2.24.4

यो वै यज्ञं सवनपङ्क्तिं वेद सवनपङ्क्तिना यज्ञेन राध्नोति पशुर् उपवसथे त्रीणि सवनानि पशुर् अनूबन्ध्य इत्य् एष वै यज्ञः सवनपङ्क्तिः सवनपङ्क्तिना यज्ञेन राध्नोति य एवं वेद

yo vai yajñaṃ savanapaṅktiṃ veda savanapaṅktinā yajñena rādhnoti paśur upavasathe trīṇi savanāni paśur anūbandhya ity eṣa vai yajñaḥ savanapaṅktiḥ savanapaṅktinā yajñena rādhnoti ya evaṃ veda

2.24.5

हरिवाṁ इन्द्रो धाना अत्तु पूषण्वान् करम्भं सरस्वतीवान् भारतीवान् परिवाप इन्द्रस्यापूप इति हविष्पङ्क्त्या यजति

harivāṁ indro dhānā attu pūṣaṇvān karambhaṃ sarasvatīvān bhāratīvān parivāpa indrasyāpūpa iti haviṣpaṅktyā yajati

2.24.6

ऋक्सामे वा इन्द्रस्य हरी

ṛksāme vā indrasya harī

2.24.7

पशवः पूषान्नं करम्भः

paśavaḥ pūṣānnaṃ karambhaḥ

2.24.8

सरस्वतीवान् भारतीवान् इति वाग् एव सरस्वती प्राणो भरतः

sarasvatīvān bhāratīvān iti vāg eva sarasvatī prāṇo bharataḥ

2.24.9

परिवाप इन्द्रस्यापूप इत्य् अन्नम् एव परिवाप इन्द्रियम् अपूपः

parivāpa indrasyāpūpa ity annam eva parivāpa indriyam apūpaḥ

2.24.10

एतासाम् एव तद् देवतानां यजमानं सायुज्यं सरूपतां सलोकतां गमयति गच्छति श्रेयसः सायुज्यं गच्छति श्रेष्ठतां य एवं वेद

etāsām eva tad devatānāṃ yajamānaṃ sāyujyaṃ sarūpatāṃ salokatāṃ gamayati gacchati śreyasaḥ sāyujyaṃ gacchati śreṣṭhatāṃ ya evaṃ veda

2.24.11

हविर् अग्ने वीहीत्य् अनुससवनम् पुरोﾱआशस्विष्टकृतो यजति

havir agne vīhīty anusasavanam puroﾱāśasviṣṭakṛto yajati

2.24.12

अवत्सारो वा एतेनाग्नेः प्रियं धामोपागच्छत् स परमं लोकम् अजयत्

avatsāro vā etenāgneḥ priyaṃ dhāmopāgacchat sa paramaṃ lokam ajayat

2.24.13

उपाग्नेः प्रियं धाम गच्छति जयति परमं लोकं य एवं वेद यश् चैवं विद्वान् एतया हविष्पङ्क्त्या यजते यजतीति च यजतीति च

upāgneḥ priyaṃ dhāma gacchati jayati paramaṃ lokaṃ ya evaṃ veda yaś caivaṃ vidvān etayā haviṣpaṅktyā yajate yajatīti ca yajatīti ca

2.25.1

देवा वै सोमस्य राज्ञो ऽग्रपेये न समपादयन्न् अहम् प्रथमः पिबेयम् अहम् प्रथमः पिबेयम् इत्य् एवाकामयन्त ते सम्पादयन्तो ऽब्रुवन् हन्ताजिम् आयाम स यो न उज्जेष्यति स प्रथमः सोमस्य पास्यतीति तथेति त आजिम् आयुस् तेषाम् आजिं यताम् अभिसृष्टानां वायुर् मुखम् प्रथमः प्रत्यपद्यताथेन्द्रो ऽथ मित्रावरुणाव् अथाश्विनौ

devā vai somasya rājño 'grapeye na samapādayann aham prathamaḥ pibeyam aham prathamaḥ pibeyam ity evākāmayanta te sampādayanto 'bruvan hantājim āyāma sa yo na ujjeṣyati sa prathamaḥ somasya pāsyatīti tatheti ta ājim āyus teṣām ājiṃ yatām abhisṛṣṭānāṃ vāyur mukham prathamaḥ pratyapadyatāthendro 'tha mitrāvaruṇāv athāśvinau

