8.20.1

इन्द्रियं वा एतद् अस्मिंल्लोके यद् दधि यद् दध्नाभिषिञ्चतीन्द्रियम् एवास्मिंस् तद् दधाति रसो वा एष ओषधिवनस्पतिषु यन् मधु यन् मध्वाभिषिञ्चति रसम् एवास्मिंस् तद् दधाति तेजो वा एतत् पशूनां यद् घृतं यद् घृतेनाभिषिञ्चति तेज एवास्मिंस् तद् दधात्य् अमृतं वा एतद् अस्मिंल्लोके यद् आपो यद् अद्भिर् अभिषिञ्चत्य् अमृतत्वम् एवास्मिंस् तद् दधाति

indriyaṃ vā etad asmiṃlloke yad dadhi yad dadhnābhiṣiñcatīndriyam evāsmiṃs tad dadhāti raso vā eṣa oṣadhivanaspatiṣu yan madhu yan madhvābhiṣiñcati rasam evāsmiṃs tad dadhāti tejo vā etat paśūnāṃ yad ghṛtaṃ yad ghṛtenābhiṣiñcati teja evāsmiṃs tad dadhāty amṛtaṃ vā etad asmiṃlloke yad āpo yad adbhir abhiṣiñcaty amṛtatvam evāsmiṃs tad dadhāti

8.20.2

सो ऽभिषिक्तो ऽभिषेक्त्रे ब्राह्मणाय हिरण्यं दद्यात् सहस्रं दद्यात् क्षेत्रं चतुष्पाद् दद्याद् अथाप्य् आहुर् असंख्यातम् एवापरिमितं दद्याद् अपरिमितो वै क्षत्रियो ऽपरिमितस्यावरुद्ध्या इति

so 'bhiṣikto 'bhiṣektre brāhmaṇāya hiraṇyaṃ dadyāt sahasraṃ dadyāt kṣetraṃ catuṣpād dadyād athāpy āhur asaṃkhyātam evāparimitaṃ dadyād aparimito vai kṣatriyo 'parimitasyāvaruddhyā iti

8.20.3

अथास्मै सुराकंसं हस्त आदधाति स्वादिष्ठया मदिष्ठया पवस्व सोम धारया इन्द्राय पातवे सुत इति

athāsmai surākaṃsaṃ hasta ādadhāti svādiṣṭhayā madiṣṭhayā pavasva soma dhārayā indrāya pātave suta iti

8.20.4

ताम् पिबेद् यद् अत्र शिष्टं रसिनः सुतस्य यद् इन्द्रो अपिबच्छचीभिः इदं तद् अस्य मनसा शिवेन सोमं राजानम् इह भक्षयामि अभि त्वा वृषभा सुते सुतं सृजामि पीतये तृम्प व्यश्नुही मदम् इति

tām pibed yad atra śiṣṭaṃ rasinaḥ sutasya yad indro apibacchacībhiḥ idaṃ tad asya manasā śivena somaṃ rājānam iha bhakṣayāmi abhi tvā vṛṣabhā sute sutaṃ sṛjāmi pītaye tṛmpa vyaśnuhī madam iti

8.20.5

यो ह वाव सोमपीथः सुरायाम् प्रविष्टः स हैव तेनैन्द्रेण महाभिषेकेणाभिषिक्तस्य क्षत्रियस्य भक्षितो भवति न सुरा

yo ha vāva somapīthaḥ surāyām praviṣṭaḥ sa haiva tenaindreṇa mahābhiṣekeṇābhiṣiktasya kṣatriyasya bhakṣito bhavati na surā

8.20.6

ताम् पीत्वाभिमन्त्रयेतापाम सोमं शं नो भवेति

tām pītvābhimantrayetāpāma somaṃ śaṃ no bhaveti

8.20.7

तद् यथैवादः प्रियः पुत्रः पितरम् प्रिया वा जाया पतिं सुखं शिवम् उपस्पृशत्य् आ विस्रस एवं हैवैतेनैन्द्रेण महाभिषेकेणाभिषिक्तस्य क्षत्रियस्य सुरा वा सोमो वान्यद् वान्नाद्यं सुखं शिवम् उपस्पृशत्य् आ विस्रसः

tad yathaivādaḥ priyaḥ putraḥ pitaram priyā vā jāyā patiṃ sukhaṃ śivam upaspṛśaty ā visrasa evaṃ haivaitenaindreṇa mahābhiṣekeṇābhiṣiktasya kṣatriyasya surā vā somo vānyad vānnādyaṃ sukhaṃ śivam upaspṛśaty ā visrasaḥ

