3.4.12

विश्वेभिः सोम्यम् मध्व् अग्न इन्द्रेण वायुना पिबा मित्रस्य धामभिर् इति वैश्वदेवम् उक्थं शस्त्वा वैश्वदेव्या यजति यथाभागं तद् देवताः प्रीणाति

viśvebhiḥ somyam madhv agna indreṇa vāyunā pibā mitrasya dhāmabhir iti vaiśvadevam ukthaṃ śastvā vaiśvadevyā yajati yathābhāgaṃ tad devatāḥ prīṇāti

3.5.1

देवपात्रं वा एतद् यद् वषट्कारो वषट्करोति देवपात्रेणैव तद् देवतास् तर्पयति

devapātraṃ vā etad yad vaṣaṭkāro vaṣaṭkaroti devapātreṇaiva tad devatās tarpayati

3.5.2

अनुवषट्करोति तद् यथादो ऽश्वान् वा गा वा पुनरभ्याकारं तर्पयन्त्य् एवम् एवैतद् देवताः पुनरभ्याकारं तर्पयन्ति यद् अनुवषट्करोति

anuvaṣaṭkaroti tad yathādo 'śvān vā gā vā punarabhyākāraṃ tarpayanty evam evaitad devatāḥ punarabhyākāraṃ tarpayanti yad anuvaṣaṭkaroti

3.5.3

इमान् एवाग्नीन् उपासत इत्य् आहुर् धिष्ण्यान् अथ कस्मात् पूर्वस्मिन्न् एव जुह्वति पूर्वस्मिन् वषट्कुर्वन्तीति

imān evāgnīn upāsata ity āhur dhiṣṇyān atha kasmāt pūrvasminn eva juhvati pūrvasmin vaṣaṭkurvantīti

3.5.4

यद् एव सोमस्याग्ने वीहीत्य् अनुवषट्करोति तेन धिष्ण्यान् प्रीणाति

yad eva somasyāgne vīhīty anuvaṣaṭkaroti tena dhiṣṇyān prīṇāti

3.5.5

असंस्थितान् सोमान् भक्षयन्तीत्य् आहुर् येषां नानुवषट्करोति को नु सोमस्य स्विष्टकृद्भाग इति

asaṃsthitān somān bhakṣayantīty āhur yeṣāṃ nānuvaṣaṭkaroti ko nu somasya sviṣṭakṛdbhāga iti

3.5.6

यद् वाव सोमस्याग्ने वीहीत्य् अनुवषट्करोति तेनैव संस्थितान् सोमान् भक्षयन्ति स उ एव सोमस्य स्विष्टकृद्भागो वषट्करोति

yad vāva somasyāgne vīhīty anuvaṣaṭkaroti tenaiva saṃsthitān somān bhakṣayanti sa u eva somasya sviṣṭakṛdbhāgo vaṣaṭkaroti

3.6.1

वज्रो वा एष यद् वषट्कारो यं द्विष्यात् तं ध्यायेद् वषट्करिष्यंस् तस्मिन्न् एव तं वज्रम् आस्थापयति

vajro vā eṣa yad vaṣaṭkāro yaṃ dviṣyāt taṃ dhyāyed vaṣaṭkariṣyaṃs tasminn eva taṃ vajram āsthāpayati

3.6.2

षﾱ इति वषट्करोति षड् वा ऋतव ऋतून् एव तत् कल्पयत्य् ऋतून् प्रतिष्ठापयत्य् ऋतून् वै प्रतितिष्ठत इदं सर्वम् अनुप्रतितिष्ठति यद् इदं किंच

ṣaﾱ iti vaṣaṭkaroti ṣaḍ vā ṛtava ṛtūn eva tat kalpayaty ṛtūn pratiṣṭhāpayaty ṛtūn vai pratitiṣṭhata idaṃ sarvam anupratitiṣṭhati yad idaṃ kiṃca

