3.9.6

महद् वाव नष्टैष्य् अभ्य् अल्पं वेच्छति यतरो वाव तयोर् ज्याय इवाभीच्छति स एव तयोः साधीय इच्छति

mahad vāva naṣṭaiṣy abhy alpaṃ vecchati yataro vāva tayor jyāya ivābhīcchati sa eva tayoḥ sādhīya icchati

3.9.7

य उ एव प्रैषान् वर्षीयसो वर्षीयसो वेद स उ एव तान् साधीयो वेद नष्टैष्यं ह्य् एतद् यत् प्रैषाः

ya u eva praiṣān varṣīyaso varṣīyaso veda sa u eva tān sādhīyo veda naṣṭaiṣyaṃ hy etad yat praiṣāḥ

3.9.8

तस्मात् प्रह्वस् तिष्ठन् प्रेष्यति

tasmāt prahvas tiṣṭhan preṣyati

3.10.1

गर्भा वा एत उक्थानां यन् निविदस् तद् यत् पुरस्ताद् उक्थानाम् प्रातःसवने धीयन्ते तस्मात् पराञ्चो गर्भा धीयन्ते पराञ्चः सम्भवन्ति

garbhā vā eta ukthānāṃ yan nividas tad yat purastād ukthānām prātaḥsavane dhīyante tasmāt parāñco garbhā dhīyante parāñcaḥ sambhavanti

3.10.2

यन् मध्यतो मध्यंदिने धीयन्ते तस्मान् मध्ये गर्भा धृताः

yan madhyato madhyaṃdine dhīyante tasmān madhye garbhā dhṛtāḥ

3.10.3

यद् अन्ततस् तृतीयसवने धीयन्ते तस्माद् अमुतो ऽर्वाञ्चो गर्भाः प्रजायन्ते प्रजात्यै

yad antatas tṛtīyasavane dhīyante tasmād amuto 'rvāñco garbhāḥ prajāyante prajātyai

3.10.4

प्रजायते प्रजया पशुभिर् य एवं वेद

prajāyate prajayā paśubhir ya evaṃ veda

3.10.5

पेशा वा एत उक्थानां यन् निविदस् तद् यत् पुरस्ताद् उक्थानाम् प्रातःसवने धीयन्ते यथैव प्रवयणतः पेशः कुर्यात् तादृक् तद् यन् मध्यतो मध्यंदिने धीयन्ते यथैव मध्यतः पेशः कुर्यात् तादृक् तद् यद् अन्ततस् तृतीयसवने धीयन्ते यथैवावप्रज्जनतः पेशः कुर्यात् तादृक् तत्

peśā vā eta ukthānāṃ yan nividas tad yat purastād ukthānām prātaḥsavane dhīyante yathaiva pravayaṇataḥ peśaḥ kuryāt tādṛk tad yan madhyato madhyaṃdine dhīyante yathaiva madhyataḥ peśaḥ kuryāt tādṛk tad yad antatas tṛtīyasavane dhīyante yathaivāvaprajjanataḥ peśaḥ kuryāt tādṛk tat

3.10.6

सर्वतो यज्ञस्य पेशसा शोभते य एवं वेद

sarvato yajñasya peśasā śobhate ya evaṃ veda

3.11.1

सौर्या वा एता देवता यन् निविदस् तद् यत् पुरस्ताद् उक्थानाम् प्रातःसवने धीयन्ते मध्यतो मध्यंदिने ऽन्ततस् तृतीयसवन आदित्यस्यैव तद् व्रतम् अनुपर्यावर्तन्ते

sauryā vā etā devatā yan nividas tad yat purastād ukthānām prātaḥsavane dhīyante madhyato madhyaṃdine 'ntatas tṛtīyasavana ādityasyaiva tad vratam anuparyāvartante

3.11.2

पच्छो वै देवा यज्ञं समभरंस् तस्मात् पच्छो निविदः शस्यन्ते

paccho vai devā yajñaṃ samabharaṃs tasmāt paccho nividaḥ śasyante

3.11.3

यद् वै तद् देवा यज्ञं समभरंस् तस्माद् अश्वः समभवत् तस्माद् आहुर् अश्वं निविदां शंस्त्रे दद्याद् इति तद् उ खलु वरम् एव ददति

yad vai tad devā yajñaṃ samabharaṃs tasmād aśvaḥ samabhavat tasmād āhur aśvaṃ nividāṃ śaṃstre dadyād iti tad u khalu varam eva dadati

3.11.4

न निविदः पदम् अतीयात्

na nividaḥ padam atīyāt

3.11.5

यन् निविदः पदम् अतीयाद् यज्ञस्य तच्छिद्रं कुर्याद् यज्ञस्य वै छिद्रं स्रवद् यजमानो ऽनु पापीयान् भवति तस्मान् न निविदः पदम् अतीयात्

yan nividaḥ padam atīyād yajñasya tacchidraṃ kuryād yajñasya vai chidraṃ sravad yajamāno 'nu pāpīyān bhavati tasmān na nividaḥ padam atīyāt

3.11.6

न निविदः पदे विपरिहरेद् यन् निविदः पदे विपरिहरेन् मोहयेद् यज्ञम् मुग्धो यजमानः स्यात् तस्मान् न निविदः पदे विपरिहरेत्

na nividaḥ pade viparihared yan nividaḥ pade vipariharen mohayed yajñam mugdho yajamānaḥ syāt tasmān na nividaḥ pade vipariharet

3.11.7

न निविदः पदे समस्येद् यन् निविदः पदे समस्येद् यज्ञस्य तद् आयुः संहरेत् प्रमायुको यजमानः स्यात् तस्मान् न निविदः पदे समस्येत्

na nividaḥ pade samasyed yan nividaḥ pade samasyed yajñasya tad āyuḥ saṃharet pramāyuko yajamānaḥ syāt tasmān na nividaḥ pade samasyet

3.11.8

प्रेदम् ब्रह्म प्रेदं क्षत्रम् इत्य् एते एव समस्येद् ब्रह्मक्षत्रयोः संश्रित्यै तस्माद् ब्रह्म च क्षत्रं च संश्रिते

predam brahma predaṃ kṣatram ity ete eva samasyed brahmakṣatrayoḥ saṃśrityai tasmād brahma ca kṣatraṃ ca saṃśrite

3.11.9

न तृचं न चतुरृचम् अति मन्येत निविद्धानम् एकैकं वै निविदः पदम् ऋचं सूक्तम् प्रति तस्मान् न तृचं न चतुरृचम् अति मन्येत निविद्धानं निविदा ह्य् एव स्तोत्रम् अतिशस्तम् भवति

na tṛcaṃ na caturṛcam ati manyeta nividdhānam ekaikaṃ vai nividaḥ padam ṛcaṃ sūktam prati tasmān na tṛcaṃ na caturṛcam ati manyeta nividdhānaṃ nividā hy eva stotram atiśastam bhavati

3.11.10

एकाम् परिशिष्य तृतीयसवने निविदं दध्यात्

ekām pariśiṣya tṛtīyasavane nividaṃ dadhyāt

3.11.11

यद् द्वे परिशिष्य दध्यात् प्रजननं तद् उपहन्याद् गर्भैस् तत् प्रजा व्यर्धयेत् तस्माद् एकाम् एव परिशिष्य तृतीयसवने निविदं दध्यात्

yad dve pariśiṣya dadhyāt prajananaṃ tad upahanyād garbhais tat prajā vyardhayet tasmād ekām eva pariśiṣya tṛtīyasavane nividaṃ dadhyāt

Aitareyabrāhmaṇa