1.61

तत्र त्रिपथमध्ये तु सूक्ष्मीभूता व्यवस्थिता

tatra tripathamadhye tu sūkṣmībhūtā vyavasthitā

1.62

ऊर्णातन्तुनिभाकारा गता सा नाभिमण्डलम्

ūrṇātantunibhākārā gatā sā nābhimaṇḍalam

1.63

चतुरङ्गुलमानेनाप्य् अष्टधा कुटिलाकृतिः

caturaṅgulamānenāpy aṣṭadhā kuṭilākṛtiḥ

1.64

स्फुरिता नाभिमध्ये तु शाखाशाखम् अनेकधा

sphuritā nābhimadhye tu śākhāśākham anekadhā

1.65

दशनाड्याश्रितं चक्रं नाभिमध्ये प्रकीर्तितम्

daśanāḍyāśritaṃ cakraṃ nābhimadhye prakīrtitam

1.65.2

इडा च पिङ्गला चैव सुषुम्ना च तृतीयका

iḍā ca piṅgalā caiva suṣumnā ca tṛtīyakā

1.66

ऊर्ध्वमार्गस्थिता ह्य् एता बृहच्छाखावलम्बिताः

ūrdhvamārgasthitā hy etā bṛhacchākhāvalambitāḥ

1.67

जयन्त्य् अलम्बुसा चैका बृहच्छाखावलम्बिनी

jayanty alambusā caikā bṛhacchākhāvalambinī

1.68

प्रणीता सा ह्य् अनेकैस् तु ब्रह्मावर्तेन संस्थिता

praṇītā sā hy anekais tu brahmāvartena saṃsthitā

1.69

ब्रह्मदण्डचक्रेणासौ कपालकर्परं यावत् तस्मिन् कपालकर्परे चन्द्रमण्डलान्तर्गतं कपाललिङ्गं लम्पिकास्थानोर्ध्वे ऽमृतधाराम् अभिस्रवति मस्तकमध्ये गर्भे तिष्ठति तद् एवामृतं राजदन्तमये शङ्खिनी ब्रह्मदण्डतले दमयित्वा स्रवति

brahmadaṇḍacakreṇāsau kapālakarparaṃ yāvat tasmin kapālakarpare candramaṇḍalāntargataṃ kapālaliṅgaṃ lampikāsthānordhve 'mṛtadhārām abhisravati mastakamadhye garbhe tiṣṭhati tad evāmṛtaṃ rājadantamaye śaṅkhinī brahmadaṇḍatale damayitvā sravati

1.70

एकं मुखरन्ध्रं राजदन्तान्तरे एतद् एव शङ्खिनीमुखं दशमद्वारम् इत्य् उच्यते

ekaṃ mukharandhraṃ rājadantāntare etad eva śaṅkhinīmukhaṃ daśamadvāram ity ucyate

1.71

यत्र च मूलभगमण्डलान्ते कुण्डलिनी शक्तिर् विनिर्गता तत्र वामभागोद्भवसोमनाडिका दक्षिणभागोद्भवसूर्यनाडिका चन्द्रो वामाङ्गव्यापकः सूर्यो दक्षिणाङ्गव्यापकः चन्द्रो वामाङ्गे वामनासापुटं सूर्यो दक्षिणाङ्गे दक्षिणनासापुटम् इत्य् एवं सूर्यचन्द्रौ व्यवस्थितौ

yatra ca mūlabhagamaṇḍalānte kuṇḍalinī śaktir vinirgatā tatra vāmabhāgodbhavasomanāḍikā dakṣiṇabhāgodbhavasūryanāḍikā candro vāmāṅgavyāpakaḥ sūryo dakṣiṇāṅgavyāpakaḥ candro vāmāṅge vāmanāsāpuṭaṃ sūryo dakṣiṇāṅge dakṣiṇanāsāpuṭam ity evaṃ sūryacandrau vyavasthitau

1.72

यत्र मूलकन्दे पवनोदयः मनस उदयः तपनोदयः जीवोदयः शब्दोदयः मातृकाक्षरोदयश् चेति

yatra mūlakande pavanodayaḥ manasa udayaḥ tapanodayaḥ jīvodayaḥ śabdodayaḥ mātṛkākṣarodayaś ceti

1.73

मनोमध्ये निद्राविषयम् इच्छाकार्यो निरञ्जनः परमात्मा

manomadhye nidrāviṣayam icchākāryo nirañjanaḥ paramātmā

1.74

मूलकन्दोद्यतो वायुः सोमसूर्यपथोद्भवः

mūlakandodyato vāyuḥ somasūryapathodbhavaḥ

1.75

शक्त्याधारस्थितो याति ब्रह्मदण्डकभेदकः

śaktyādhārasthito yāti brahmadaṇḍakabhedakaḥ

1.76

मूलकन्दे तु या शक्तिः कुण्डलाकाररूपिणी

mūlakande tu yā śaktiḥ kuṇḍalākārarūpiṇī

1.77

उद्गमावर्तवातो ऽयं प्राण इत्य् उच्यते बुधैः

udgamāvartavāto 'yaṃ prāṇa ity ucyate budhaiḥ

1.78

कन्ददण्डेन चोद्दण्डैर् भ्रामिता या भुजङ्गिनी

kandadaṇḍena coddaṇḍair bhrāmitā yā bhujaṅginī

1.79

मूर्छिता सा शिवं वेत्ति प्राणैर् एवं व्यवस्थिता

mūrchitā sā śivaṃ vetti prāṇair evaṃ vyavasthitā

Amaraughaśāsana