2.38.12

कृतम् अस्य कृतम् भवति नास्याकृतं कृतम् भवति य एवं वेद

kṛtam asya kṛtam bhavati nāsyākṛtaṃ kṛtam bhavati ya evaṃ veda

2.38.13

वाग् आयुर् विश्वायुर् विश्वम् आयुर् इत्य् आह प्राणो वा आयुः प्राणो रेतो वाग् योनिर् योनिं तद् उपसंधाय रेतः सिञ्चति

vāg āyur viśvāyur viśvam āyur ity āha prāṇo vā āyuḥ prāṇo reto vāg yonir yoniṃ tad upasaṃdhāya retaḥ siñcati

2.38.14

क इदं शंसिष्यति स इदं शंसिष्यतीत्य् आह प्रजापतिर् वै कः प्रजापतिः प्रजनयिष्यतीत्य् एव तद् आह

ka idaṃ śaṃsiṣyati sa idaṃ śaṃsiṣyatīty āha prajāpatir vai kaḥ prajāpatiḥ prajanayiṣyatīty eva tad āha

2.39.1

आहूय तूष्णींशंसं शंसति रेतस् तत् सिक्तम् विकरोति सिक्तिर् वा अग्रे ऽथ विकृतिः

āhūya tūṣṇīṃśaṃsaṃ śaṃsati retas tat siktam vikaroti siktir vā agre 'tha vikṛtiḥ

2.39.2

उपांशु तूष्णींशंसं शंसत्य् उपांश्व् इव वै रेतसः सिक्तिः

upāṃśu tūṣṇīṃśaṃsaṃ śaṃsaty upāṃśv iva vai retasaḥ siktiḥ

2.39.3

तिर इव तूष्णींशंसं शंसति तिर इव वै रेतांसि विक्रियन्ते

tira iva tūṣṇīṃśaṃsaṃ śaṃsati tira iva vai retāṃsi vikriyante

2.39.4

षट्पदं तूष्णींशंसं शंसति षड्विधो वै पुरुषः षﾱअङ्ग आत्मानम् एव तत् षड्विधं षﾱअङ्गं विकरोति

ṣaṭpadaṃ tūṣṇīṃśaṃsaṃ śaṃsati ṣaḍvidho vai puruṣaḥ ṣaﾱaṅga ātmānam eva tat ṣaḍvidhaṃ ṣaﾱaṅgaṃ vikaroti

2.39.5

तूष्णींशंसं शस्त्वा पुरोरुचं शंसति रेतस् तद् विकृतम् प्रजनयति विकृतिर् वा अग्रे ऽथ जातिः

tūṣṇīṃśaṃsaṃ śastvā purorucaṃ śaṃsati retas tad vikṛtam prajanayati vikṛtir vā agre 'tha jātiḥ

2.39.6

उच्चैः पुरोरुचं शंसत्य् उच्चैर् एवैनं तत् प्रजनयति

uccaiḥ purorucaṃ śaṃsaty uccair evainaṃ tat prajanayati

2.39.7

द्वादशपदाम् पुरोरुचां शंसति द्वादश वै मासाः संवत्सरः संवत्सरः प्रजापतिः सो ऽस्य सर्वस्य प्रजनयिता स यो ऽस्य सर्वस्य प्रजनयिता स एवैनं तत् प्रजया पशुभिः प्रजनयति प्रजात्यै

dvādaśapadām purorucāṃ śaṃsati dvādaśa vai māsāḥ saṃvatsaraḥ saṃvatsaraḥ prajāpatiḥ so 'sya sarvasya prajanayitā sa yo 'sya sarvasya prajanayitā sa evainaṃ tat prajayā paśubhiḥ prajanayati prajātyai

