2.33.2

बाहुं छित्त्वांससक्तस्य वाताध्मातोदरस्य तु

bāhuṃ chittvāṃsasaktasya vātādhmātodarasya tu

2.34

विदार्य कोष्ठम् अन्त्राणि बहिर् वा संनिरस्य च

vidārya koṣṭham antrāṇi bahir vā saṃnirasya ca

2.34.2

कटीसक्तस्य तद्वच्च तत्कपालानि दारयेत्

kaṭīsaktasya tadvacca tatkapālāni dārayet

2.35

यद् यद् वायुवशाद् अङ्गं सजेद् गर्भस्य खण्डशः

yad yad vāyuvaśād aṅgaṃ sajed garbhasya khaṇḍaśaḥ

2.35.2

तत् तच्छित्त्वाहरेत् सम्यग् रक्षेन् नारीं च यत्नतः

tat tacchittvāharet samyag rakṣen nārīṃ ca yatnataḥ

2.36

गर्भस्य हि गतिं चित्रां करोति विगुणो ऽनिलः

garbhasya hi gatiṃ citrāṃ karoti viguṇo 'nilaḥ

2.36.2

तत्रानल्पमतिस् तस्माद् अवस्थापेक्षम् आचरेत्

tatrānalpamatis tasmād avasthāpekṣam ācaret

2.37

छिन्द्याद् गर्भं न जीवन्तं मातरं स हि मारयेत्

chindyād garbhaṃ na jīvantaṃ mātaraṃ sa hi mārayet

2.37.2

सहात्मना न चोपेक्ष्यः क्षणम् अप्यस्तजीवितः

sahātmanā na copekṣyaḥ kṣaṇam apyastajīvitaḥ

2.38

योनिसंवरणभ्रंशमक्कल्लश्वासपीडिताम्

yonisaṃvaraṇabhraṃśamakkallaśvāsapīḍitām

2.38.2

पूत्युद्गारां हिमाङ्गीं च मूढगर्भां परित्यजेत्

pūtyudgārāṃ himāṅgīṃ ca mūḍhagarbhāṃ parityajet

2.39

अथापतन्तीम् अपरां पातयेत् पूर्ववद् भिषक्

athāpatantīm aparāṃ pātayet pūrvavad bhiṣak

2.39.2

एवं निर्हृतशल्यां तु सिञ्चेद् उष्णेन वारिणा

evaṃ nirhṛtaśalyāṃ tu siñced uṣṇena vāriṇā

2.40

दद्याद् अभ्यक्तदेहायै योनौ स्नेहपिचुं ततः

dadyād abhyaktadehāyai yonau snehapicuṃ tataḥ

2.40.2

योनिर् मृदुर् भवेत् तेन शूलं चास्याः प्रशाम्यति

yonir mṛdur bhavet tena śūlaṃ cāsyāḥ praśāmyati

2.41

दीप्यकातिविषारास्नाहिङ्ग्वेलापञ्चकोलकात्

dīpyakātiviṣārāsnāhiṅgvelāpañcakolakāt

2.41.2

चूर्णं स्नेहेन कल्कं वा क्वाथं वा पाययेत् ततः

cūrṇaṃ snehena kalkaṃ vā kvāthaṃ vā pāyayet tataḥ

2.42

कटुकातिविषापाठाशाकत्वग्घिङ्गुतेजिनीः

kaṭukātiviṣāpāṭhāśākatvagghiṅgutejinīḥ

2.42.2

तद्वच्च दोषस्यन्दार्थं वेदनोपशमाय च

tadvacca doṣasyandārthaṃ vedanopaśamāya ca

2.43

त्रिरात्रम् एवं सप्ताहं स्नेहम् एव ततः पिबेत्

trirātram evaṃ saptāhaṃ sneham eva tataḥ pibet

Aṣṭāṅgahṛdayasaṃhitā