4.8.25

दिवसान्तरम् एकैकं च कर्म कारयेत्

divasāntaram ekaikaṃ ca karma kārayet

4.8.26

पूर्वकृतापदानं प्रतिज्ञायापहरन्तम् एकदेशदृष्टद्रव्यं कर्मणा रूपेण वा गृहीतं राजकोशम् अवस्तृणन्तं कर्मवध्यं वा राजवचनात् समस्तं व्यस्तम् अभ्यस्तं वा कर्म कारयेत्

pūrvakṛtāpadānaṃ pratijñāyāpaharantam ekadeśadṛṣṭadravyaṃ karmaṇā rūpeṇa vā gṛhītaṃ rājakośam avastṛṇantaṃ karmavadhyaṃ vā rājavacanāt samastaṃ vyastam abhyastaṃ vā karma kārayet

4.8.27

सर्वापराधेष्वपीडनीयो ब्राह्मणः

sarvāparādheṣvapīḍanīyo brāhmaṇaḥ

4.8.28

तस्याभिशस्ताङ्को ललाटे स्याद् व्यवहारपतनाय स्तेये श्वा मनुष्यवधे कबन्धो गुरुतल्पे भगं सुरापाने मद्यध्वजः

tasyābhiśastāṅko lalāṭe syād vyavahārapatanāya steye śvā manuṣyavadhe kabandho gurutalpe bhagaṃ surāpāne madyadhvajaḥ

4.8.29

ब्राह्मणं पापकर्माणम् उद्घुष्याङ्ककृतव्रणम्

brāhmaṇaṃ pāpakarmāṇam udghuṣyāṅkakṛtavraṇam

4.8.29.2

कुर्यान् निर्विषयं राजा वासयेद् आकरेषु वा

kuryān nirviṣayaṃ rājā vāsayed ākareṣu vā

4.9.1

समाहर्तृप्रदेष्टारः पूर्वम् अध्यक्षाणाम् अध्यक्षपुरुषाणां च नियमनं कुर्युः

samāhartṛpradeṣṭāraḥ pūrvam adhyakṣāṇām adhyakṣapuruṣāṇāṃ ca niyamanaṃ kuryuḥ

4.9.2

खनिसारकर्मान्तेभ्यः सारं रत्नं वापहरतः शुद्धवधः

khanisārakarmāntebhyaḥ sāraṃ ratnaṃ vāpaharataḥ śuddhavadhaḥ

4.9.3

फल्गुद्रव्यकर्मान्तेभ्यः फल्गु द्रव्यम् उपस्करं वा पूर्वः साहसदण्डः

phalgudravyakarmāntebhyaḥ phalgu dravyam upaskaraṃ vā pūrvaḥ sāhasadaṇḍaḥ

4.9.4

पण्यभूमिभ्यो वा राजपण्यं माषमूल्याद् ऊर्ध्वम् आ पादमूल्याद् इत्यपहरतो द्वादशपणो दण्डः आ द्विपादमूल्याद् इति चतुर्विंशतिपणः आ त्रिपादमूल्याद् इति षट्त्रिंशत्पणः आ पणमूल्याद् इत्यष्टचत्वारिंशत्पणः आ द्विपणमूल्याद् इति पूर्वः साहसदण्डः आ चतुष्पणमूल्याद् इति मध्यमः आष्टपणमूल्याद् इत्युत्तमः आ दशपणमूल्याद् इति वधः

paṇyabhūmibhyo vā rājapaṇyaṃ māṣamūlyād ūrdhvam ā pādamūlyād ityapaharato dvādaśapaṇo daṇḍaḥ ā dvipādamūlyād iti caturviṃśatipaṇaḥ ā tripādamūlyād iti ṣaṭtriṃśatpaṇaḥ ā paṇamūlyād ityaṣṭacatvāriṃśatpaṇaḥ ā dvipaṇamūlyād iti pūrvaḥ sāhasadaṇḍaḥ ā catuṣpaṇamūlyād iti madhyamaḥ āṣṭapaṇamūlyād ityuttamaḥ ā daśapaṇamūlyād iti vadhaḥ

4.9.5

कोष्ठपण्यकुप्यायुधागारेभ्यः कुप्यभाण्डोपस्करापहारेष्वर्धमूल्येषु एत एव दण्डाः

koṣṭhapaṇyakupyāyudhāgārebhyaḥ kupyabhāṇḍopaskarāpahāreṣvardhamūlyeṣu eta eva daṇḍāḥ

