3.11.2

गर्भाशयो ऽष्टमः स्त्रीणां पित्तपक्वाशयान्तरे

garbhāśayo 'ṣṭamaḥ strīṇāṃ pittapakvāśayāntare

3.12

कोष्ठाङ्गानि स्थितान्य् एषु हृदयं क्लोम फुप्फुसम्

koṣṭhāṅgāni sthitāny eṣu hṛdayaṃ kloma phupphusam

3.12.2

यकृत्प्लीहोण्डुकं वृक्कौ नाभिडिम्बान्त्रवस्तयः

yakṛtplīhoṇḍukaṃ vṛkkau nābhiḍimbāntravastayaḥ

3.13

दश जीवितधामानि शिरोरसनबन्धनम्

daśa jīvitadhāmāni śirorasanabandhanam

3.13.2

कण्ठो ऽस्रं हृदयं नाभिर् वस्तिः शुक्रौजसी गुदम्

kaṇṭho 'sraṃ hṛdayaṃ nābhir vastiḥ śukraujasī gudam

3.14

जालानि कण्डराश् चाङ्गे पृथक् षोडश निर्दिशेत्

jālāni kaṇḍarāś cāṅge pṛthak ṣoḍaśa nirdiśet

3.14.2

षट् कूर्चाः सप्त सीवन्यो मेढ्रजिह्वाशिरोगताः

ṣaṭ kūrcāḥ sapta sīvanyo meḍhrajihvāśirogatāḥ

3.15

शस्त्रेण ताः परिहरेच् चतस्रो मांसरज्जवः

śastreṇa tāḥ pariharec catasro māṃsarajjavaḥ

3.15.2

चतुर्दशास्थिसंघाताः सीमन्ता द्विगुणा नव

caturdaśāsthisaṃghātāḥ sīmantā dviguṇā nava

3.16

अस्थ्नां शतानि षष्टिश् च त्रीणि दन्तनखैः सह

asthnāṃ śatāni ṣaṣṭiś ca trīṇi dantanakhaiḥ saha

3.16.2

धन्वन्तरिस् तु त्रीण्य् आह संधीनां च शतद्वयम्

dhanvantaris tu trīṇy āha saṃdhīnāṃ ca śatadvayam

3.17

दशोत्तरं सहस्रे द्वे निजगादात्रिनन्दनः

daśottaraṃ sahasre dve nijagādātrinandanaḥ

3.17.2

स्नाव्नां नवशती पञ्च पुंसां पेशीशतानि तु

snāvnāṃ navaśatī pañca puṃsāṃ peśīśatāni tu

3.18

अधिका विंशतिः स्त्रीणां योनिस्तनसमाश्रिताः

adhikā viṃśatiḥ strīṇāṃ yonistanasamāśritāḥ

3.18.2

दश मूलसिरा हृत्स्थास् ताः सर्वं सर्वतो वपुः

daśa mūlasirā hṛtsthās tāḥ sarvaṃ sarvato vapuḥ

3.19

रसात्मकं वहन्त्य् ओजस् तन्निबद्धं हि चेष्टितम्

rasātmakaṃ vahanty ojas tannibaddhaṃ hi ceṣṭitam

3.19.2

स्थूलमूलाः सुसूक्ष्माग्राः पत्त्ररेखाप्रतानवत्

sthūlamūlāḥ susūkṣmāgrāḥ pattrarekhāpratānavat

3.20

भिद्यन्ते तास् ततः सप्तशतान्य् आसां भवन्ति तु

bhidyante tās tataḥ saptaśatāny āsāṃ bhavanti tu

3.20.2

तत्रैकैकं च शाखायां शतं तस्मिन् न वेधयेत्

tatraikaikaṃ ca śākhāyāṃ śataṃ tasmin na vedhayet

3.21

सिरां जालंधरां नाम तिस्रश् चाभ्यन्तराश्रिताः

sirāṃ jālaṃdharāṃ nāma tisraś cābhyantarāśritāḥ

Aṣṭāṅgahṛdayasaṃhitā