2.32.5

तद् उ वा आहुः शंसेद् एवापि वै तद् ऋत्विजे ऽहितं यद्धोता तूष्णींशंसं न शंसत्य् ऋत्विजि हि सर्वो यज्ञः प्रतिष्ठितो यज्ञे यजमानस् तस्माच्छंस्तव्यः

tad u vā āhuḥ śaṃsed evāpi vai tad ṛtvije 'hitaṃ yaddhotā tūṣṇīṃśaṃsaṃ na śaṃsaty ṛtviji hi sarvo yajñaḥ pratiṣṭhito yajñe yajamānas tasmācchaṃstavyaḥ

2.33.1

ब्रह्म वा आहावः क्षत्रं निविद् विट् सूक्तम् आह्वयते ऽथ निविदं दधाति ब्रह्मण्य् एव तत् क्षत्रम् अनुनियुनक्ति निविदं शस्त्वा सूक्तं शंसति क्षत्रं वै निविद् विट् सूक्तं क्षत्र एव तद् विशम् अनुनियुनक्ति

brahma vā āhāvaḥ kṣatraṃ nivid viṭ sūktam āhvayate 'tha nividaṃ dadhāti brahmaṇy eva tat kṣatram anuniyunakti nividaṃ śastvā sūktaṃ śaṃsati kṣatraṃ vai nivid viṭ sūktaṃ kṣatra eva tad viśam anuniyunakti

2.33.2

यं कामयेत क्षत्रेणैनं व्यर्धयानीति मध्य एतस्यै निविदः सूक्तं शंसेत् क्षत्रं वै निविद् विट् सूक्तं क्षत्रेणैवैनं तद् व्यर्धयति

yaṃ kāmayeta kṣatreṇainaṃ vyardhayānīti madhya etasyai nividaḥ sūktaṃ śaṃset kṣatraṃ vai nivid viṭ sūktaṃ kṣatreṇaivainaṃ tad vyardhayati

2.33.3

यं कामयेत विशैनं व्यर्धयानीति मध्य एतस्य सूक्तस्य निविदं शंसेत् क्षत्रं वै निविद्विट् सूक्तं विशैवैनं तद् व्यर्धयति

yaṃ kāmayeta viśainaṃ vyardhayānīti madhya etasya sūktasya nividaṃ śaṃset kṣatraṃ vai nividviṭ sūktaṃ viśaivainaṃ tad vyardhayati

2.33.4

यम् उ कामयेत सर्वम् एवास्य यथापूर्वम् ऋजु क्ﾱप्तं स्याद् इत्य् आह्वयेताथ निविदं दध्याद् अथ सूक्तं शंसेत् सो सर्वस्य क्ﾱप्तिः

yam u kāmayeta sarvam evāsya yathāpūrvam ṛju kﾱptaṃ syād ity āhvayetātha nividaṃ dadhyād atha sūktaṃ śaṃset so sarvasya kﾱptiḥ

2.33.5

प्रजापतिर् वा इदम् एक एवाग्र आस सो ऽकामयत प्रजायेय भूयान् स्याम् इति स तपो ऽतप्यत स वाचम् अयच्छत् स संवत्सरस्य परस्ताद् व्याहरद् द्वादशकृत्वो द्वादशपदा वा एषा निविद् एतां वाव तां निविदं व्याहरत् ताम् सर्वाणि भूतान्य् अन्वसृज्यन्त

prajāpatir vā idam eka evāgra āsa so 'kāmayata prajāyeya bhūyān syām iti sa tapo 'tapyata sa vācam ayacchat sa saṃvatsarasya parastād vyāharad dvādaśakṛtvo dvādaśapadā vā eṣā nivid etāṃ vāva tāṃ nividaṃ vyāharat tām sarvāṇi bhūtāny anvasṛjyanta

2.33.6

तद् एतद् ऋषिः पश्यन्न् अभ्यनूवाच स पूर्वया निविदा कव्यतायोर् इमाः प्रजा अजनयन् मनूनाम् इति

tad etad ṛṣiḥ paśyann abhyanūvāca sa pūrvayā nividā kavyatāyor imāḥ prajā ajanayan manūnām iti

2.33.7

तद् यद् एताम् पुरस्तात् सूक्तस्य निविदं दधाति प्रजात्यै

tad yad etām purastāt sūktasya nividaṃ dadhāti prajātyai

2.33.8

प्रजायते प्रजया पशुभिर् य एवं वेद

prajāyate prajayā paśubhir ya evaṃ veda

2.34.1

अग्निर् देवेद्ध इति शंसत्य् असौ वा अग्निर् देवेद्ध एतं हि देवा इन्धत एतम् एव तद् एतस्मिंल्लोक आयातयति

agnir deveddha iti śaṃsaty asau vā agnir deveddha etaṃ hi devā indhata etam eva tad etasmiṃlloka āyātayati

