8.14.1

अथैनम् प्राच्यां दिशि वसवो देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभिः साम्राज्याय

athainam prācyāṃ diśi vasavo devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhiḥ sāmrājyāya

8.14.2

तस्माद् एतस्याम् प्राच्यां दिशि ये केच प्राच्यानां राजानः साम्राज्यायैव ते ऽभिषिच्यन्ते सम्राﾱ इत्य् एनान् अभिषिक्तान् आचक्षत एताम् एव देवानां विहितिम् अनु

tasmād etasyām prācyāṃ diśi ye keca prācyānāṃ rājānaḥ sāmrājyāyaiva te 'bhiṣicyante samrāﾱ ity enān abhiṣiktān ācakṣata etām eva devānāṃ vihitim anu

8.14.3

अथैनं दक्षिणस्यां दिशि रुद्रा देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभिर् भौज्याय तस्माद् एतस्यां दक्षिणस्यां दिशि ये केच सत्वतां राजानो भौज्यायैव ते ऽभिषिच्यन्ते भोजेत्य् एनान् अभिषिक्तान् आचक्षत एताम् एव देवानां विहितिम् अन्व् अथैनम् प्रतीच्यां दिश्य् आदित्या देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभिः स्वाराज्याय तस्माद् एतस्याम् प्रतीच्यां दिशि ये केच नीच्यानां राजानो ये ऽपाच्यानां स्वाराज्यायैव ते ऽभिषिच्यन्ते स्वराﾱ इत्य् एनान् अभिषिक्तान् आचक्षत एताम् एव देवानां विहितिम् अन्व् अथैनम् उदीच्यां दिशि विश्वे देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभिर् वैराज्याय तस्माद् एतस्याम् उदीच्यां दिशि ये केच परेण हिमवन्तं जनपदा उत्तरकुरव उत्तरमद्रा इति वैराज्यायैव ते ऽभिषिच्यन्ते विराﾱ इत्य् एनान् अभिषिक्तान् आचक्षत एताम् एव देवानां विहितिम् अन्व् अथैनम् अस्यां ध्रुवायाम् मध्यमायाम् प्रतिष्ठायां दिशि साध्याश् चाप्त्याश् च देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभी राज्याय तस्माद् अस्यां ध्रुवायाम् मध्यमायाम् प्रतिष्ठायां दिशि ये केच कुरुपञ्चालानां राजानः सवशोशीनराणां राज्यायैव ते ऽभिषिच्यन्ते राजेत्य् एनान् अभिषिक्तान् आचक्षत एताम् एव देवानां विहितिम् अन्व् अथैनम् ऊर्ध्वायां दिशि मरुतश् चाङ्गिरसश् च देवाः षड्भिश् चैव पञ्चविंशैर् अहोभिर् अभ्यषिञ्चन्न् एतेन च तृचेनैतेन च यजुषैताभिश् च व्याहृतिभिः पारमेष्ठ्याय माहाराज्यायाधिपत्याय स्वावश्यायातिष्ठायेति स परमेष्ठी प्राजापत्यो ऽभवत्

athainaṃ dakṣiṇasyāṃ diśi rudrā devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhir bhaujyāya tasmād etasyāṃ dakṣiṇasyāṃ diśi ye keca satvatāṃ rājāno bhaujyāyaiva te 'bhiṣicyante bhojety enān abhiṣiktān ācakṣata etām eva devānāṃ vihitim anv athainam pratīcyāṃ diśy ādityā devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhiḥ svārājyāya tasmād etasyām pratīcyāṃ diśi ye keca nīcyānāṃ rājāno ye 'pācyānāṃ svārājyāyaiva te 'bhiṣicyante svarāﾱ ity enān abhiṣiktān ācakṣata etām eva devānāṃ vihitim anv athainam udīcyāṃ diśi viśve devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhir vairājyāya tasmād etasyām udīcyāṃ diśi ye keca pareṇa himavantaṃ janapadā uttarakurava uttaramadrā iti vairājyāyaiva te 'bhiṣicyante virāﾱ ity enān abhiṣiktān ācakṣata etām eva devānāṃ vihitim anv athainam asyāṃ dhruvāyām madhyamāyām pratiṣṭhāyāṃ diśi sādhyāś cāptyāś ca devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhī rājyāya tasmād asyāṃ dhruvāyām madhyamāyām pratiṣṭhāyāṃ diśi ye keca kurupañcālānāṃ rājānaḥ savaśośīnarāṇāṃ rājyāyaiva te 'bhiṣicyante rājety enān abhiṣiktān ācakṣata etām eva devānāṃ vihitim anv athainam ūrdhvāyāṃ diśi marutaś cāṅgirasaś ca devāḥ ṣaḍbhiś caiva pañcaviṃśair ahobhir abhyaṣiñcann etena ca tṛcenaitena ca yajuṣaitābhiś ca vyāhṛtibhiḥ pārameṣṭhyāya māhārājyāyādhipatyāya svāvaśyāyātiṣṭhāyeti sa parameṣṭhī prājāpatyo 'bhavat

