8.27.8.2

सव्यम् पादम् अवनेनिजे ऽस्मिन् राष्ट्र इन्द्रियं वर्धयामि

savyam pādam avanenije 'smin rāṣṭra indriyaṃ vardhayāmi

8.27.8.3

पूर्वम् अन्यम् अपरम् अन्यम् पादाव् अवनेनिजे

pūrvam anyam aparam anyam pādāv avanenije

8.27.8.4

देवा राष्ट्रस्य गुप्त्या अभयस्यावरुद्ध्यै

devā rāṣṭrasya guptyā abhayasyāvaruddhyai

8.27.9

आपः पादावनेजनीर् द्विषन्तं निर्दहन्तु मे

āpaḥ pādāvanejanīr dviṣantaṃ nirdahantu me

8.28.1

अथातो ब्रह्मनः परिमरो यो ह वै ब्रह्मणः परिमरं वेद पर्य् एनं द्विषन्तो भ्रातृव्याः परि सपत्ना म्रियन्ते

athāto brahmanaḥ parimaro yo ha vai brahmaṇaḥ parimaraṃ veda pary enaṃ dviṣanto bhrātṛvyāḥ pari sapatnā mriyante

8.28.2

अयं वै ब्रह्म यो ऽयम् पवते तम् एताः पञ्च देवताः परिम्रियन्ते विद्युद् वृष्टिश् चन्द्रमा आदित्यो ऽग्निः

ayaṃ vai brahma yo 'yam pavate tam etāḥ pañca devatāḥ parimriyante vidyud vṛṣṭiś candramā ādityo 'gniḥ

8.28.3

विद्युद् वै विद्युत्य वृष्टिम् अनुप्रविशति सान्तर्धीयते तां न निर्जानन्ति

vidyud vai vidyutya vṛṣṭim anupraviśati sāntardhīyate tāṃ na nirjānanti

8.28.4

यदा वै म्रियते ऽथान्तर्धीयते ऽथैनां न निर्जानन्ति

yadā vai mriyate 'thāntardhīyate 'thaināṃ na nirjānanti

8.28.5

स ब्रूयाद् विद्युतो मरणे द्विषन् मे म्रियतां सो ऽन्तर्धीयतां तम् मा निर्ज्ञासिषुर् इति

sa brūyād vidyuto maraṇe dviṣan me mriyatāṃ so 'ntardhīyatāṃ tam mā nirjñāsiṣur iti

8.28.6

क्षिप्रं हैवैनं न निर्जानन्ति

kṣipraṃ haivainaṃ na nirjānanti

8.28.7

वृष्टिर् वै वृष्ट्वा चन्द्रमसम् अनुप्रविशति सान्तर्धीयते तां न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाद् वृष्टेर् मरणे द्विषन् मे म्रियतां सो ऽन्तर्धीयतां तम् मा निर्ज्ञासिषुर् इति क्षिप्रं हैवैनं न निर्जानन्ति

vṛṣṭir vai vṛṣṭvā candramasam anupraviśati sāntardhīyate tāṃ na nirjānanti yadā vai mriyate 'thāntardhīyate 'thainaṃ na nirjānanti sa brūyād vṛṣṭer maraṇe dviṣan me mriyatāṃ so 'ntardhīyatāṃ tam mā nirjñāsiṣur iti kṣipraṃ haivainaṃ na nirjānanti

8.28.8

चन्द्रमा वा अमावास्यायाम् आदित्यम् अनुप्रविशति सोऽन्तर्धीयतां तं न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाच् चन्द्रमसो मरणे द्विषन् मे म्रियतां सो ऽन्तर्धीयतां तम् मा निर्ज्ञासिषुर् इति क्षिप्रं हैवैनं न निर्जानन्ति

candramā vā amāvāsyāyām ādityam anupraviśati so'ntardhīyatāṃ taṃ na nirjānanti yadā vai mriyate 'thāntardhīyate 'thainaṃ na nirjānanti sa brūyāc candramaso maraṇe dviṣan me mriyatāṃ so 'ntardhīyatāṃ tam mā nirjñāsiṣur iti kṣipraṃ haivainaṃ na nirjānanti

