarmāṇi

1.22.5

तानि त्वया बुद्ध्वा विवर्जयितव्यानीति

tāni tvayā buddhvā vivarjayitavyānīti

1.22.6

इमानि सुभूते बोधिसत्त्वस्य महासत्त्वस्य महासंनाहसंनद्धस्य महायानसम्प्रस्थितस्य महायानसमारूढस्य कल्याणमित्राणि वेदितव्यानि

imāni subhūte bodhisattvasya mahāsattvasya mahāsaṃnāhasaṃnaddhasya mahāyānasamprasthitasya mahāyānasamārūḍhasya kalyāṇamitrāṇi veditavyāni

1.22.7

एवमुक्ते आयुष्मान् सुभूतिर्भगवन्तमेतदवोचत् यद्भगवानेवमाह इमानि सुभूते बोधिसत्त्वस्य महासत्त्वस्य महासंनाहसंनद्धस्य महायानसम्प्रस्थितस्य महायानसमारूढस्य कल्याणमित्राणि वेदितव्यानीति

evamukte āyuṣmān subhūtirbhagavantametadavocat yadbhagavānevamāha imāni subhūte bodhisattvasya mahāsattvasya mahāsaṃnāhasaṃnaddhasya mahāyānasamprasthitasya mahāyānasamārūḍhasya kalyāṇamitrāṇi veditavyānīti

1.22.8

यच्च बोधिसत्त्वो महासत्त्व इति भगवन्नुच्यते तत्र बोधिसत्त्व इति भगवन् कः पदार्थ एवमुक्ते भगवानायुष्मन्तं सुभूतिमेतदवोचत् अपदार्थः सुभूते बोधिसत्त्वपदार्थः

yacca bodhisattvo mahāsattva iti bhagavannucyate tatra bodhisattva iti bhagavan kaḥ padārtha evamukte bhagavānāyuṣmantaṃ subhūtimetadavocat apadārthaḥ subhūte bodhisattvapadārthaḥ

1.22.9

तत्कस्य हेतोः सर्वधर्माणां हि सुभूते बोधिसत्त्वो महासत्त्वो ऽसक्ततायां शिक्षते

tatkasya hetoḥ sarvadharmāṇāṃ hi subhūte bodhisattvo mahāsattvo 'saktatāyāṃ śikṣate

1.22.10

सर्वधर्माणां हि सुभूते बोधिसत्त्वो महासत्त्वो ऽनुबोधनार्थेन असक्ततायामनुत्तरां सम्यक्संबोधिमभिसंबुध्यते

sarvadharmāṇāṃ hi subhūte bodhisattvo mahāsattvo 'nubodhanārthena asaktatāyāmanuttarāṃ samyaksaṃbodhimabhisaṃbudhyate

1.22.11

बोध्यर्थेन तु सुभूते बोधिसत्त्वो महासत्त्व इत्युच्यते

bodhyarthena tu subhūte bodhisattvo mahāsattva ityucyate

1.22.12

सुभूतिराह यत्पुनर्भगवानेवमाह बोधिसत्त्वो महासत्त्व इति केन कारणेन भगवन् बोधिसत्त्वो महासत्त्व इत्युच्यते भगवानाह महतः सत्त्वराशेर्महतः सत्त्वनिकायस्य अग्रतां कारयिष्यति तेनार्थेन बोधिसत्त्वो महासत्त्व इत्युच्यते

subhūtirāha yatpunarbhagavānevamāha bodhisattvo mahāsattva iti kena kāraṇena bhagavan bodhisattvo mahāsattva ityucyate bhagavānāha mahataḥ sattvarāśermahataḥ sattvanikāyasya agratāṃ kārayiṣyati tenārthena bodhisattvo mahāsattva ityucyate

1.23

अथ खल्वायुष्मान् शारिपुत्रो भगवन्तमेतदवोचत् ममापि भगवन् प्रतिभाति येनार्थेन बोधिसत्त्वो महासत्त्व इत्युच्यते

atha khalvāyuṣmān śāriputro bhagavantametadavocat mamāpi bhagavan pratibhāti yenārthena bodhisattvo mahāsattva ityucyate

1.23.2

भगवानाह प्रतिभातु ते शारिपुत्र यस्येदानीं कालं मन्यसे

bhagavānāha pratibhātu te śāriputra yasyedānīṃ kālaṃ manyase

1.23.3

आयुष्मान् शारिपुत्र आह महत्या आत्मदृष्ट्याः सत्त्वदृष्ट्याः जीवदृष्ट्याः पुद्गलदृष्ट्याः भवदृष्ट्याः विभवदृष्ट्याः उच्छेददृष्ट्याः शाश्वतदृष्ट्याः स्वकायदृष्ट्याः एतासामेवमाद्यानां दृष्टीनां प्रहाणाय धर्मं देशयिष्यतीति तेनार्थेन बोधिसत्त्वो महासत्त्व इत्युच्यते

āyuṣmān śāriputra āha mahatyā ātmadṛṣṭyāḥ sattvadṛṣṭyāḥ jīvadṛṣṭyāḥ pudgaladṛṣṭyāḥ bhavadṛṣṭyāḥ vibhavadṛṣṭyāḥ ucchedadṛṣṭyāḥ śāśvatadṛṣṭyāḥ svakāyadṛṣṭyāḥ etāsāmevamādyānāṃ dṛṣṭīnāṃ prahāṇāya dharmaṃ deśayiṣyatīti tenārthena bodhisattvo mahāsattva ityucyate

1.23.4

अथ खल्वायुष्मान् सुभूतिर्भगवन्तमेतदवोचत् ममापि भगवन् प्रतिभाति येनार्थेन बोधिसत्त्वो महासत्त्व इत्युच्यते

atha khalvāyuṣmān subhūtirbhagavantametadavocat mamāpi bhagavan pratibhāti yenārthena bodhisattvo mahāsattva ityucyate

1.23.5

भगवानाह प्रतिभातु ते सुभूते यस्येदानीं कालं मन्यसे

bhagavānāha pratibhātu te subhūte yasyedānīṃ kālaṃ manyase

Aṣṭasāhasrikā