2.25.2

सो ऽवेद् इन्द्रो वायुम् उद् वै जयतीति तम् अनुपरापतत् सह नाव् अथोज्जयावेति स नेत्य् अब्रवीद् अहम् एवोज्जेष्यामीति तृतीयम् मे ऽथोज्जयावेति नेति हैवाब्रवीद् अहम् एवोज्जेष्यामीति तुरीयम् मे ऽथोज्जयावेति तथेति तं तुरीये ऽत्यार्जत तत् तुरीयभाग् इन्द्रो ऽभवत् त्रिभाग् वायुः

so 'ved indro vāyum ud vai jayatīti tam anuparāpatat saha nāv athojjayāveti sa nety abravīd aham evojjeṣyāmīti tṛtīyam me 'thojjayāveti neti haivābravīd aham evojjeṣyāmīti turīyam me 'thojjayāveti tatheti taṃ turīye 'tyārjata tat turīyabhāg indro 'bhavat tribhāg vāyuḥ

2.25.3

तौ सहैवेन्द्रवायू उदजयतां सह मित्रावरुणौ सहाश्विनौ त एषाम् एते यथोज्जितम् भक्षा इन्द्रवाय्वोः प्रथमो ऽथ मित्रावरुणयोर् अथाश्विनोः

tau sahaivendravāyū udajayatāṃ saha mitrāvaruṇau sahāśvinau ta eṣām ete yathojjitam bhakṣā indravāyvoḥ prathamo 'tha mitrāvaruṇayor athāśvinoḥ

2.25.4

स एष इन्द्रतुरीयो ग्रहो गृह्यते यद् ऐन्द्रवायवः

sa eṣa indraturīyo graho gṛhyate yad aindravāyavaḥ

2.25.5

तद् एतद् ऋषिः पश्यन्न् अभ्यनूवाच नियुत्वाṁ इन्द्रसारथिर् इति

tad etad ṛṣiḥ paśyann abhyanūvāca niyutvāṁ indrasārathir iti

2.25.6

तस्माद्धाप्येतर्हि भरताः सत्वनां वित्तिम् प्रयन्ति तुरीये हैव संग्रहीतारो वदन्ते ऽमुनैवानूकाशेन यद् अद इन्द्रः सारथिर् इव भूत्वोदजयत्

tasmāddhāpyetarhi bharatāḥ satvanāṃ vittim prayanti turīye haiva saṃgrahītāro vadante 'munaivānūkāśena yad ada indraḥ sārathir iva bhūtvodajayat

2.26.1

ते वा एते प्राणा एव यद् द्विदेवत्याः

te vā ete prāṇā eva yad dvidevatyāḥ

2.26.2

वाक् च प्राणश् चैन्द्रवायवश् चक्षुश् च मनश् च मैत्रावरुणः श्रोत्रं चात्मा चाश्विनः

vāk ca prāṇaś caindravāyavaś cakṣuś ca manaś ca maitrāvaruṇaḥ śrotraṃ cātmā cāśvinaḥ

2.26.3

तस्य हैतस्यैन्द्रवायवस्याप्य् एके ऽनुष्टुभौ पुरोनुवाक्ये कुर्वन्ति गायत्र्यौ याज्ये

tasya haitasyaindravāyavasyāpy eke 'nuṣṭubhau puronuvākye kurvanti gāyatryau yājye

2.26.4

वाक् च वा एष प्राणश् च ग्रहो यद् ऐन्द्रवायवस् तद् अपि छन्दोभ्यां यथायथं क्लप्स्येते इति

vāk ca vā eṣa prāṇaś ca graho yad aindravāyavas tad api chandobhyāṃ yathāyathaṃ klapsyete iti

Aitareyabrāhmaṇa