6.2

पुण्ड्रः पाण्डुः पुण्डरीकः प्रमोदो गौरसारिवौ

puṇḍraḥ pāṇḍuḥ puṇḍarīkaḥ pramodo gaurasārivau

6.2.2

काञ्चनो महिषः शूकः दूषकः कुसुमाण्डकः

kāñcano mahiṣaḥ śūkaḥ dūṣakaḥ kusumāṇḍakaḥ

6.3

लाङ्गला लोहवालाख्याः कर्दमाः शीतभीरुकाः

lāṅgalā lohavālākhyāḥ kardamāḥ śītabhīrukāḥ

6.3.2

पतङ्गास् तपनीयाश् च ये चान्ये शालयः शुभाः

pataṅgās tapanīyāś ca ye cānye śālayaḥ śubhāḥ

6.4

स्वादुपाकरसाः स्निग्धा वृष्या बद्धाल्पवर्चसः

svādupākarasāḥ snigdhā vṛṣyā baddhālpavarcasaḥ

6.4.2

कषायानुरसाः पथ्या लघवो मूत्रला हिमाः

kaṣāyānurasāḥ pathyā laghavo mūtralā himāḥ

6.5

शूकजेषु वरस् तत्र रक्तस् तृष्णात्रिदोषहा

śūkajeṣu varas tatra raktas tṛṣṇātridoṣahā

6.5.2

महांस् तम् अनु कलमस् तं चाप्य् अनु ततः परे

mahāṃs tam anu kalamas taṃ cāpy anu tataḥ pare

6.6

यवका हायनाः पांसुबाष्पनैषधकादयः

yavakā hāyanāḥ pāṃsubāṣpanaiṣadhakādayaḥ

6.6.2

स्वादूष्णा गुरवः स्निग्धाः पाके ऽम्लाः श्लेष्मपित्तलाः

svādūṣṇā guravaḥ snigdhāḥ pāke 'mlāḥ śleṣmapittalāḥ

6.7

सृष्टमूत्रपुरीषाश् च पूर्वं पूर्वं च निन्दिताः

sṛṣṭamūtrapurīṣāś ca pūrvaṃ pūrvaṃ ca ninditāḥ

6.7.2

स्निग्धो ग्राही लघुः स्वादुस् त्रिदोषघ्नः स्थिरो हिमः

snigdho grāhī laghuḥ svādus tridoṣaghnaḥ sthiro himaḥ

6.8

षष्टिको व्रीहिषु श्रेष्ठो गौरश् चासितगौरतः

ṣaṣṭiko vrīhiṣu śreṣṭho gauraś cāsitagaurataḥ

6.8.2

ततः क्रमान् महाव्रीहिकृष्णव्रीहिजतूमुखाः

tataḥ kramān mahāvrīhikṛṣṇavrīhijatūmukhāḥ

6.9

कुक्कुटाण्डकलावाख्यपारावतकशूकराः

kukkuṭāṇḍakalāvākhyapārāvatakaśūkarāḥ

6.9.2

वरकोद्दालकोज्ज्वालचीनशारददर्दुराः

varakoddālakojjvālacīnaśāradadardurāḥ

6.10

गन्धनाः कुरुविन्दाश् च गुणैर् अल्पान्तराः स्मृताः

gandhanāḥ kuruvindāś ca guṇair alpāntarāḥ smṛtāḥ

6.10.2

स्वादुर् अम्लविपाको ऽन्यो व्रीहिः पित्तकरो गुरुः

svādur amlavipāko 'nyo vrīhiḥ pittakaro guruḥ

6.11

बहुमूत्रपुरीषोष्मा त्रिदोषस् त्व् एव पाटलः

bahumūtrapurīṣoṣmā tridoṣas tv eva pāṭalaḥ

6.11.2

कङ्गुकोद्रवनीवारश्यामाकादि हिमं लघु

kaṅgukodravanīvāraśyāmākādi himaṃ laghu

Aṣṭāṅgahṛdayasaṃhitā