2.39.8

प्रजायते प्रजया पशुभिर् य एवं वेद

prajāyate prajayā paśubhir ya evaṃ veda

2.39.9

जातवेदस्याम् पुरोरुचं शंसति जातवेदोन्यङ्गाम्

jātavedasyām purorucaṃ śaṃsati jātavedonyaṅgām

2.39.10

तद् आहुर् यत् तृतीयसवनम् एव जातवेदस आयतनम् अथ कस्मात् प्रातःसवने जातवेदस्याम् पुरोरुचं शंसतीति

tad āhur yat tṛtīyasavanam eva jātavedasa āyatanam atha kasmāt prātaḥsavane jātavedasyām purorucaṃ śaṃsatīti

2.39.11

प्राणो वै जातवेदाः स हि जातानां वेद यावतां वै स जातानां वेद ते भवन्ति येषाम् उ न वेद किम् उ ते स्युर् यो वा आज्य आत्मसंस्कृतिं वेद

prāṇo vai jātavedāḥ sa hi jātānāṃ veda yāvatāṃ vai sa jātānāṃ veda te bhavanti yeṣām u na veda kim u te syur yo vā ājya ātmasaṃskṛtiṃ veda

2.40.1

प्र वो देवायाग्नय इति शंसति प्राणो वै प्र प्राणं हीमानि सर्वाणि भूतान्य् अनुप्रयन्ति प्राणम् एव तत् संभावयति प्राणं संस्कुरुते

pra vo devāyāgnaya iti śaṃsati prāṇo vai pra prāṇaṃ hīmāni sarvāṇi bhūtāny anuprayanti prāṇam eva tat saṃbhāvayati prāṇaṃ saṃskurute

2.40.2

दीदिवांसम् अपूर्व्यम् इति शंसति मनो वै दीदाय मनसो हि न किंचन पूर्वम् अस्ति मन एव तत् संभावयति मनः संस्कुरुते

dīdivāṃsam apūrvyam iti śaṃsati mano vai dīdāya manaso hi na kiṃcana pūrvam asti mana eva tat saṃbhāvayati manaḥ saṃskurute

2.40.3

स नः शर्माणि वीतय इति शंसति वाग् वै शर्म तस्माद् वाचानुवदन्तम् आह शर्मवद् आस्मा अयांसीति वाचम् एव तत् संभावयति वाचं संस्कुरुते

sa naḥ śarmāṇi vītaya iti śaṃsati vāg vai śarma tasmād vācānuvadantam āha śarmavad āsmā ayāṃsīti vācam eva tat saṃbhāvayati vācaṃ saṃskurute

2.40.4

उत नो ब्रह्मन्न् अविष इति शंसति श्रोत्रं वै ब्रह्म श्रोत्रेण हि ब्रह्म शृणोति श्रोत्रे ब्रह्म प्रतिष्ठितं श्रोत्रम् एव तत् संभावयति श्रोत्रं संस्कुरुते

uta no brahmann aviṣa iti śaṃsati śrotraṃ vai brahma śrotreṇa hi brahma śṛṇoti śrotre brahma pratiṣṭhitaṃ śrotram eva tat saṃbhāvayati śrotraṃ saṃskurute

2.40.5

स यन्ता विप्र एषाम् इति शंसत्य् अपानो वै यन्तापानेन ह्ययं यतः प्राणो न पराङ् भवत्य् अपानम् एव तत् संभावयत्य् अपानं संस्कुरुते

sa yantā vipra eṣām iti śaṃsaty apāno vai yantāpānena hyayaṃ yataḥ prāṇo na parāṅ bhavaty apānam eva tat saṃbhāvayaty apānaṃ saṃskurute

2.40.6

ऋतावा यस्य रोदसी इति शंसति चक्षुर् वा ऋतं तस्माद् यतरो विवदमानयोर् आहाहम् अनुष्ठ्या चक्षुषादर्शम् इति तस्य श्रद्दधति चक्षुर् एव तत् संभावयति चक्षुः संस्कुरुते

ṛtāvā yasya rodasī iti śaṃsati cakṣur vā ṛtaṃ tasmād yataro vivadamānayor āhāham anuṣṭhyā cakṣuṣādarśam iti tasya śraddadhati cakṣur eva tat saṃbhāvayati cakṣuḥ saṃskurute

Aitareyabrāhmaṇa