4.9.6

कोशभाण्डागाराक्षशालाभ्यश् चतुर्भागमूल्येषु एत एव द्विगुणा दण्डाः

kośabhāṇḍāgārākṣaśālābhyaś caturbhāgamūlyeṣu eta eva dviguṇā daṇḍāḥ

4.9.7

चोराणाम् अभिप्रधर्षणे चित्रो घातः

corāṇām abhipradharṣaṇe citro ghātaḥ

4.9.8

इति राजपरिग्रहेषु व्याख्यातम्

iti rājaparigraheṣu vyākhyātam

4.9.9

बाह्येषु तु प्रच्छन्नम् अहनि क्षेत्रखलवेश्मापणेभ्यः कुप्यभाण्डम् उपस्करं वा माषमूल्याद् ऊर्ध्वम् आ पादमूल्याद् इत्यपहरतस्त्रिपणो दण्डः गोमयप्रदेहेन वा प्रलिप्यावघोषणम् आ द्विपादमूल्याद् इति षट्पणः गोमयभस्मना वा प्रलिप्यावघोषणम् आ त्रिपादमूल्याद् इति नवपणः गोमयभस्मना वा प्रलिप्यावघोषणम् शरावमेखलया वा आ पणमूल्याद् इति द्वादशपणः मुण्डनं प्रव्राजनं वा आ द्विपणमूल्याद् इति चतुर्विंशतिपणः मुण्डस्येष्टकाशकलेन प्रव्राजनं वा आ चतुष्पणमूल्याद् इति षट्त्रिंशत्पण आ पञ्चपणमूल्याद् इत्यष्टचत्वारिंशत्पणः आ दशपणमूल्याद् इति पूर्वः साहसदण्ड आ विंशतिपणमूल्याद् इति द्विशत आ त्रिंशत्पणमूल्याद् इति पञ्चशत आ चत्वारिंशत्पणमूल्याद् इति साहस्र आ पञ्चाशत्पणमूल्याद् इति वधः

bāhyeṣu tu pracchannam ahani kṣetrakhalaveśmāpaṇebhyaḥ kupyabhāṇḍam upaskaraṃ vā māṣamūlyād ūrdhvam ā pādamūlyād ityapaharatastripaṇo daṇḍaḥ gomayapradehena vā pralipyāvaghoṣaṇam ā dvipādamūlyād iti ṣaṭpaṇaḥ gomayabhasmanā vā pralipyāvaghoṣaṇam ā tripādamūlyād iti navapaṇaḥ gomayabhasmanā vā pralipyāvaghoṣaṇam śarāvamekhalayā vā ā paṇamūlyād iti dvādaśapaṇaḥ muṇḍanaṃ pravrājanaṃ vā ā dvipaṇamūlyād iti caturviṃśatipaṇaḥ muṇḍasyeṣṭakāśakalena pravrājanaṃ vā ā catuṣpaṇamūlyād iti ṣaṭtriṃśatpaṇa ā pañcapaṇamūlyād ityaṣṭacatvāriṃśatpaṇaḥ ā daśapaṇamūlyād iti pūrvaḥ sāhasadaṇḍa ā viṃśatipaṇamūlyād iti dviśata ā triṃśatpaṇamūlyād iti pañcaśata ā catvāriṃśatpaṇamūlyād iti sāhasra ā pañcāśatpaṇamūlyād iti vadhaḥ

4.9.10

प्रसह्य दिवा रात्रौ वान्तर्यामिकम् अपहरतो ऽर्धमूल्येषु एत एव दण्डाः

prasahya divā rātrau vāntaryāmikam apaharato 'rdhamūlyeṣu eta eva daṇḍāḥ

4.9.11

प्रसह्य दिवा रात्रौ वा सशस्त्रस्यापहरतश्चतुर्भागमूल्येषु एत एव द्विगुणा दण्डाः

prasahya divā rātrau vā saśastrasyāpaharataścaturbhāgamūlyeṣu eta eva dviguṇā daṇḍāḥ

4.9.12

कुटुंबिकाध्यक्षमुख्यस्वामिनां कूटशासनमुद्राकर्मसु पूर्वमध्योत्तमवधा दण्डाः यथापराधं वा

kuṭuṃbikādhyakṣamukhyasvāmināṃ kūṭaśāsanamudrākarmasu pūrvamadhyottamavadhā daṇḍāḥ yathāparādhaṃ vā

4.9.13

धर्मस्थश्चेद् विवदमानं पुरुषं तर्जयति भर्त्सयत्यपसारयत्यभिग्रसते वा पूर्वम् अस्मै साहसदण्डं कुर्यात् वाक्पारुष्ये द्विगुणम्

dharmasthaśced vivadamānaṃ puruṣaṃ tarjayati bhartsayatyapasārayatyabhigrasate vā pūrvam asmai sāhasadaṇḍaṃ kuryāt vākpāruṣye dviguṇam

4.9.14

पृच्छ्यं न पृच्छति अपृच्छ्यं पृच्छति पृष्ट्वा वा विसृजति शिक्षयति स्मारयति पूर्वं ददाति वा इति मध्यमम् अस्मै साहसदण्डं कुर्यात्

pṛcchyaṃ na pṛcchati apṛcchyaṃ pṛcchati pṛṣṭvā vā visṛjati śikṣayati smārayati pūrvaṃ dadāti vā iti madhyamam asmai sāhasadaṇḍaṃ kuryāt

Arthaśāstra