3.6.3

प्रतितिष्ठति य एवं वेद

pratitiṣṭhati ya evaṃ veda

3.6.4

तद् उ ह स्माह हिरण्यदन् बैद एतानि वा एतेन षट् प्रतिष्ठापयति द्यौर् अन्तरिक्षे प्रतिष्ठितान्तरिक्षम् पृथिव्याम् पृथिव्य् अप्स्व् आपः सत्ये सत्यम् ब्रह्मणि ब्रह्म तपसीत्य् एता एव तत् प्रतिष्ठाः प्रतितिष्ठन्तीर् इदं सर्वम् अनुप्रतितिष्ठति यद् इदं किंच प्रतितिष्ठति य एवं वेद

tad u ha smāha hiraṇyadan baida etāni vā etena ṣaṭ pratiṣṭhāpayati dyaur antarikṣe pratiṣṭhitāntarikṣam pṛthivyām pṛthivy apsv āpaḥ satye satyam brahmaṇi brahma tapasīty etā eva tat pratiṣṭhāḥ pratitiṣṭhantīr idaṃ sarvam anupratitiṣṭhati yad idaṃ kiṃca pratitiṣṭhati ya evaṃ veda

3.6.5

वौषﾱ इति वषट्करोत्य् असौ वाव वाव् ऋतवः षﾱ एतम् एव तद् ऋतुष्व् आदधात्य् ऋतुषु प्रतिष्ठापयति यादृग् इव वै देवेभ्यः करोति तादृग् इवास्मै देवाः कुर्वन्ति

vauṣaﾱ iti vaṣaṭkaroty asau vāva vāv ṛtavaḥ ṣaﾱ etam eva tad ṛtuṣv ādadhāty ṛtuṣu pratiṣṭhāpayati yādṛg iva vai devebhyaḥ karoti tādṛg ivāsmai devāḥ kurvanti

3.7.1

त्रयो वै वषट्कारा वज्रो धामछद् रिक्तः

trayo vai vaṣaṭkārā vajro dhāmachad riktaḥ

3.7.2

स यम् एवोच्चैर् बलि वषट्करोति स वज्रः

sa yam evoccair bali vaṣaṭkaroti sa vajraḥ

3.7.3

तं तम् प्रहरति द्विषते भ्रातृव्याय वधं यो ऽस्य स्तृत्यस् तस्मै स्तर्तवै तस्मात् स भ्रातृव्यवता वषट्कृत्यः

taṃ tam praharati dviṣate bhrātṛvyāya vadhaṃ yo 'sya stṛtyas tasmai startavai tasmāt sa bhrātṛvyavatā vaṣaṭkṛtyaḥ

3.7.4

अथ यः समः संततो निर्हाणर्चः स धामछत्

atha yaḥ samaḥ saṃtato nirhāṇarcaḥ sa dhāmachat

3.7.5

तं तम् प्रजाश् च पशवश् चानूपतिष्ठन्ते तस्मात् स प्रजाकामेन पशुकामेन वषट्कृत्यः

taṃ tam prajāś ca paśavaś cānūpatiṣṭhante tasmāt sa prajākāmena paśukāmena vaṣaṭkṛtyaḥ

3.7.6

अथ येनैव षﾱ अवराध्नोति स रिक्तः

atha yenaiva ṣaﾱ avarādhnoti sa riktaḥ

3.7.7

रिणक्त्य् आत्मानं रिणक्ति यजमानम् पापीयान् वषट्कर्ता भवति पापीयान् यस्मै वषट्करोति तस्मात् तस्याशां नेयात्

riṇakty ātmānaṃ riṇakti yajamānam pāpīyān vaṣaṭkartā bhavati pāpīyān yasmai vaṣaṭkaroti tasmāt tasyāśāṃ neyāt

3.7.8

किं स यजमानस्य पापभद्रम् आद्रियेतेति ह स्माह यो ऽस्य होता स्याद् इत्य् अत्रैवैनं यथा कामयेत तथा कुर्यात्

kiṃ sa yajamānasya pāpabhadram ādriyeteti ha smāha yo 'sya hotā syād ity atraivainaṃ yathā kāmayeta tathā kuryāt

Aitareyabrāhmaṇa