2.34.12

सो ऽध्वरा करति जातवेदा इति शंसति वायुर् वै जातवेदा वायुर् हीदं सर्वं करोति यद् इदं किंच वायुम् एव तद् अन्तरिक्षलोक

so 'dhvarā karati jātavedā iti śaṃsati vāyur vai jātavedā vāyur hīdaṃ sarvaṃ karoti yad idaṃ kiṃca vāyum eva tad antarikṣaloka

2.35.1

प्र वो देवायाग्नय इत्य् अनुष्टुभः

pra vo devāyāgnaya ity anuṣṭubhaḥ

2.35.2

प्रथमे पदे विहरति तस्मात् स्त्र्य् ऊरू विहरति

prathame pade viharati tasmāt stry ūrū viharati

2.35.3

समस्यत्य् उत्तरे पदे तस्मात् पुमान् ऊरू समस्यति तन् मिथुनम् मिथुनम् एव तद् उक्थमुखे करोति प्रजात्यै

samasyaty uttare pade tasmāt pumān ūrū samasyati tan mithunam mithunam eva tad ukthamukhe karoti prajātyai

2.35.4

प्रजायते प्रजया पशुभिर् य एवं वेद

prajāyate prajayā paśubhir ya evaṃ veda

2.35.5

प्र वो देवायाग्नय इत्य् एवानुष्टुभः प्रथमे पदे विहरति वज्रम् एव तत् परोवरीयांसं करोति समस्यत्य् एवोत्तरे पदे आरम्भणतो वै वज्रस्याणिमाथो दण्डस्याथो परशोर् वज्रम् एव तत् प्रहरति द्विषते भ्रातृव्याय वधं योऽस्य स्तृत्यस् तस्मै स्तर्तवै

pra vo devāyāgnaya ity evānuṣṭubhaḥ prathame pade viharati vajram eva tat parovarīyāṃsaṃ karoti samasyaty evottare pade ārambhaṇato vai vajrasyāṇimātho daṇḍasyātho paraśor vajram eva tat praharati dviṣate bhrātṛvyāya vadhaṃ yo'sya stṛtyas tasmai startavai

2.36.1

देवासुरा वा एषु लोकेषु समयतन्त ते वै देवाः सद एवायतनम् अकुर्वत तान् सदसो ऽजयंस् त आग्नीध्रं सम्प्रापद्यन्त ते ततो न पराजयन्त तस्माद् आग्नीध्र उपवसन्ति न सदस्य् आग्नीध्रे ह्य् अधारयन्त यद् आग्नीध्रे ऽधारयन्त तद् आग्नीध्रस्याग्नीध्रत्वम्

devāsurā vā eṣu lokeṣu samayatanta te vai devāḥ sada evāyatanam akurvata tān sadaso 'jayaṃs ta āgnīdhraṃ samprāpadyanta te tato na parājayanta tasmād āgnīdhra upavasanti na sadasy āgnīdhre hy adhārayanta yad āgnīdhre 'dhārayanta tad āgnīdhrasyāgnīdhratvam

2.36.2

तेषां वै देवानाम् असुराः सदस्यान् अग्नीन् निर्वापयांचक्रुस् ते देवा आग्नीध्राद् एव सदस्यान् अग्नीन् विहरन्त तैर् असुररक्षांस्य् अपाघ्नत तथैवैतद् यजमाना आग्नीध्राद् एव सदस्यान् अग्नीन् विहरन्त्य् असुररक्षांस्य् एव तद् अपघ्नते

teṣāṃ vai devānām asurāḥ sadasyān agnīn nirvāpayāṃcakrus te devā āgnīdhrād eva sadasyān agnīn viharanta tair asurarakṣāṃsy apāghnata tathaivaitad yajamānā āgnīdhrād eva sadasyān agnīn viharanty asurarakṣāṃsy eva tad apaghnate

2.36.3

ते वै प्रातर् आज्यैर् एवाजयन्त आयन् यद् आज्यैर् एवाजयन्त आयंस् तद् आज्यानाम् आज्यत्वम्

te vai prātar ājyair evājayanta āyan yad ājyair evājayanta āyaṃs tad ājyānām ājyatvam

