1.6.2

वियोनिविकृताकारा जायन्ते विकृतैर् मलैः

viyonivikṛtākārā jāyante vikṛtair malaiḥ

1.7

मासि मासि रजः स्त्रीणां रसजं स्रवति त्र्यहम्

māsi māsi rajaḥ strīṇāṃ rasajaṃ sravati tryaham

1.7.2

वत्सराद् द्वादशाद् ऊर्ध्वं याति पञ्चाशतः क्षयम्

vatsarād dvādaśād ūrdhvaṃ yāti pañcāśataḥ kṣayam

1.8

पूर्णषोडशवर्षा स्त्री पूर्णविंशेन संगता

pūrṇaṣoḍaśavarṣā strī pūrṇaviṃśena saṃgatā

1.8.2

शुद्धे गर्भाशये मार्गे रक्ते शुक्रे ऽनिले हृदि

śuddhe garbhāśaye mārge rakte śukre 'nile hṛdi

1.9

वीर्यवन्तं सुतं सूते ततो न्यूनाब्दयोः पुनः

vīryavantaṃ sutaṃ sūte tato nyūnābdayoḥ punaḥ

1.9.2

रोग्यल्पायुरधन्यो वा गर्भो भवति नैव वा

rogyalpāyuradhanyo vā garbho bhavati naiva vā

1.10

वातादिकुणपग्रन्थिपूयक्षीणमलाह्वयम्

vātādikuṇapagranthipūyakṣīṇamalāhvayam

1.10.2

बीजासमर्थं रेतोऽस्रं स्वलिङ्गैर् दोषजं वदेत्

bījāsamarthaṃ reto'sraṃ svaliṅgair doṣajaṃ vadet

1.11

रक्तेन कुणपं श्लेष्मवाताभ्यां ग्रन्थिसंनिभम्

raktena kuṇapaṃ śleṣmavātābhyāṃ granthisaṃnibham

1.11.2

पूयाभं रक्तपित्ताभ्यां क्षीणं मारुतपित्ततः

pūyābhaṃ raktapittābhyāṃ kṣīṇaṃ mārutapittataḥ

1.12

कृच्छ्राण्येतान्यसाध्यं तु त्रिदोषं मूत्रविट्प्रभम्

kṛcchrāṇyetānyasādhyaṃ tu tridoṣaṃ mūtraviṭprabham

1.12.2

कुर्याद् वातादिभिर् दुष्टे स्वौषधं कुणपे पुनः

kuryād vātādibhir duṣṭe svauṣadhaṃ kuṇape punaḥ

1.13

धातकीपुष्पखदिरदाडिमार्जुनसाधितम्

dhātakīpuṣpakhadiradāḍimārjunasādhitam

1.13.2

पाययेत् सर्पिरथवा विपक्वम् असनादिभिः

pāyayet sarpirathavā vipakvam asanādibhiḥ

1.14

पलाशभस्माश्मभिदा ग्रन्थ्याभे पूयरेतसि

palāśabhasmāśmabhidā granthyābhe pūyaretasi

1.14.2

परूषकवटादिभ्यां क्षीणे शुक्रकरी क्रिया

parūṣakavaṭādibhyāṃ kṣīṇe śukrakarī kriyā

1.15

संशुद्धो विट्प्रभे सर्पिर् हिङ्गुसेव्यादिसाधितम्

saṃśuddho viṭprabhe sarpir hiṅgusevyādisādhitam

1.15.2

पिबेद् ग्रन्थ्यार्तवे पाठाव्योषवृक्षकजं जलम्

pibed granthyārtave pāṭhāvyoṣavṛkṣakajaṃ jalam

1.16

पेयं कुणपपूयास्रे चन्दनं वक्ष्यते तु यत्

peyaṃ kuṇapapūyāsre candanaṃ vakṣyate tu yat

Aṣṭāṅgahṛdayasaṃhitā