8.14.4

स एतेन महाभिषेकेणाभिषिक्त इन्द्रः सर्वा जितीर् अजयत् सर्वांल्लोकान् अविन्दत् सर्वेषां देवानां श्रैष्ठ्यम् अतिष्ठाम् परमताम् अगच्छत् साम्राज्यम् भौज्यं स्वाराज्यं वैराज्यम् पारमेष्ठ्यं राज्यम् माहाराज्यम् आधिपत्यं जित्वास्मिंल्लोके स्वयम्भूः स्वराﾱ अमृतो ऽमुष्मिन् स्वर्गे लोके सर्वान् कामान् आप्त्वामृतः समभवत् समभवत्

sa etena mahābhiṣekeṇābhiṣikta indraḥ sarvā jitīr ajayat sarvāṃllokān avindat sarveṣāṃ devānāṃ śraiṣṭhyam atiṣṭhām paramatām agacchat sāmrājyam bhaujyaṃ svārājyaṃ vairājyam pārameṣṭhyaṃ rājyam māhārājyam ādhipatyaṃ jitvāsmiṃlloke svayambhūḥ svarāﾱ amṛto 'muṣmin svarge loke sarvān kāmān āptvāmṛtaḥ samabhavat samabhavat

8.15.1

स य इच्छेद् एवंवित् क्षत्रियम् अयं सर्वा जितीर् जयेतायं सर्वांल्लोकान् विन्देतायं सर्वेषां राज्ञां श्रैष्ठ्यम् अतिष्ठाम् परमतां गच्छेत साम्राज्यम् भौज्यं स्वाराज्यं वैराज्यम् पारमेष्ठ्यं राज्यम् माहाराज्यम् आधिपत्यम् अयं समन्तपर्यायी स्यात् सार्वभौमः सार्वायुष आन्ताद् आ परार्धात् पृथिव्यै समुद्रपर्यन्ताया एकराﾱ इति तं एतेनैन्द्रेण महाभिषेकेण क्षत्रियं शापयित्वा ऽभिषिञ्चेत्

sa ya icched evaṃvit kṣatriyam ayaṃ sarvā jitīr jayetāyaṃ sarvāṃllokān vindetāyaṃ sarveṣāṃ rājñāṃ śraiṣṭhyam atiṣṭhām paramatāṃ gaccheta sāmrājyam bhaujyaṃ svārājyaṃ vairājyam pārameṣṭhyaṃ rājyam māhārājyam ādhipatyam ayaṃ samantaparyāyī syāt sārvabhaumaḥ sārvāyuṣa āntād ā parārdhāt pṛthivyai samudraparyantāyā ekarāﾱ iti taṃ etenaindreṇa mahābhiṣekeṇa kṣatriyaṃ śāpayitvā 'bhiṣiñcet

8.15.2

यां च रात्रीम् अजायथा यां च प्रेतासि तद् उभयम् अन्तरेणेष्टापूर्तं ते लोकं सुकृतम् आयुः प्रजां वृञ्जीय यदि मे द्रुह्येर् इति

yāṃ ca rātrīm ajāyathā yāṃ ca pretāsi tad ubhayam antareṇeṣṭāpūrtaṃ te lokaṃ sukṛtam āyuḥ prajāṃ vṛñjīya yadi me druhyer iti

