4.32.2

केशान्ते शङ्खयोरूर्ध्वम् उत्क्षेपौ स्थपनी पुनः

keśānte śaṅkhayorūrdhvam utkṣepau sthapanī punaḥ

4.33

भ्रुवोर् मध्ये त्रये ऽप्यत्र शल्ये जीवेद् अनुद्धृते

bhruvor madhye traye 'pyatra śalye jīved anuddhṛte

4.33.2

स्वयं वा पतिते पाकात् सद्यो नश्यति तूद्धृते

svayaṃ vā patite pākāt sadyo naśyati tūddhṛte

4.34

जिह्वाक्षिनासिकाश्रोत्रखचतुष्टयसंगमे

jihvākṣināsikāśrotrakhacatuṣṭayasaṃgame

4.34.2

तालून्यास्यानि चत्वारि स्रोतसां तेषु मर्मसु

tālūnyāsyāni catvāri srotasāṃ teṣu marmasu

4.35

विद्धः शृङ्गाटकाख्येषु सद्यस् त्यजति जीवितम्

viddhaḥ śṛṅgāṭakākhyeṣu sadyas tyajati jīvitam

4.35.2

कपाले संधयः पञ्च सीमन्तास् तिर्यगूर्ध्वगाः

kapāle saṃdhayaḥ pañca sīmantās tiryagūrdhvagāḥ

4.36

भ्रमोन्मादमनोनाशैस् तेषु विद्धेषु नश्यति

bhramonmādamanonāśais teṣu viddheṣu naśyati

4.36.2

आन्तरो मस्तकस्योर्ध्वं सिरासंधिसमागमः

āntaro mastakasyordhvaṃ sirāsaṃdhisamāgamaḥ

4.37

रोमावर्तो ऽधिपो नाम मर्म सद्यो हरत्यसून्

romāvarto 'dhipo nāma marma sadyo haratyasūn

4.37.2

विषमं स्पन्दनं यत्र पीडिते रुक् च मर्म तत्

viṣamaṃ spandanaṃ yatra pīḍite ruk ca marma tat

4.38

मांसास्थिस्नायुधमनीसिरासंधिसमागमः

māṃsāsthisnāyudhamanīsirāsaṃdhisamāgamaḥ

4.38.2

स्यान् मर्मेति च तेनात्र सुतरां जीवितं स्थितम्

syān marmeti ca tenātra sutarāṃ jīvitaṃ sthitam

4.39

बाहुल्येन तु निर्देशः षोढैवं मर्मकल्पना

bāhulyena tu nirdeśaḥ ṣoḍhaivaṃ marmakalpanā

4.39.2

प्राणायतनसामान्याद् ऐक्यं वा मर्मणां मतम्

prāṇāyatanasāmānyād aikyaṃ vā marmaṇāṃ matam

4.40

मांसजानि दशेन्द्राख्यतलहृत्स्तनरोहिताः

māṃsajāni daśendrākhyatalahṛtstanarohitāḥ

4.40.2

शङ्खौ कटीकतरुणे नितम्बावंसयोः फले

śaṅkhau kaṭīkataruṇe nitambāvaṃsayoḥ phale

4.41

अस्थ्न्यष्टौ स्नावमर्माणि त्रयोविंशतिराणयः

asthnyaṣṭau snāvamarmāṇi trayoviṃśatirāṇayaḥ

4.41.2

कूर्चकूर्चशिरोऽपाङ्गक्षिप्रोत्क्षेपांसवस्तयः

kūrcakūrcaśiro'pāṅgakṣiprotkṣepāṃsavastayaḥ

4.42

गुदापस्तम्भविधुरशृङ्गाटानि नवादिशेत्

gudāpastambhavidhuraśṛṅgāṭāni navādiśet

Aṣṭāṅgahṛdayasaṃhitā