2.36.4

तासां वै होत्राणाम् आयतीनाम् आजयन्तीनाम् अछावाकीयाहीयत तस्याम् इन्द्राग्नी अध्यास्ताम् इन्द्राग्नी वै देवानाम् ओजिष्ठौ बलिष्ठौ सहिष्ठौ सत्तमौ पारयिष्णुतमौ तस्माद् ऐन्द्राग्नम् अछावाकः प्रातःसवने शंसतीन्द्राग्नी हि तस्याम् अध्यास्ताम्

tāsāṃ vai hotrāṇām āyatīnām ājayantīnām achāvākīyāhīyata tasyām indrāgnī adhyāstām indrāgnī vai devānām ojiṣṭhau baliṣṭhau sahiṣṭhau sattamau pārayiṣṇutamau tasmād aindrāgnam achāvākaḥ prātaḥsavane śaṃsatīndrāgnī hi tasyām adhyāstām

2.36.5

तस्माद् उ पुरस्ताद् अन्ये होत्रकाः सदः प्रसर्पन्ति पश्चाछावाकः पश्चेव हि हीनो ऽनुसंजिगमिषति

tasmād u purastād anye hotrakāḥ sadaḥ prasarpanti paścāchāvākaḥ paśceva hi hīno 'nusaṃjigamiṣati

2.36.6

तस्माद् यो ब्राह्मणो बह्वृचो वीर्यवान् स्यात् सो ऽस्याछावाकीयां कुर्यात् तेनैव साहीना भवति

tasmād yo brāhmaṇo bahvṛco vīryavān syāt so 'syāchāvākīyāṃ kuryāt tenaiva sāhīnā bhavati

2.37.1

देवरथो वा एष यद् यज्ञस् तस्यैताव् अन्तरौ रश्मी यद् आज्यप्रौगे तद् यद् आज्येन पवमानम् अनुशंसति प्रौगेणाज्यं देवरथस्यैव तद् अन्तरौ रश्मी विहरत्य् अलोभाय

devaratho vā eṣa yad yajñas tasyaitāv antarau raśmī yad ājyaprauge tad yad ājyena pavamānam anuśaṃsati praugeṇājyaṃ devarathasyaiva tad antarau raśmī viharaty alobhāya

2.37.2

ताम् अनुकृतिम् मनुष्यरथस्यैवान्तरौ रश्मी विहरन्त्यलोभाय

tām anukṛtim manuṣyarathasyaivāntarau raśmī viharantyalobhāya

2.37.3

नास्य देवरथो लुभ्यति न मनुष्यरथो य एवं वेद

nāsya devaratho lubhyati na manuṣyaratho ya evaṃ veda

2.37.4

तद् आहुर् यथा वाव स्तोत्रम् एवं शस्त्रम् पावमानीषु सामगाः स्तुवत आग्नेयं होताज्यं शंसति कथम् अस्य पावमान्यो ऽनुशस्ता भवन्तीति

tad āhur yathā vāva stotram evaṃ śastram pāvamānīṣu sāmagāḥ stuvata āgneyaṃ hotājyaṃ śaṃsati katham asya pāvamānyo 'nuśastā bhavantīti

2.37.5

यो वा अग्निः स पवमानः

yo vā agniḥ sa pavamānaḥ

2.37.6

तद् अप्य् एतद् ऋषिणोक्तम् अग्निर् ऋषिः पवमान इति

tad apy etad ṛṣiṇoktam agnir ṛṣiḥ pavamāna iti

2.37.7

एवम् उ हास्याग्नेयीभिर् एव प्रतिपद्यमानस्य पावमान्यो ऽनुशस्ता भवन्ति

evam u hāsyāgneyībhir eva pratipadyamānasya pāvamānyo 'nuśastā bhavanti

2.37.8

तद् आहुर् यथा वाव स्तोत्रम् एवं शस्त्रं गायत्रीषु सामगाः स्तुवत आनुष्टुभं होताज्यं शंसति कथम् अस्य गायत्र्यो ऽनुशस्ता भवन्तीति

tad āhur yathā vāva stotram evaṃ śastraṃ gāyatrīṣu sāmagāḥ stuvata ānuṣṭubhaṃ hotājyaṃ śaṃsati katham asya gāyatryo 'nuśastā bhavantīti

Aitareyabrāhmaṇa