5.128.2

संशयप्राप्तम् आत्रेयो जीवितं तस्य मन्यते

saṃśayaprāptam ātreyo jīvitaṃ tasya manyate

5.129

कथयेन् न च पृष्टो ऽपि दुःश्रवं मरणं भिषक्

kathayen na ca pṛṣṭo 'pi duḥśravaṃ maraṇaṃ bhiṣak

5.129.2

गतासोर् बन्धुमित्राणां न चेच्छेत् तं चिकित्सितुम्

gatāsor bandhumitrāṇāṃ na cecchet taṃ cikitsitum

5.130

यमदूतपिशाचाद्यैर् यत् परासुरुपास्यते

yamadūtapiśācādyair yat parāsurupāsyate

5.130.2

घ्नद्भिरौषधवीर्याणि तस्मात् तं परिवर्जयेत्

ghnadbhirauṣadhavīryāṇi tasmāt taṃ parivarjayet

5.131

आयुर्वेदफलं कृत्स्नं यद् आयुर्ज्ञे प्रतिष्ठितम्

āyurvedaphalaṃ kṛtsnaṃ yad āyurjñe pratiṣṭhitam

5.131.2

रिष्टज्ञानादृतस् तस्मात् सर्वदैव भवेद् भिषक्

riṣṭajñānādṛtas tasmāt sarvadaiva bhaved bhiṣak

5.132

मरणं प्राणिनां दृष्टम् आयुःपुण्योभयक्षयात्

maraṇaṃ prāṇināṃ dṛṣṭam āyuḥpuṇyobhayakṣayāt

5.132.2

तयोरप्यक्षयाद् दृष्टं विषमापरिहारिणाम्

tayorapyakṣayād dṛṣṭaṃ viṣamāparihāriṇām

6.1

अथातो दूतादिविज्ञानीयं शारीरं व्याख्यास्यामः

athāto dūtādivijñānīyaṃ śārīraṃ vyākhyāsyāmaḥ

6.1.2

इति ह स्माहुर् आत्रेयादयो महर्षयः

iti ha smāhur ātreyādayo maharṣayaḥ

6.1.3

पाषण्डाश्रमवर्णानां सवर्णाः कर्मसिद्धये

pāṣaṇḍāśramavarṇānāṃ savarṇāḥ karmasiddhaye

6.1.4

त एव विपरीताः स्युर् दूताः कर्मविपत्तये

ta eva viparītāḥ syur dūtāḥ karmavipattaye

6.2

दीनं भीतं द्रुतं त्रस्तं रूक्षामङ्गलवादिनम्

dīnaṃ bhītaṃ drutaṃ trastaṃ rūkṣāmaṅgalavādinam

6.2.2

शस्त्रिणं दण्डिनं षण्ढं मुण्डश्मश्रुजटाधरम्

śastriṇaṃ daṇḍinaṃ ṣaṇḍhaṃ muṇḍaśmaśrujaṭādharam

6.3

अमङ्गलाह्वयं क्रूरकर्माणं मलिनं स्त्रियम्

amaṅgalāhvayaṃ krūrakarmāṇaṃ malinaṃ striyam

6.3.2

अनेकं व्याधितं व्यङ्गं रक्तमाल्यानुलेपनम्

anekaṃ vyādhitaṃ vyaṅgaṃ raktamālyānulepanam

6.4

तैलपङ्काङ्कितं जीर्णविवर्णार्द्रैकवाससम्

tailapaṅkāṅkitaṃ jīrṇavivarṇārdraikavāsasam

6.4.2

खरोष्ट्रमहिषारूढं काष्ठलोष्टादिमर्दिनम्

kharoṣṭramahiṣārūḍhaṃ kāṣṭhaloṣṭādimardinam

6.5

नानुगच्छेद् भिषग् दूतम् आह्वयन्तं च दूरतः

nānugacched bhiṣag dūtam āhvayantaṃ ca dūrataḥ

Aṣṭāṅgahṛdayasaṃhitā