8.21.1

एतेन ह वा ऐन्द्रेन महाभिषेकेण तुरः कावषेयो जनमेजयम् पारिक्षितम् अभिषिषेच तस्माद् उ जनमेजयः पारिक्षितः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindrena mahābhiṣekeṇa turaḥ kāvaṣeyo janamejayam pārikṣitam abhiṣiṣeca tasmād u janamejayaḥ pārikṣitaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.2

तद् एषाभि यज्ञगाथा गीयते

tad eṣābhi yajñagāthā gīyate

8.21.3

आसन्दीवति धान्यादं रुक्मिणं हरितस्रजम् अश्वम् बबन्ध सारङ्गं देवेभ्यो जनमेजय इति

āsandīvati dhānyādaṃ rukmiṇaṃ haritasrajam aśvam babandha sāraṅgaṃ devebhyo janamejaya iti

8.21.4

एतेन ह वा ऐन्द्रेण महाभिषेकेण च्यवनो भार्गवः शार्यातम् मानवम् अभिषिषेच तस्माद् उ शार्यातो मानवः समन्तं सर्वतः पृथिवीं जयन् परीयायाश्वेन च मेध्येनेजे देवानां हापि सत्रे गृहपतिर् आस

etena ha vā aindreṇa mahābhiṣekeṇa cyavano bhārgavaḥ śāryātam mānavam abhiṣiṣeca tasmād u śāryāto mānavaḥ samantaṃ sarvataḥ pṛthivīṃ jayan parīyāyāśvena ca medhyeneje devānāṃ hāpi satre gṛhapatir āsa

8.21.5

एतेन ह वा ऐन्द्रेण महाभिषेकेण सोमशुष्मा वाजरत्नायनः शतानीकं सात्राजितम् अभिषिषेच तस्माद् उ शतानीकः सात्राजितः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa somaśuṣmā vājaratnāyanaḥ śatānīkaṃ sātrājitam abhiṣiṣeca tasmād u śatānīkaḥ sātrājitaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.6

एतेन ह वा ऐन्द्रेण महाभिषेकेण पर्वतनारदाव् आम्बाष्ठ्यम् अभिषिषिचतुस् तस्माद् व् आम्बाष्ठ्यः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa parvatanāradāv āmbāṣṭhyam abhiṣiṣicatus tasmād v āmbāṣṭhyaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.7

एतेन ह वा ऐन्द्रेण महाभिषेकेण पर्वतनारदौ युधांश्रौष्टिम् औग्रसैन्यम् अभिषिषिचतुस् तस्माद् उ युधांश्रौष्टिर् औग्रसैन्यः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa parvatanāradau yudhāṃśrauṣṭim augrasainyam abhiṣiṣicatus tasmād u yudhāṃśrauṣṭir augrasainyaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.8

एतेन ह वा ऐन्द्रेण महाभिषेकेण कश्यपो विश्वकर्माणम् भौवनम् अभिषिषेच तस्माद् उ विश्वकर्मा भौवनः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa kaśyapo viśvakarmāṇam bhauvanam abhiṣiṣeca tasmād u viśvakarmā bhauvanaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.9

भूमिर् ह जगाव् इत्य् उदाहरन्ति

bhūmir ha jagāv ity udāharanti

8.21.10

न मा मर्त्यः कश्चन दातुम् अर्हति विश्वकर्मन् भौवन मां दिदासिथ निमङ्क्ष्ये ऽहं सलिलस्य मध्ये मोघस् त एष कश्यपायास संगर इति

na mā martyaḥ kaścana dātum arhati viśvakarman bhauvana māṃ didāsitha nimaṅkṣye 'haṃ salilasya madhye moghas ta eṣa kaśyapāyāsa saṃgara iti

8.21.11

एतेन ह वा ऐन्द्रेण महाभिषेकेण वसिष्ठः सुदासम् पैजवनम् अभिषिषेच तस्माद् उ सुदाः पैजवनः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa vasiṣṭhaḥ sudāsam paijavanam abhiṣiṣeca tasmād u sudāḥ paijavanaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.12

एतेन ह वा ऐन्द्रेण महाभिषेकेण संवर्त आङ्गिरसो मरुत्तम् अविक्षितम् अभिषिषेच तस्माद् उ मरुत्त आविक्षितः समन्तं सर्वतः पृथिवीं जयन् परीयायाश्वेन च मेध्येनेजे

etena ha vā aindreṇa mahābhiṣekeṇa saṃvarta āṅgiraso maruttam avikṣitam abhiṣiṣeca tasmād u marutta āvikṣitaḥ samantaṃ sarvataḥ pṛthivīṃ jayan parīyāyāśvena ca medhyeneje

8.21.13

तद् अप्य् एष श्लोको ऽभिगीतः

tad apy eṣa śloko 'bhigītaḥ

Aitareyabrāhmaṇa