8.15.3

स य इच्छेद् एवंवित् क्षत्रियो ऽहं सर्वा जितीर् जयेयम् अहं सर्वांल्लोकान् विन्देयम् अहं सर्वेषां राज्ञां श्रैष्ठ्यम् अतिष्ठाम् परमतां गच्छेयं साम्राज्यम् भौज्यं स्वाराज्यम् वैराज्यम् पारमेष्ठ्यं राज्यम् माहाराज्यम् आधिपत्यम् अहं समन्तपर्यायी स्यां सार्वभौमः सार्वायुष आन्ताद् आ परार्धात् पृथिव्यै समुद्रपर्यन्ताया एकराﾱ इति स न विचिकित्सेत् स ब्रूयात् सह श्रद्धया यां च रात्रीम् अजाये ऽहं यां च प्रेतास्मि तद् उभयम् अन्तरेणेष्टापूर्तम् मे लोकं सुकृतम् आयुः प्रजां वृञ्जीथा यदि ते द्रुह्येयम् इति

sa ya icched evaṃvit kṣatriyo 'haṃ sarvā jitīr jayeyam ahaṃ sarvāṃllokān vindeyam ahaṃ sarveṣāṃ rājñāṃ śraiṣṭhyam atiṣṭhām paramatāṃ gaccheyaṃ sāmrājyam bhaujyaṃ svārājyam vairājyam pārameṣṭhyaṃ rājyam māhārājyam ādhipatyam ahaṃ samantaparyāyī syāṃ sārvabhaumaḥ sārvāyuṣa āntād ā parārdhāt pṛthivyai samudraparyantāyā ekarāﾱ iti sa na vicikitset sa brūyāt saha śraddhayā yāṃ ca rātrīm ajāye 'haṃ yāṃ ca pretāsmi tad ubhayam antareṇeṣṭāpūrtam me lokaṃ sukṛtam āyuḥ prajāṃ vṛñjīthā yadi te druhyeyam iti

8.16.1

अथ ततो ब्रूयाच् चतुष्टयानि वानस्पत्यानि संभरत नैयग्रोधान्य् औदुम्बराण्य् आश्वत्थानि प्लाक्षाणीति

atha tato brūyāc catuṣṭayāni vānaspatyāni saṃbharata naiyagrodhāny audumbarāṇy āśvatthāni plākṣāṇīti

8.16.2

क्षत्रं वा एतद् वनस्पतीनां यन् न्यग्रोधो यन् नैयग्रोधानि संभरन्ति क्षत्रम् एवास्मिंस् तद् दधाति भौज्यं वा एतद् वनस्पतीनां यद् उदुम्बरो यद् औदुम्बराणि संभरन्ति भौज्यम् एवास्मिंस् तद् दधाति साम्राज्यं वा एतद् वनस्पतीनां यद् अश्वत्थो यद् आश्वत्थानि संभरन्ति साम्राज्यम् एवास्मिंस् तद् दधाति स्वाराज्यं च ह वा एतद् वैराज्यं च वनस्पतीनां यत् प्लक्षो यत् प्लाक्षाणि संभरन्ति स्वाराज्यवैराज्ये एवास्मिंस् तद् दधाति

kṣatraṃ vā etad vanaspatīnāṃ yan nyagrodho yan naiyagrodhāni saṃbharanti kṣatram evāsmiṃs tad dadhāti bhaujyaṃ vā etad vanaspatīnāṃ yad udumbaro yad audumbarāṇi saṃbharanti bhaujyam evāsmiṃs tad dadhāti sāmrājyaṃ vā etad vanaspatīnāṃ yad aśvattho yad āśvatthāni saṃbharanti sāmrājyam evāsmiṃs tad dadhāti svārājyaṃ ca ha vā etad vairājyaṃ ca vanaspatīnāṃ yat plakṣo yat plākṣāṇi saṃbharanti svārājyavairājye evāsmiṃs tad dadhāti

8.16.3

अथ ततो ब्रूयाच् चतुष्टयान्य् औषधानि संभरत तोक्मकृतानि व्रीहीणाम् महाव्रीहीणाम् प्रियंगूनां यवानाम् इति

atha tato brūyāc catuṣṭayāny auṣadhāni saṃbharata tokmakṛtāni vrīhīṇām mahāvrīhīṇām priyaṃgūnāṃ yavānām iti