2.34.2

अग्निर् मन्विद्ध इति शंसत्य् अयं वा अग्निर् मन्विद्ध इमं हि मनुष्या इन्धते ऽग्निम् एव तद् अस्मिंल्लोक आयातयति

agnir manviddha iti śaṃsaty ayaṃ vā agnir manviddha imaṃ hi manuṣyā indhate 'gnim eva tad asmiṃlloka āyātayati

2.34.3

अग्निः सुषमिद् इति शंसति वायुर् वा अग्निः सुषमिद् वायुर् हि स्वयम् आत्मानं समिन्द्धे स्वयम् इदं सर्वं यद् इदं किंच वायुम् एव तद् अन्तरिक्षलोक आयातयति

agniḥ suṣamid iti śaṃsati vāyur vā agniḥ suṣamid vāyur hi svayam ātmānaṃ saminddhe svayam idaṃ sarvaṃ yad idaṃ kiṃca vāyum eva tad antarikṣaloka āyātayati

2.34.4

होता देववृत इति शंसत्य् असौ वै होता देववृत एष हि सर्वतो देवैर् वृत एतम् एव तद् एतस्मिंल्लोक आयातयति

hotā devavṛta iti śaṃsaty asau vai hotā devavṛta eṣa hi sarvato devair vṛta etam eva tad etasmiṃlloka āyātayati

2.34.5

होता मनुवृत इति शंसत्य् अयं वा अग्निर् होता मनुवृतो ऽयं हि सर्वतो मनुष्यैर् वृतो ऽग्निम् एव तद् अस्मिंल्लोक आयातयति

hotā manuvṛta iti śaṃsaty ayaṃ vā agnir hotā manuvṛto 'yaṃ hi sarvato manuṣyair vṛto 'gnim eva tad asmiṃlloka āyātayati

2.34.6

प्रणीर् यज्ञानाम् इति शंसति वायुर् वै प्रणीर् यज्ञानां यदा हि प्राणित्य् अथ यज्ञो ऽथाग्निहोत्रं वायुम् एव तद् अन्तरिक्षलोक आयातयति

praṇīr yajñānām iti śaṃsati vāyur vai praṇīr yajñānāṃ yadā hi prāṇity atha yajño 'thāgnihotraṃ vāyum eva tad antarikṣaloka āyātayati

2.34.7

रथीर् अध्वराणाम् इति शंसत्य् असौ वै रथीर् अध्वराणाम् एष हि यथैतच् चरति रथीर् इवैतम् एव तद् एतस्मिंल्लोक आयातयति

rathīr adhvarāṇām iti śaṃsaty asau vai rathīr adhvarāṇām eṣa hi yathaitac carati rathīr ivaitam eva tad etasmiṃlloka āyātayati

2.34.8

अतूर्तो होतेति शंसत्य् अयं वा अग्निर् अतूर्तो होतेमं ह न कश्चन तिर्यञ्चं तरत्य् अग्निम् एव तद् अस्मिंल्लोक आयातयति

atūrto hoteti śaṃsaty ayaṃ vā agnir atūrto hotemaṃ ha na kaścana tiryañcaṃ taraty agnim eva tad asmiṃlloka āyātayati

2.34.9

तूर्णिर् हव्यवाﾱ इति शंसति वायुर् वै तूर्णिर् हव्यवाड् वायुर् हीदं सर्वम् सद्यस् तरति यद् इदं किंच वायुर् देवेभ्यो हव्यं वहति वायुम् एव तद् अन्तरिक्षलोक आयातयति

tūrṇir havyavāﾱ iti śaṃsati vāyur vai tūrṇir havyavāḍ vāyur hīdaṃ sarvam sadyas tarati yad idaṃ kiṃca vāyur devebhyo havyaṃ vahati vāyum eva tad antarikṣaloka āyātayati

2.34.10

आ देवो देवान् वक्षद् इति शंसत्य् असौ वै देवो देवान् आवहत्य् एतम् एव तद् एतस्मिंल्लोक आयातयति

ā devo devān vakṣad iti śaṃsaty asau vai devo devān āvahaty etam eva tad etasmiṃlloka āyātayati

2.34.11

यक्षद् अग्निर् देवो देवान् इति शंसत्य् अयं वा अग्निर् देवो देवान् यजत्य् अग्निम् एव तद् अस्मिंल्लोक आयातयति

yakṣad agnir devo devān iti śaṃsaty ayaṃ vā agnir devo devān yajaty agnim eva tad asmiṃlloka āyātayati

Aitareyabrāhmaṇa