2.2

अर्कन्यग्रोधखदिरकरञ्जककुभादिजम्

arkanyagrodhakhadirakarañjakakubhādijam

2.2.2

प्रातर् भुक्त्वा च मृद्वग्रं कषायकटुतिक्तकम्

prātar bhuktvā ca mṛdvagraṃ kaṣāyakaṭutiktakam

2.3

कनीन्यग्रसमस्थौल्यं प्रगुणं द्वादशाङ्गुलम्

kanīnyagrasamasthaulyaṃ praguṇaṃ dvādaśāṅgulam

2.3.2

भक्षयेद् दन्तपवनं दन्तमांसान्य् अबाधयन्

bhakṣayed dantapavanaṃ dantamāṃsāny abādhayan

2.4

नाद्याद् अजीर्णवमथुश्वासकासज्वरार्दिती

nādyād ajīrṇavamathuśvāsakāsajvarārditī

2.4.2

तृष्णास्यपाकहृन्नेत्रशिरःकर्णामयी च तत्

tṛṣṇāsyapākahṛnnetraśiraḥkarṇāmayī ca tat

2.5

सौवीरम् अञ्जनं नित्यं हितम् अक्ष्णोस् ततो भजेत्

sauvīram añjanaṃ nityaṃ hitam akṣṇos tato bhajet

2.5.2

चक्षुस् तेजोमयं तस्य विशेषाच्छ्लेष्मतो भयम्

cakṣus tejomayaṃ tasya viśeṣācchleṣmato bhayam

2.6

योजयेत् सप्तरात्रे ऽस्मात् स्रावणार्थं रसाञ्जनम्

yojayet saptarātre 'smāt srāvaṇārthaṃ rasāñjanam

2.6.2

ततो नावनगण्डूषधूमताम्बूलभाग् भवेत्

tato nāvanagaṇḍūṣadhūmatāmbūlabhāg bhavet

2.7

ताम्बूलं क्षतपित्तास्ररूक्षोत्कुपितचक्षुषाम्

tāmbūlaṃ kṣatapittāsrarūkṣotkupitacakṣuṣām

2.7.2

विषमूर्छामदार्तानाम् अपथ्यं शोषिणाम् अपि

viṣamūrchāmadārtānām apathyaṃ śoṣiṇām api

2.8

अभ्यङ्गम् आचरेन् नित्यं स जराश्रमवातहा

abhyaṅgam ācaren nityaṃ sa jarāśramavātahā

2.8.2

दृष्टिप्रसादपुष्ट्यायुःस्वप्नसुत्वक्त्वदार्ढ्यकृत्

dṛṣṭiprasādapuṣṭyāyuḥsvapnasutvaktvadārḍhyakṛt

2.9

शिरःश्रवणपादेषु तं विशेषेण शीलयेत्

śiraḥśravaṇapādeṣu taṃ viśeṣeṇa śīlayet

2.9.2

वर्ज्यो ऽभ्यङ्गः कफग्रस्तकृतसंशुद्ध्यजीर्णिभिः

varjyo 'bhyaṅgaḥ kaphagrastakṛtasaṃśuddhyajīrṇibhiḥ

2.10

लाघवं कर्मसामर्थ्यं दीप्तो ऽग्निर् मेदसः क्षयः

lāghavaṃ karmasāmarthyaṃ dīpto 'gnir medasaḥ kṣayaḥ

2.10.2

विभक्तघनगात्रत्वं व्यायामाद् उपजायते

vibhaktaghanagātratvaṃ vyāyāmād upajāyate

2.11

वातपित्तामयी बालो वृद्धो ऽजीर्णश् च तं त्यजेत्

vātapittāmayī bālo vṛddho 'jīrṇaś ca taṃ tyajet

2.11.2

अर्धशक्त्या निषेव्यस् तु बलिभिः स्निग्धभोजिभिः

ardhaśaktyā niṣevyas tu balibhiḥ snigdhabhojibhiḥ

Aṣṭāṅgahṛdayasaṃhitā