3.24.1

स्तोत्रियं शंसत्य् आत्मा वै स्तोत्रियः

stotriyaṃ śaṃsaty ātmā vai stotriyaḥ

3.24.2

तम् मध्यमया वाचा शंसत्य् आत्मानम् एव तत् संस्कुरुते

tam madhyamayā vācā śaṃsaty ātmānam eva tat saṃskurute

3.24.3

अनुरूपं शंसति प्रजा वा अनुरूपः

anurūpaṃ śaṃsati prajā vā anurūpaḥ

3.24.4

स उच्चैस्तराम् इवानुरूपः शंस्तव्यः प्रजाम् एव तच्छ्रेयसीम् आत्मनः कुरुते

sa uccaistarām ivānurūpaḥ śaṃstavyaḥ prajām eva tacchreyasīm ātmanaḥ kurute

3.24.5

धाय्यां शंसति पत्नी वै धाय्या

dhāyyāṃ śaṃsati patnī vai dhāyyā

3.24.6

सा नीचैस्तराम् इव धाय्या शंस्तव्या

sā nīcaistarām iva dhāyyā śaṃstavyā

3.24.7

प्रतिवादिनी हास्य गृहेषु पत्नी भवति यत्रैवं विद्वान् नीचैस्तरां धाय्यां शंसति

prativādinī hāsya gṛheṣu patnī bhavati yatraivaṃ vidvān nīcaistarāṃ dhāyyāṃ śaṃsati

3.24.8

प्रगाथं शंसति

pragāthaṃ śaṃsati

3.24.9

स स्वरवत्या वाचा शंस्तव्यः पशवो वै स्वरः पशवः प्रगाथः पशूनाम् अवरुद्ध्यै

sa svaravatyā vācā śaṃstavyaḥ paśavo vai svaraḥ paśavaḥ pragāthaḥ paśūnām avaruddhyai

3.24.10

इन्द्रस्य नु वीर्याणि प्र वोचम् इति सूक्तं शंसति

indrasya nu vīryāṇi pra vocam iti sūktaṃ śaṃsati

3.24.11

तद् वा एतत् प्रियम् इन्द्रस्य सूक्तं निष्केवल्यं हैरण्यस्तूपम् एतेन वै सूक्तेन हिरण्यस्तूप आङ्गिरस इन्द्रस्य प्रियं धामोपागच्छत् स परमं लोकम् अजयत्

tad vā etat priyam indrasya sūktaṃ niṣkevalyaṃ hairaṇyastūpam etena vai sūktena hiraṇyastūpa āṅgirasa indrasya priyaṃ dhāmopāgacchat sa paramaṃ lokam ajayat

3.24.12

उपेन्द्रस्य प्रियं धाम गच्छति जयति परमं लोकं य एवं वेद

upendrasya priyaṃ dhāma gacchati jayati paramaṃ lokaṃ ya evaṃ veda

3.24.13

गृहा वै प्रतिष्ठा सूक्तं तत् प्रतिष्ठिततमया वाचा शंस्तव्यं तस्माद् यद्य् अपि दूर इव पशूंल्लभते गृहान् एवैनान् आजिगमिषति गृहा हि पशूनाम् प्रतिष्ठा प्रतिष्ठा

gṛhā vai pratiṣṭhā sūktaṃ tat pratiṣṭhitatamayā vācā śaṃstavyaṃ tasmād yady api dūra iva paśūṃllabhate gṛhān evainān ājigamiṣati gṛhā hi paśūnām pratiṣṭhā pratiṣṭhā

3.25.1

सोमो वै राजामुष्मिंल्लोक आसीत् तं देवाश् चर्षयश् चाभ्यध्यायन् कथम् अयम् अस्मान् सोमो राजागच्छेद् इति ते ऽब्रुवंश् छन्दांसि यूयं न इमं सोमं राजानम् आहरतेति तथेति ते सुपर्णा भूत्वोदपतंस् ते यत् सुपर्णा भूत्वोदपतंस् तद् एतत् सौपर्णम् इत्य् आख्यानविद आचक्षते

somo vai rājāmuṣmiṃlloka āsīt taṃ devāś carṣayaś cābhyadhyāyan katham ayam asmān somo rājāgacched iti te 'bruvaṃś chandāṃsi yūyaṃ na imaṃ somaṃ rājānam āharateti tatheti te suparṇā bhūtvodapataṃs te yat suparṇā bhūtvodapataṃs tad etat sauparṇam ity ākhyānavida ācakṣate