8.28.9

आदित्यो वा अस्तं यन्न् अग्निम् अनुप्रविशति सो ऽन्तर्धीयते तं न निर्जानन्ति यदा वै म्रियते ऽथान्तर्धीयते ऽथैनम् न निर्जानन्ति स ब्रूयाद् आदित्यस्य मरणे द्विषन् मे म्रियतां सो ऽन्तर्धीयतां तम् मा निर्ज्ञासिषुर् इति क्षिप्रं हैवैनं न निर्जानन्ति

ādityo vā astaṃ yann agnim anupraviśati so 'ntardhīyate taṃ na nirjānanti yadā vai mriyate 'thāntardhīyate 'thainam na nirjānanti sa brūyād ādityasya maraṇe dviṣan me mriyatāṃ so 'ntardhīyatāṃ tam mā nirjñāsiṣur iti kṣipraṃ haivainaṃ na nirjānanti

8.28.10

अग्निर् वा उद्वान् वायुम् अनुप्रविशति सो ऽन्तर्धीयते तं न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाद् अग्नेर् मरणे द्विषन् मे म्रियतां सो ऽन्तर्धीयतां तम् मा निर्ज्ञासिषुर् इति क्षिप्रं हैवैनं न निर्जानन्ति

agnir vā udvān vāyum anupraviśati so 'ntardhīyate taṃ na nirjānanti yadā vai mriyate 'thāntardhīyate 'thainaṃ na nirjānanti sa brūyād agner maraṇe dviṣan me mriyatāṃ so 'ntardhīyatāṃ tam mā nirjñāsiṣur iti kṣipraṃ haivainaṃ na nirjānanti

8.28.11

ता वा एता देवता अत एव पुनर् जायन्ते

tā vā etā devatā ata eva punar jāyante

8.28.12

वायोर् अग्निर् जायते प्राणाद्धि बलान् मथ्यमानो ऽधिजायते तं दृष्ट्वा ब्रूयाद् अग्निर् जायताम् मा मे द्विषञ् जन्य् अत एव पराङ् प्रजिघ्यत्व् इति अतो हैव

vāyor agnir jāyate prāṇāddhi balān mathyamāno 'dhijāyate taṃ dṛṣṭvā brūyād agnir jāyatām mā me dviṣañ jany ata eva parāṅ prajighyatv iti ato haiva

8.28.13

अग्नेर् वा आदित्यो जायते तं दृष्ट्वा ब्रूयाद् आदित्यो जायताम् मा मे द्विषञ् जन्य् अत एव पराङ् प्रजिघ्यत्व् इत्य् अतो हैव

agner vā ādityo jāyate taṃ dṛṣṭvā brūyād ādityo jāyatām mā me dviṣañ jany ata eva parāṅ prajighyatv ity ato haiva

8.28.14

आदित्याद् वै चन्द्रमा जायते तं दृष्ट्वा ब्रूयाच् चन्द्रमा जायताम् मा मे द्विषञ् जन्य् अत एव पराङ् प्रजिघ्यत्व् इति अतो हैव

ādityād vai candramā jāyate taṃ dṛṣṭvā brūyāc candramā jāyatām mā me dviṣañ jany ata eva parāṅ prajighyatv iti ato haiva

8.28.15

चन्द्रमसो वै वृष्टिर् जायते तां दृष्ट्वा ब्रूयाद् वृष्टिर् जायताम् मा मे द्विषञ् जन्य् अत एव पराङ् प्रजिघ्यत्व् इत्य् अतो हैव

candramaso vai vṛṣṭir jāyate tāṃ dṛṣṭvā brūyād vṛṣṭir jāyatām mā me dviṣañ jany ata eva parāṅ prajighyatv ity ato haiva

8.28.16

वृष्टेर् वै विद्युज् जायते तां दृष्ट्वा ब्रूयाद् विद्युज् जायताम् मा मे द्विषञ् जन्य् अत एव पराङ् प्रजिघ्यत्व् इत्य् अतो हैव

vṛṣṭer vai vidyuj jāyate tāṃ dṛṣṭvā brūyād vidyuj jāyatām mā me dviṣañ jany ata eva parāṅ prajighyatv ity ato haiva

Aitareyabrāhmaṇa