3.7.9

यं कामयेत यथैवानीजानो ऽभूत् तथैवेजानः स्याद् इति यथैवास्य ऋचम् ब्रूयात् तथैवास्य वषट्कुर्यात् सदृशम् एवैनं तत् करोति

yaṃ kāmayeta yathaivānījāno 'bhūt tathaivejānaḥ syād iti yathaivāsya ṛcam brūyāt tathaivāsya vaṣaṭkuryāt sadṛśam evainaṃ tat karoti

3.7.10

यं कामयेत पापीयान् स्याद् इत्य् उच्चैस्तराम् अस्य ऋचम् उक्त्वा शनैस्तरां वषट्कुर्यात् पापीयांसम् एवैनं तत् करोति

yaṃ kāmayeta pāpīyān syād ity uccaistarām asya ṛcam uktvā śanaistarāṃ vaṣaṭkuryāt pāpīyāṃsam evainaṃ tat karoti

3.7.11

यं कामयेत श्रेयान् स्याद् इति शनैस्तराम् अस्य ऋचम् उक्त्वोच्चैस्तरां वषट्कुर्याच् छ्रिय एवैनं तच्छ्रियाम् आदधाति

yaṃ kāmayeta śreyān syād iti śanaistarām asya ṛcam uktvoccaistarāṃ vaṣaṭkuryāc chriya evainaṃ tacchriyām ādadhāti

3.7.12

संततम् ऋचा वषट्कृत्यं संतत्यै

saṃtatam ṛcā vaṣaṭkṛtyaṃ saṃtatyai

3.7.13

संधीयते प्रजया पशुभिर् य एवं वेद

saṃdhīyate prajayā paśubhir ya evaṃ veda

3.8.1

यस्यै देवतायै हविर् गृहीतं स्यात् तां ध्यायेद् वषट्करिष्यन् साक्षाद् एव तद् देवताम् प्रीणाति प्रत्यक्षाद् देवतां यजति

yasyai devatāyai havir gṛhītaṃ syāt tāṃ dhyāyed vaṣaṭkariṣyan sākṣād eva tad devatām prīṇāti pratyakṣād devatāṃ yajati

3.8.2

वज्रो वै वषट्कारः स एष प्रहृतो ऽशान्तो दीदाय तस्य हैतस्य न सर्व इव शान्तिं वेद न प्रतिष्ठां तस्माद्धाप्य् एतर्हि भूयान् इव मृत्युस् तस्य हैषैव शान्तिर् एषा प्रतिष्ठा वाग् इत्य् एव तस्माद् वषट्कृत्य वषट्कृत्य वाग् इत्य् अनुमन्त्रयेत स एनं शान्तो न हिनस्ति

vajro vai vaṣaṭkāraḥ sa eṣa prahṛto 'śānto dīdāya tasya haitasya na sarva iva śāntiṃ veda na pratiṣṭhāṃ tasmāddhāpy etarhi bhūyān iva mṛtyus tasya haiṣaiva śāntir eṣā pratiṣṭhā vāg ity eva tasmād vaṣaṭkṛtya vaṣaṭkṛtya vāg ity anumantrayeta sa enaṃ śānto na hinasti

3.8.3

वषट्कार मा माम् प्रमृक्षो माहं त्वाम् प्रमृक्षम् बृहता मन उपह्वये व्यानेन शरीरम् प्रतिष्ठासि प्रतिष्ठां गच्छ प्रतिष्ठाम् मा गमयेति वषट्कारम् अनुमन्त्रयेत

vaṣaṭkāra mā mām pramṛkṣo māhaṃ tvām pramṛkṣam bṛhatā mana upahvaye vyānena śarīram pratiṣṭhāsi pratiṣṭhāṃ gaccha pratiṣṭhām mā gamayeti vaṣaṭkāram anumantrayeta

3.8.4

तद् उ ह स्माह दीर्घम् एतत् सद् अप्रभ्व् ओजः सह

tad u ha smāha dīrgham etat sad aprabhv ojaḥ saha

3.8.5

इत्य् एव वषट्कारम् अनुमन्त्रयेत

ity eva vaṣaṭkāram anumantrayeta

3.8.6

ओजश् च ह वै सहश् च वषट्कारस्य प्रियतमे तन्वौ

ojaś ca ha vai sahaś ca vaṣaṭkārasya priyatame tanvau

3.8.7

प्रियेणैवैनं तद् धाम्ना समर्धयति

priyeṇaivainaṃ tad dhāmnā samardhayati

3.8.8

प्रियेण धाम्ना समृध्यते य एवं वेद

priyeṇa dhāmnā samṛdhyate ya evaṃ veda

3.8.9

वाक् च वै प्राणापानौ च वषट्कारस् त एते वषट्कृते वषट्कृते व्युत्क्रामन्ति तान् अनुमन्त्रयेत वाग् ओजः सह ओजो मयि प्राणापानाव् इत्य् आत्मन्य् एव तद्धोता वाचं च प्राणापानौ च प्रतिष्ठापयति सर्वायुः सर्वायुत्वाय

vāk ca vai prāṇāpānau ca vaṣaṭkāras ta ete vaṣaṭkṛte vaṣaṭkṛte vyutkrāmanti tān anumantrayeta vāg ojaḥ saha ojo mayi prāṇāpānāv ity ātmany eva taddhotā vācaṃ ca prāṇāpānau ca pratiṣṭhāpayati sarvāyuḥ sarvāyutvāya

3.8.10

सर्वम् आयुर् एति य एवं वेद

sarvam āyur eti ya evaṃ veda

3.9.1

यज्ञो वै देवेभ्य उदक्रामत् तं प्रैषैः प्रैषम् ऐच्छन् यत् प्रैषैः प्रैषम् ऐच्छंस् तत् प्रैषाणाम् प्रैषत्वम्

yajño vai devebhya udakrāmat taṃ praiṣaiḥ praiṣam aicchan yat praiṣaiḥ praiṣam aicchaṃs tat praiṣāṇām praiṣatvam

3.9.2

तं पुरोरुग्भिः प्रारोचयन् यत् पुरोरुग्भिः प्रारोचयंस् तत् पुरोरुचाम् पुरोरुक्त्वम्

taṃ purorugbhiḥ prārocayan yat purorugbhiḥ prārocayaṃs tat purorucām puroruktvam

3.9.3

तं वेद्याम् अन्वविन्दन् यद् वेद्याम् अन्वविन्दंस् तद् वेदेर् वेदित्वम्

taṃ vedyām anvavindan yad vedyām anvavindaṃs tad veder veditvam

3.9.4

तं वित्तं ग्रहैर् व्यगृह्णत यद्वित्तं ग्रहैर् व्यगृह्णत तद् ग्रहाणां ग्रहत्वम्

taṃ vittaṃ grahair vyagṛhṇata yadvittaṃ grahair vyagṛhṇata tad grahāṇāṃ grahatvam

3.9.5

तं वित्त्वा निविद्भिर् न्यवेदयन् यद् वित्त्वा निविद्भिर् न्यवेदयंस् तन् निविदां निवित्त्वम्

taṃ vittvā nividbhir nyavedayan yad vittvā nividbhir nyavedayaṃs tan nividāṃ nivittvam

Aitareyabrāhmaṇa