1.1

रागादिरोगान् सततानुषक्तान् अशेषकायप्रसृतान् अशेषान्

rāgādirogān satatānuṣaktān aśeṣakāyaprasṛtān aśeṣān

1.1.2

औत्सुक्यमोहारतिदाञ् जघान यो ऽपूर्ववैद्याय नमो ऽस्तु तस्मै

autsukyamohāratidāñ jaghāna yo 'pūrvavaidyāya namo 'stu tasmai

1.2

आयुः कामयमानेन धर्मार्थसुखसाधनम्

āyuḥ kāmayamānena dharmārthasukhasādhanam

1.2.2

आयुर्वेदोपदेशेषु विधेयः परम् आदरः

āyurvedopadeśeṣu vidheyaḥ param ādaraḥ

1.3

ब्रह्मा स्मृत्वायुषो वेदं प्रजापतिम् अजिग्रहत्

brahmā smṛtvāyuṣo vedaṃ prajāpatim ajigrahat

1.3.2

सो ऽश्विनौ तौ सहस्राक्षं सो ऽत्रिपुत्रादिकान् मुनीन्

so 'śvinau tau sahasrākṣaṃ so 'triputrādikān munīn

1.4

ते ऽग्निवेशादिकांस् ते तु पृथक् तन्त्राणि तेनिरे

te 'gniveśādikāṃs te tu pṛthak tantrāṇi tenire

1.4.2

तेभ्यो ऽतिविप्रकीर्णेभ्यः प्रायः सारतरोच्चयः

tebhyo 'tiviprakīrṇebhyaḥ prāyaḥ sārataroccayaḥ

1.5

क्रियते ऽष्टाङ्गहृदयं नातिसंक्षेपविस्तरम्

kriyate 'ṣṭāṅgahṛdayaṃ nātisaṃkṣepavistaram

1.5.2

कायबालग्रहोर्ध्वाङ्गशल्यदंष्ट्राजरावृषान्

kāyabālagrahordhvāṅgaśalyadaṃṣṭrājarāvṛṣān

1.6

अष्टाव् अङ्गानि तस्याहुश् चिकित्सा येषु संश्रिता

aṣṭāv aṅgāni tasyāhuś cikitsā yeṣu saṃśritā

1.6.2

वायुः पित्तं कफश् चेति त्रयो दोषाः समासतः

vāyuḥ pittaṃ kaphaś ceti trayo doṣāḥ samāsataḥ

1.7

विकृताविकृता देहं घ्नन्ति ते वर्तयन्ति च

vikṛtāvikṛtā dehaṃ ghnanti te vartayanti ca

1.7.2

ते व्यापिनो ऽपि हृन्नाभ्योर् अधोमध्योर्ध्वसंश्रयाः

te vyāpino 'pi hṛnnābhyor adhomadhyordhvasaṃśrayāḥ

1.8

वयोऽहोरात्रिभुक्तानां ते ऽन्तमध्यादिगाः क्रमात्

vayo'horātribhuktānāṃ te 'ntamadhyādigāḥ kramāt

1.8.2

तैर् भवेद् विषमस् तीक्ष्णो मन्दश् चाग्निः समैः समः

tair bhaved viṣamas tīkṣṇo mandaś cāgniḥ samaiḥ samaḥ

1.9

कोष्ठः क्रूरो मृदुर् मध्यो मध्यः स्यात् तैः समैर् अपि

koṣṭhaḥ krūro mṛdur madhyo madhyaḥ syāt taiḥ samair api

1.9.2

शुक्रार्तवस्थैर् जन्मादौ विषेणेव विषक्रिमेः

śukrārtavasthair janmādau viṣeṇeva viṣakrimeḥ

1.10

तैश् च तिस्रः प्रकृतयो हीनमध्योत्तमाः पृथक्

taiś ca tisraḥ prakṛtayo hīnamadhyottamāḥ pṛthak

1.10.2

समधातुः समस्तासु श्रेष्ठा निन्द्या द्विदोषजाः

samadhātuḥ samastāsu śreṣṭhā nindyā dvidoṣajāḥ

Aṣṭāṅgahṛdayasaṃhitā