2.40.7

नू नो रास्व सहस्रवत् तोकवत् पुष्टिमद् वस्व् इत्य् उत्तमया परिदधात्य् आत्मा वै समस्तः सहस्रवांस् तोकवान् पुष्टिमान् आत्मानम् एव तत् समस्तं संभावयत्य् आत्मानं समस्तं संस्कुरुते

nū no rāsva sahasravat tokavat puṣṭimad vasv ity uttamayā paridadhāty ātmā vai samastaḥ sahasravāṃs tokavān puṣṭimān ātmānam eva tat samastaṃ saṃbhāvayaty ātmānaṃ samastaṃ saṃskurute

2.40.8

याज्यया यजति प्रत्तिर् वै याज्या पुण्यैव लक्ष्मीः पुण्याम् एव तल्लक्ष्मीं संभावयति पुण्यां लक्ष्मीं संस्कुरुते

yājyayā yajati prattir vai yājyā puṇyaiva lakṣmīḥ puṇyām eva tallakṣmīṃ saṃbhāvayati puṇyāṃ lakṣmīṃ saṃskurute

2.40.9

स एवं विद्वांश् छन्दोमयो देवतामयो ब्रह्ममयो ऽमृतमयः सम्भूय देवता अप्येति य एवं वेद

sa evaṃ vidvāṃś chandomayo devatāmayo brahmamayo 'mṛtamayaḥ sambhūya devatā apyeti ya evaṃ veda

2.40.10

यो वै तद् वेद यथा छन्दोमयो देवतामयो ब्रह्ममयो ऽमृतमयः सम्भूय देवता अप्येति तत् सुविदितम्

yo vai tad veda yathā chandomayo devatāmayo brahmamayo 'mṛtamayaḥ sambhūya devatā apyeti tat suviditam

2.40.11

इत्य् अध्यात्मम् अथाधिदैवतम्

ity adhyātmam athādhidaivatam

2.41.1

षट्पदं तूष्णींशंसं शंसति षड् वा ऋतव ऋतून् एव तत् कल्पयत्य् ऋतून् अप्येति

ṣaṭpadaṃ tūṣṇīṃśaṃsaṃ śaṃsati ṣaḍ vā ṛtava ṛtūn eva tat kalpayaty ṛtūn apyeti

2.41.2

द्वादशपदाम् पुरोरुचं शंसति द्वादश वै मासा मासान् एव तत् कल्पयति मासान् अप्येति

dvādaśapadām purorucaṃ śaṃsati dvādaśa vai māsā māsān eva tat kalpayati māsān apyeti

2.41.3

प्र वो देवायाग्नय इति शंसत्य् अन्तरिक्षं वै प्रान्तरिक्षं हीमानि सर्वाणि भूतान्य् अनुप्रयन्त्य् अन्तरिक्षम् एव तत् कल्पयत्य् अन्तरिक्षमप्येति

pra vo devāyāgnaya iti śaṃsaty antarikṣaṃ vai prāntarikṣaṃ hīmāni sarvāṇi bhūtāny anuprayanty antarikṣam eva tat kalpayaty antarikṣamapyeti

2.41.4

दीदिवांसम् अपूर्व्यम् इति शंसत्य् असौ वै दीदाय यो ऽसौ तपत्य् एतस्माद्धि न किंचन पूर्वम् अस्त्य् एतम् एव तत् कल्पयत्य् एतम् अप्येति

dīdivāṃsam apūrvyam iti śaṃsaty asau vai dīdāya yo 'sau tapaty etasmāddhi na kiṃcana pūrvam asty etam eva tat kalpayaty etam apyeti

2.41.5

स नः शर्माणि वीतय इति शंसत्य् अग्निर् वै शर्मान्य् अन्नाद्यानि यच्छत्य् अग्निम् एव तत् कल्पयत्य् अग्निम् अप्येति

sa naḥ śarmāṇi vītaya iti śaṃsaty agnir vai śarmāny annādyāni yacchaty agnim eva tat kalpayaty agnim apyeti

2.41.6

उत नो ब्रह्मन्न् अविष इति शंसति चन्द्रमा वै ब्रह्म चन्द्रमसम् एव तत् कल्पयति चन्द्रमसम् अप्येति

uta no brahmann aviṣa iti śaṃsati candramā vai brahma candramasam eva tat kalpayati candramasam apyeti

2.41.7

स यन्ता विप्र एषाम् इति शंसति वायुर् वै यन्ता वायुना हीदं यतम् अन्तरिक्षं न समृच्छति वायुम् एव तत् कल्पयति वायुम् अप्येति

sa yantā vipra eṣām iti śaṃsati vāyur vai yantā vāyunā hīdaṃ yatam antarikṣaṃ na samṛcchati vāyum eva tat kalpayati vāyum apyeti

2.41.8

ऋतावा यस्य रोदसी इति शंसति द्यावापृथिवी वै रोदसी द्यावापृथिवी एव तत् कल्पयति द्यावापृथिवी अप्येति

ṛtāvā yasya rodasī iti śaṃsati dyāvāpṛthivī vai rodasī dyāvāpṛthivī eva tat kalpayati dyāvāpṛthivī apyeti

2.41.9

नू नो रास्व सहस्रवत् तोकवत् पुष्टिमद् वस्व् इत्य् उत्तमया परिदधाति संवत्सरो वै समस्तः सहस्रवांस् तोकवान् पुष्टिमान् संवत्सरम् एव तत् समस्तं कल्पयति संवत्सरं समस्तम् अप्येति

nū no rāsva sahasravat tokavat puṣṭimad vasv ity uttamayā paridadhāti saṃvatsaro vai samastaḥ sahasravāṃs tokavān puṣṭimān saṃvatsaram eva tat samastaṃ kalpayati saṃvatsaraṃ samastam apyeti

2.41.10

याज्यया यजति वृष्टिर् वै याज्या विद्युद् एव विद्युद्धीदं वृष्टिम् अन्नाद्यं सम्प्रयच्छति विद्युतम् एव तत् कल्पयति विद्युतम् अप्येति

yājyayā yajati vṛṣṭir vai yājyā vidyud eva vidyuddhīdaṃ vṛṣṭim annādyaṃ samprayacchati vidyutam eva tat kalpayati vidyutam apyeti

2.41.11

स एवं विद्वान् एतन्मयो देवतामयो भवति भवति

sa evaṃ vidvān etanmayo devatāmayo bhavati bhavati

3.1.1

ग्रहोक्थं वा एतद् यत् प्रौगं नव प्रातर् ग्रहा गृह्यन्ते नवभिर् बहिष्पवमाने स्तुवते स्तुते स्तोमे दशमं गृह्णाति हिंकार इतरासां दशमः सो सा सम्मा

grahokthaṃ vā etad yat praugaṃ nava prātar grahā gṛhyante navabhir bahiṣpavamāne stuvate stute stome daśamaṃ gṛhṇāti hiṃkāra itarāsāṃ daśamaḥ so sā sammā

3.1.2

वायव्यं शंसति तेन वायव्य उक्थवान्

vāyavyaṃ śaṃsati tena vāyavya ukthavān

3.1.3

ऐन्द्रवायवं शंसति तेनैन्द्रवायव उक्थवान्

aindravāyavaṃ śaṃsati tenaindravāyava ukthavān

3.1.4

मैत्रावरुणं शंसति तेन मैत्रावरुण उक्थवान्

maitrāvaruṇaṃ śaṃsati tena maitrāvaruṇa ukthavān

Aitareyabrāhmaṇa