1.51

मसृणपदगीतिगतयः सज्जनहृदयाभिसारिकाः सुरसाः

masṛṇapadagītigatayaḥ sajjanahṛdayābhisārikāḥ surasāḥ

1.51.2

मदनाद्वयोपनिषदो विशदा गोवर्धनस्यार्याः

madanādvayopaniṣado viśadā govardhanasyāryāḥ

1.52

वाणी प्राकृतसमुचितरसा बलेनैव संस्कृतं नीता

vāṇī prākṛtasamucitarasā balenaiva saṃskṛtaṃ nītā

1.52.2

निम्नानुरूपनीरा कलिन्दकन्येव गगनतलम्

nimnānurūpanīrā kalindakanyeva gaganatalam

1.53

आर्यासप्तशतीयं प्रगल्भमनसाम् अनादृता येषाम्

āryāsaptaśatīyaṃ pragalbhamanasām anādṛtā yeṣām

1.53.2

दूतीरहिता इव ते न कामिनीमनसि निविशन्ते

dūtīrahitā iva te na kāminīmanasi niviśante

1.54

रतरीतिवीतवसना प्रियेव शुद्धापि वाङ्मुदे सरसा

ratarītivītavasanā priyeva śuddhāpi vāṅmude sarasā

1.54.2

अरसा सालङ्कृतिर् अपि न रोचते शालभञ्जीव

arasā sālaṅkṛtir api na rocate śālabhañjīva

2.1

अवधिदिनावधिजीवाः प्रसीद जीवन्तु पथिकजनजायाः

avadhidināvadhijīvāḥ prasīda jīvantu pathikajanajāyāḥ

2.1.2

दुर्लङ्घ्यवर्त्मशैलौ स्तनौ पिधेहि प्रपापालि

durlaṅghyavartmaśailau stanau pidhehi prapāpāli

2.2

अतिवत्सला सुशीला सेवाचतुरा मनोऽनुकूला च

ativatsalā suśīlā sevācaturā mano'nukūlā ca

2.2.2

अजनि विनीता गृहिणी सपदि सपत्नीस्तनोद्भेदे

ajani vinītā gṛhiṇī sapadi sapatnīstanodbhede

2.3

अयि कूलनिचुलमूलोच्छेदनदुःशीलवीचिवाचाले

ayi kūlaniculamūlocchedanaduḥśīlavīcivācāle

2.3.2

बकविघसपङ्कसारा न चिरात् कावेरि भवितासि

bakavighasapaṅkasārā na cirāt kāveri bhavitāsi

2.4

अयि विविधवचनरचने ददासि चन्द्रं करे समानीय

ayi vividhavacanaracane dadāsi candraṃ kare samānīya

2.4.2

व्यसनदिवसेषु दूति क्व पुनस् त्वं दर्शनीयासि

vyasanadivaseṣu dūti kva punas tvaṃ darśanīyāsi

2.5

अस्तु म्लानिर् लोको लाञ्छनम् अपदिशतु हीयताम् ओजः

astu mlānir loko lāñchanam apadiśatu hīyatām ojaḥ

2.5.2

तद् अपि न मुञ्चति स त्वां वसुधाछायाम् इव सुधांशुः

tad api na muñcati sa tvāṃ vasudhāchāyām iva sudhāṃśuḥ

2.6

अतिचापलं वितन्वन्न् अन्तर्निविशन् निकामकाठिन्यः

aticāpalaṃ vitanvann antarniviśan nikāmakāṭhinyaḥ

2.6.2

मुखरयसि स्वयम् एतां सद्वृत्तां शङ्कुर् इव घण्टाम्

mukharayasi svayam etāṃ sadvṛttāṃ śaṅkur iva ghaṇṭām

Āryāsaptaśatī