2.56

जीर्णतामविपर्यासात् सप्तरात्रं च लङ्घनात्

jīrṇatāmaviparyāsāt saptarātraṃ ca laṅghanāt

2.56.2

ज्वरः पञ्चविधः प्रोक्तो मलकालबलाबलात्

jvaraḥ pañcavidhaḥ prokto malakālabalābalāt

2.57

प्रायशः संनिपातेन भूयसा तूपदिश्यते

prāyaśaḥ saṃnipātena bhūyasā tūpadiśyate

2.57.2

संततः सततो ऽन्येद्युस् तृतीयकचतुर्थकौ

saṃtataḥ satato 'nyedyus tṛtīyakacaturthakau

2.58

धातुमूत्रशकृद्वाहिस्रोतसां व्यापिनो मलाः

dhātumūtraśakṛdvāhisrotasāṃ vyāpino malāḥ

2.58.2

तापयन्तस् तनुं सर्वां तुल्यदूष्यादिवर्धिताः

tāpayantas tanuṃ sarvāṃ tulyadūṣyādivardhitāḥ

2.59

बलिनो गुरवः स्तब्धा विशेषेण रसाश्रिताः

balino guravaḥ stabdhā viśeṣeṇa rasāśritāḥ

2.59.2

संततं निष्प्रतिद्वन्द्वा ज्वरं कुर्युः सुदुःसहम्

saṃtataṃ niṣpratidvandvā jvaraṃ kuryuḥ suduḥsaham

2.60

मलं ज्वरोष्मा धातून् वा स शीघ्रं क्षपयेत् ततः

malaṃ jvaroṣmā dhātūn vā sa śīghraṃ kṣapayet tataḥ

2.60.2

सर्वाकारं रसादीनां शुद्ध्याशुद्ध्यापि वा क्रमात्

sarvākāraṃ rasādīnāṃ śuddhyāśuddhyāpi vā kramāt

2.61

वातपित्तकफैः सप्त दश द्वादश वासरान्

vātapittakaphaiḥ sapta daśa dvādaśa vāsarān

2.61.2

प्रायो ऽनुयाति मर्यादां मोक्षाय च वधाय च

prāyo 'nuyāti maryādāṃ mokṣāya ca vadhāya ca

2.62

इत्यग्निवेशस्य मतं हारीतस्य पुनः स्मृतिः

ityagniveśasya mataṃ hārītasya punaḥ smṛtiḥ

2.62.2

द्विगुणा सप्तमी यावन् नवम्येकादशी तथा

dviguṇā saptamī yāvan navamyekādaśī tathā

2.63

एषा त्रिदोषमर्यादा मोक्षाय च वधाय च

eṣā tridoṣamaryādā mokṣāya ca vadhāya ca

2.63.2

शुद्ध्यशुद्धौ ज्वरः कालं दीर्घम् अप्यनुवर्तते

śuddhyaśuddhau jvaraḥ kālaṃ dīrgham apyanuvartate

2.64

कृशानां व्याधिमुक्तानां मिथ्याहारादिसेविनाम्

kṛśānāṃ vyādhimuktānāṃ mithyāhārādisevinām

2.64.2

अल्पो ऽपि दोषो दूष्यादेर् लब्ध्वान्यतमतो बलम्

alpo 'pi doṣo dūṣyāder labdhvānyatamato balam

2.65

सविपक्षो ज्वरं कुर्याद् विषमं क्षयवृद्धिभाक्

savipakṣo jvaraṃ kuryād viṣamaṃ kṣayavṛddhibhāk

2.65.2

दोषः प्रवर्तते तेषां स्वे काले ज्वरयन् बली

doṣaḥ pravartate teṣāṃ sve kāle jvarayan balī

Aṣṭāṅgahṛdayasaṃhitā