3.25.2

छन्दांसि वै तत् सोमं राजानम् अच्छाचरंस् तानि ह तर्हि चतुरक्षराणि चतुरक्षराण्य् एव छन्दांस्य् आसन् सा जगती चतुरक्षरा प्रथमोदपतत् सा पतित्वार्धम् अध्वनो गत्वाश्राम्यत् सा परास्य त्रीण्य् अक्षराण्य् एकाक्षरा भूत्वा दीक्षां च तपश् च हरन्ती पुनर् अभ्यवापतत् तस्मात् तस्य वित्ता दीक्षा वित्तं तपो यस्य पशवः सन्ति जागता हि पशवो जगती हि तान् आहरत्

chandāṃsi vai tat somaṃ rājānam acchācaraṃs tāni ha tarhi caturakṣarāṇi caturakṣarāṇy eva chandāṃsy āsan sā jagatī caturakṣarā prathamodapatat sā patitvārdham adhvano gatvāśrāmyat sā parāsya trīṇy akṣarāṇy ekākṣarā bhūtvā dīkṣāṃ ca tapaś ca harantī punar abhyavāpatat tasmāt tasya vittā dīkṣā vittaṃ tapo yasya paśavaḥ santi jāgatā hi paśavo jagatī hi tān āharat

3.25.3

अथ त्रिष्टुब् उदपतत् सा पतित्वा भूयो ऽर्धाद् अध्वनो गत्वाश्राम्यत् सा परास्यैकम् अक्षरं त्र्यक्षरा भूत्वा दक्षिणा हरन्ती पुनर् अभ्यवापतत् तस्मान् मध्यंदिने दक्षिणा नीयन्ते त्रिष्टुभो लोके त्रिष्टुब्भि ता आहरत्

atha triṣṭub udapatat sā patitvā bhūyo 'rdhād adhvano gatvāśrāmyat sā parāsyaikam akṣaraṃ tryakṣarā bhūtvā dakṣiṇā harantī punar abhyavāpatat tasmān madhyaṃdine dakṣiṇā nīyante triṣṭubho loke triṣṭubbhi tā āharat

3.26.1

ते देवा अब्रुवन् गायत्रीं त्वं न इमं सोमं राजानम् आहरेति सा तथेत्य् अब्रवीत् तां वै मा सर्वेण स्वस्त्ययनेनानुमन्त्रयध्वम् इति तथेति सोदपतत् तां देवाः सर्वेण स्वस्त्ययनेनान्वमन्त्रयन्त प्रेति चेति चेत्य् एतद् वै सर्वं स्वस्त्ययनं यत् प्रेति चेति चेति तद् यो ऽस्य प्रियः स्यात् तम् एतेनानुमन्त्रयेत प्रेति चेति चेति स्वस्त्य् एव गच्छति स्वस्ति पुनर् आगच्छति

te devā abruvan gāyatrīṃ tvaṃ na imaṃ somaṃ rājānam āhareti sā tathety abravīt tāṃ vai mā sarveṇa svastyayanenānumantrayadhvam iti tatheti sodapatat tāṃ devāḥ sarveṇa svastyayanenānvamantrayanta preti ceti cety etad vai sarvaṃ svastyayanaṃ yat preti ceti ceti tad yo 'sya priyaḥ syāt tam etenānumantrayeta preti ceti ceti svasty eva gacchati svasti punar āgacchati

3.26.2

सा पतित्वा सोमपालान् भीषयित्वा पद्भ्यां च मुखेन च सोमं राजानं समगृभ्णाद् यानि चेतरे छन्दसी अक्षराण्य् अजहितां तानि चोपसमगृभ्णात्

sā patitvā somapālān bhīṣayitvā padbhyāṃ ca mukhena ca somaṃ rājānaṃ samagṛbhṇād yāni cetare chandasī akṣarāṇy ajahitāṃ tāni copasamagṛbhṇāt

3.26.2

तस्याः अनुविसृज्य कृशानुः सोम पालः सव्यस्य पदः नखम् अछिदत्

tasyāḥ anuvisṛjya kṛśānuḥ soma pālaḥ savyasya padaḥ nakham achidat

3.26.4

तत् शल्यकः अभवत्

tat śalyakaḥ abhavat

Aitareyabrāhmaṇa