4.32.2

देशकालात्मविज्ञानं सद्वृत्तस्यानुवर्तनम्

deśakālātmavijñānaṃ sadvṛttasyānuvartanam

4.33

अथर्वविहिता शान्तिः प्रतिकूलग्रहार्चनम्

atharvavihitā śāntiḥ pratikūlagrahārcanam

4.33.2

भूताद्यस्पर्शनोपायो निर्दिष्टश् च पृथक् पृथक्

bhūtādyasparśanopāyo nirdiṣṭaś ca pṛthak pṛthak

4.34

अनुत्पत्त्यै समासेन विधिर् एष प्रदर्शितः

anutpattyai samāsena vidhir eṣa pradarśitaḥ

4.34.2

निजागन्तुविकाराणाम् उत्पन्नानां च शान्तये

nijāgantuvikārāṇām utpannānāṃ ca śāntaye

4.35

शीतोद्भवं दोषचयं वसन्ते विशोधयन् ग्रीष्मजम् अभ्रकाले

śītodbhavaṃ doṣacayaṃ vasante viśodhayan grīṣmajam abhrakāle

4.35.2

घनात्यये वार्षिकम् आशु सम्यक् प्राप्नोति रोगान् ऋतुजान् न जातु

ghanātyaye vārṣikam āśu samyak prāpnoti rogān ṛtujān na jātu

4.36

नित्यं हिताहारविहारसेवी समीक्ष्यकारी विषयेष्व् असक्तः

nityaṃ hitāhāravihārasevī samīkṣyakārī viṣayeṣv asaktaḥ

4.36.2

दाता समः सत्यपरः क्षमावान् आप्तोपसेवी च भवत्य् अरोगः

dātā samaḥ satyaparaḥ kṣamāvān āptopasevī ca bhavaty arogaḥ

5.1

अथातो द्रवद्रव्यविज्ञानीयम् अध्यायं व्याख्यास्यामः

athāto dravadravyavijñānīyam adhyāyaṃ vyākhyāsyāmaḥ

5.1.2

इति ह स्माहुर् आत्रेयादयो महर्षयः

iti ha smāhur ātreyādayo maharṣayaḥ

5.1.3

जीवनं तर्पणं हृद्यं ह्लादि बुद्धिप्रबोधनम्

jīvanaṃ tarpaṇaṃ hṛdyaṃ hlādi buddhiprabodhanam

5.1.4

तन्व् अव्यक्तरसं मृष्टं शीतं लघ्व् अमृतोपमम्

tanv avyaktarasaṃ mṛṣṭaṃ śītaṃ laghv amṛtopamam

5.2

गङ्गाम्बु नभसो भ्रष्टं स्पृष्टं त्व् अर्केन्दुमारुतैः

gaṅgāmbu nabhaso bhraṣṭaṃ spṛṣṭaṃ tv arkendumārutaiḥ

5.2.2

हिताहितत्वे तद् भूयो देशकालाव् अपेक्षते

hitāhitatve tad bhūyo deśakālāv apekṣate

5.3

येनाभिवृष्टम् अमलं शाल्यन्नं राजते स्थितम्

yenābhivṛṣṭam amalaṃ śālyannaṃ rājate sthitam

5.3.2

अक्लिन्नम् अविवर्णं च तत् पेयं गाङ्गम् अन्यथा

aklinnam avivarṇaṃ ca tat peyaṃ gāṅgam anyathā

5.4

सामुद्रं तन् न पातव्यं मासाद् आश्वयुजाद् विना

sāmudraṃ tan na pātavyaṃ māsād āśvayujād vinā

5.4.2

ऐन्द्रम् अम्बु सुपात्रस्थम् अविपन्नं सदा पिबेत्

aindram ambu supātrastham avipannaṃ sadā pibet

5.5

तदभावे च भूमिष्ठम् आन्तरिक्षानुकारि यत्

tadabhāve ca bhūmiṣṭham āntarikṣānukāri yat

Aṣṭāṅgahṛdayasaṃhitā