1.1

पाणिग्रहे पुलकितं वपुर् ऐशं भूतिभूषितं जयति

pāṇigrahe pulakitaṃ vapur aiśaṃ bhūtibhūṣitaṃ jayati

1.1.2

अङ्कुरित इव मनोभूर् यस्मिन् भस्मावशेषो ऽपि

aṅkurita iva manobhūr yasmin bhasmāvaśeṣo 'pi

1.2

मा वम संवृणु विषम् इदम् इति सातङ्कं पितामहेनोक्तः

mā vama saṃvṛṇu viṣam idam iti sātaṅkaṃ pitāmahenoktaḥ

1.2.2

प्रातर् जयति सलज्जः कज्जलमलिनाधरः शम्भुः

prātar jayati salajjaḥ kajjalamalinādharaḥ śambhuḥ

1.3

जयति प्रियापदान्ते गरलग्रैवेयकः स्मरारातिः

jayati priyāpadānte garalagraiveyakaḥ smarārātiḥ

1.3.2

विषमविशिखे विशन्न् इव शरणं गलबद्धकरवालः

viṣamaviśikhe viśann iva śaraṇaṃ galabaddhakaravālaḥ

1.4

जयति ललाटकटाक्षः शशिमौलेः पक्ष्मलः प्रियाग्रणतौ

jayati lalāṭakaṭākṣaḥ śaśimauleḥ pakṣmalaḥ priyāgraṇatau

1.4.2

धनुषि स्मरेण निहितः सकण्टकः केतकेषुर् इव

dhanuṣi smareṇa nihitaḥ sakaṇṭakaḥ ketakeṣur iva

1.5

जयति जटाकिञ्जल्कं गङ्गामधु मुण्डवलयबीजमयम्

jayati jaṭākiñjalkaṃ gaṅgāmadhu muṇḍavalayabījamayam

1.5.2

गलगरलपङ्कसम्भवम् अम्भोरुहम् आननं शम्भोः

galagaralapaṅkasambhavam ambhoruham ānanaṃ śambhoḥ

1.6

सन्ध्यासलिलाञ्जलिम् अपि कङ्कणफणिपीयमानम् अविजानन्

sandhyāsalilāñjalim api kaṅkaṇaphaṇipīyamānam avijānan

1.6.2

गौरीमुखार्पितमना विजयाहसितः शिवो जयति

gaurīmukhārpitamanā vijayāhasitaḥ śivo jayati

1.7

प्रतिबिम्बितगौरीमुखविलोकनोत्कम्पशिथिलकरगलितः

pratibimbitagaurīmukhavilokanotkampaśithilakaragalitaḥ

1.7.2

स्वेदभरपूर्यमाणः शम्भोः सलिलाञ्जलिर् जयति

svedabharapūryamāṇaḥ śambhoḥ salilāñjalir jayati

1.8

प्रणयकुपितप्रियापदलाक्षासन्ध्यानुबन्धमधुरेन्दुः

praṇayakupitapriyāpadalākṣāsandhyānubandhamadhurenduḥ

1.8.2

तद्वलयकनकनिकषग्रावग्रीवः शिवो जयति

tadvalayakanakanikaṣagrāvagrīvaḥ śivo jayati

1.9

पूर्णनखेन्दुर् द्विगुणितमञ्जीरा प्रेमशृङ्खला जयति

pūrṇanakhendur dviguṇitamañjīrā premaśṛṅkhalā jayati

1.9.2

हरशशिलेखा गौरीचरणाङ्गुलिमध्यगुल्फेषु

haraśaśilekhā gaurīcaraṇāṅgulimadhyagulpheṣu

1.10

श्रीकरपिहितं चक्षुः सुखयतु वः पुण्डरीकनयनस्य

śrīkarapihitaṃ cakṣuḥ sukhayatu vaḥ puṇḍarīkanayanasya

1.10.2

जघनम् इवेक्षितुम् आगतम् अब्जनिभं नाभिसुषिरेण

jaghanam ivekṣitum āgatam abjanibhaṃ nābhisuṣireṇa

Āryāsaptaśatī