1.41

निरञ्जनाश्रिता शक्तिः सूक्ष्मशक्त्या तयाश्रितम्

nirañjanāśritā śaktiḥ sūkṣmaśaktyā tayāśritam

1.42

मनस्य् आश्रयतामेति ज्ञेयं शक्तित्रयं तु तत्

manasy āśrayatāmeti jñeyaṃ śaktitrayaṃ tu tat

1.43

शक्तित्रयोद्भवं बीजं बीजात् कामो विषं ततः

śaktitrayodbhavaṃ bījaṃ bījāt kāmo viṣaṃ tataḥ

1.44

कामः सृष्टितया प्रोक्तो विषं मृत्युपदं भवेत्

kāmaḥ sṛṣṭitayā prokto viṣaṃ mṛtyupadaṃ bhavet

1.45

किं बहुना कामविषहरनिरञ्जनानां ब्रह्मदण्डमूलाङ्कुरे निवासः एभिर् यद् अमुखो मोक्षः भस्मीभूतस्य देहस्य पुनरागमनकार्यं नास्ति

kiṃ bahunā kāmaviṣaharanirañjanānāṃ brahmadaṇḍamūlāṅkure nivāsaḥ ebhir yad amukho mokṣaḥ bhasmībhūtasya dehasya punarāgamanakāryaṃ nāsti

1.46

अहो मूर्खता लोकस्य केचिद् वदन्ति शुभाशुभकर्मविच्छेदनं मोक्षः

aho mūrkhatā lokasya kecid vadanti śubhāśubhakarmavicchedanaṃ mokṣaḥ

1.47

केचिद् वदन्ति वेदपाठाश्रितो मोक्षः

kecid vadanti vedapāṭhāśrito mokṣaḥ

1.48

केचिद् वदन्ति निरालम्बनलक्षणो मोक्षः

kecid vadanti nirālambanalakṣaṇo mokṣaḥ

1.49

केचिद् वदन्ति ध्यानकलाकरणसम्बद्धप्रयोगसम्भवेन रूपबिन्दुनादचैतन्यपिण्डाकाशलक्षणो मोक्षः

kecid vadanti dhyānakalākaraṇasambaddhaprayogasambhavena rūpabindunādacaitanyapiṇḍākāśalakṣaṇo mokṣaḥ

1.50

केचिद् वदन्ति पूजापूजकमद्यमांसादिसुरतप्रसङ्गसानन्दलक्षणो मोक्षः

kecid vadanti pūjāpūjakamadyamāṃsādisurataprasaṅgasānandalakṣaṇo mokṣaḥ

1.51

केचिद् वदन्ति

kecid vadanti

1.52

मूलकन्दोल्लासितकुण्डलिनीसंचारलक्षणो मोक्षः

mūlakandollāsitakuṇḍalinīsaṃcāralakṣaṇo mokṣaḥ

1.53

केचिद् वदन्ति सुसमदृष्टिनिपातलक्षणो मोक्षः इत्य् एवंविधभावनाश्रितलक्षणो मोक्षो न भवति

kecid vadanti susamadṛṣṭinipātalakṣaṇo mokṣaḥ ity evaṃvidhabhāvanāśritalakṣaṇo mokṣo na bhavati

1.54

अथ मोक्षपदं कथ्यते यत्र सहजसमाधिक्रमेण मनसा मनः समालोक्यते स एव मोक्षः

atha mokṣapadaṃ kathyate yatra sahajasamādhikrameṇa manasā manaḥ samālokyate sa eva mokṣaḥ

1.55

कामविषहरस्थानं मानसोद्भवः मनोमध्ये कारणं कारणात् उत्पत्तिस्थितिप्रलयाः प्रवर्तन्ते

kāmaviṣaharasthānaṃ mānasodbhavaḥ manomadhye kāraṇaṃ kāraṇāt utpattisthitipralayāḥ pravartante

1.56

उक्तं च भगवता महेश्वरेण

uktaṃ ca bhagavatā maheśvareṇa

1.57

जीवन्मुक्तिपदे देवि चित्तं बीजनिरञ्जनम्

jīvanmuktipade devi cittaṃ bījanirañjanam

1.58

मृत्युमार्गस्थितो योगी ज्ञात्वा कर्म समभ्यसेत्

mṛtyumārgasthito yogī jñātvā karma samabhyaset

1.59

इति जीवन्मुक्तिपदम् अनेन मार्गेण स्थिरत्वं भवति

iti jīvanmuktipadam anena mārgeṇa sthiratvaṃ bhavati

1.60

अथाधारणकर्मोदितशङ्खिनीभेदव्यवस्थाव्याख्या गुदमेढ्रान्तरे त्रिकोणत्रिधावर्तभगमण्डलम् उच्यते तत्र आधारग्रन्थय एकद्वित्रयश् चेति एकद्वित्रयाणां मध्ये ग्रन्थीनाम् उपान्तरे चतुष्पत्त्रं पद्मम् अधोमुखं तिष्ठति तत्र कर्णिकामध्ये मृणालसूत्रपरिमाणा शङ्खावर्ता तत्र प्रवालाङ्कुरसन्निभा द्वित्रिनाडीभूता कुण्डलिनी शक्तिः चैतन्यबीजमुखं गत्वा सुप्ता

athādhāraṇakarmoditaśaṅkhinībhedavyavasthāvyākhyā gudameḍhrāntare trikoṇatridhāvartabhagamaṇḍalam ucyate tatra ādhāragranthaya ekadvitrayaś ceti ekadvitrayāṇāṃ madhye granthīnām upāntare catuṣpattraṃ padmam adhomukhaṃ tiṣṭhati tatra karṇikāmadhye mṛṇālasūtraparimāṇā śaṅkhāvartā tatra pravālāṅkurasannibhā dvitrināḍībhūtā kuṇḍalinī śaktiḥ caitanyabījamukhaṃ gatvā suptā

Amaraughaśāsana