8.16.4

क्षत्रं वा एतद् ओषधीनां यद् व्रीहयो यद् व्रीहीणां तोक्म संभरन्ति क्षत्रम् एवास्मिंस् तद् दधाति साम्राज्यं वा एतद् ओषधीनां यन् महाव्रीहयो यन् महाव्रीहीणां तोक्म संभरन्ति साम्राज्यम् एवास्मिंस् तद् दधाति भौज्यं वा एतद् ओषधीनां यत् प्रियंगवो यत् प्रियंगूनां तोक्म संभरन्ति भौज्यम् एवास्मिंस् तद् दधाति सैनान्यं वा एतद् ओषधीनां यद् यवा यद् यवानां तोक्म संभरन्ति सैनान्यम् एवास्मिंस् तद् दधाति

kṣatraṃ vā etad oṣadhīnāṃ yad vrīhayo yad vrīhīṇāṃ tokma saṃbharanti kṣatram evāsmiṃs tad dadhāti sāmrājyaṃ vā etad oṣadhīnāṃ yan mahāvrīhayo yan mahāvrīhīṇāṃ tokma saṃbharanti sāmrājyam evāsmiṃs tad dadhāti bhaujyaṃ vā etad oṣadhīnāṃ yat priyaṃgavo yat priyaṃgūnāṃ tokma saṃbharanti bhaujyam evāsmiṃs tad dadhāti sainānyaṃ vā etad oṣadhīnāṃ yad yavā yad yavānāṃ tokma saṃbharanti sainānyam evāsmiṃs tad dadhāti

8.17.1

अथास्मा औदुम्बरीम् आसन्दीं संभरन्ति तस्या उक्तम् ब्राह्मणम् औदुम्बरश् चमसो वा पात्री वोदुम्बरशाखा तान् एतान् सम्भारान् संभृत्यौदुम्बर्याम् पात्र्यां वा चमसे वा समावपेयुस् तेषु समोप्तेषु दधि मधु सर्पिर् आतपवर्ष्या आपो ऽभ्यानीय प्रतिष्ठाप्यैताम् आसन्दीम् अभिमन्त्रयेत

athāsmā audumbarīm āsandīṃ saṃbharanti tasyā uktam brāhmaṇam audumbaraś camaso vā pātrī vodumbaraśākhā tān etān sambhārān saṃbhṛtyaudumbaryām pātryāṃ vā camase vā samāvapeyus teṣu samopteṣu dadhi madhu sarpir ātapavarṣyā āpo 'bhyānīya pratiṣṭhāpyaitām āsandīm abhimantrayeta

8.17.2

बृहच् च ते रथंतरं च पूर्वौ पादौ भवतां वैरूपं च वैराजं चापरौ शाक्वररैवते शीर्षण्ये नौधसं च कालेयं चानूच्ये ऋचः प्राचीनातानाः सामानि तिरश्चीनवाया यजूंष्य् अतीकाशा यश आस्तरणं श्रीर् उपबर्हणं सविता च ते बृहस्पतिश् च पूर्वौ पादौ धारयतां वायुश् च पूषा चापरौ मित्रावरुणौ शीर्षण्ये अश्विनाव् अनूच्ये इति

bṛhac ca te rathaṃtaraṃ ca pūrvau pādau bhavatāṃ vairūpaṃ ca vairājaṃ cāparau śākvararaivate śīrṣaṇye naudhasaṃ ca kāleyaṃ cānūcye ṛcaḥ prācīnātānāḥ sāmāni tiraścīnavāyā yajūṃṣy atīkāśā yaśa āstaraṇaṃ śrīr upabarhaṇaṃ savitā ca te bṛhaspatiś ca pūrvau pādau dhārayatāṃ vāyuś ca pūṣā cāparau mitrāvaruṇau śīrṣaṇye aśvināv anūcye iti

8.17.3

अथैनं एताम् आसन्दीम् आरोहयेत्

athainaṃ etām āsandīm ārohayet

8.17.4

वसवस् त्वा गायत्रेण छन्दसा त्रिवृता स्तोमेन रथंतरेण साम्नारोहन्तु तान् अन्व् आरोह साम्राज्याय रुद्रास् त्वा त्रैष्टुभेन छन्दसा पञ्चदशेन स्तोमेन बृहता साम्नारोहन्तु तान् अन्व् आरोह भौज्यायादित्यास् त्वा जागतेन छन्दसा सप्तदशेन स्तोमेन वैरूपेण साम्नारोहन्तु तान् अन्व् आरोह स्वाराज्याय विश्वे त्वा देवा आनुष्टुभेन छन्दसैकविंशेन स्तोमेन वैराजेन साम्नारोहन्तु तान् अन्व् आरोह वैराज्याय मरुतश् च त्वाङ्गिरसश् च देवा अतिछन्दसा छन्दसा त्रयस्त्रिंशेन स्तोमेन रैवतेन साम्नारोहन्तु तान् अन्व् आरोह पारमेष्ठ्याय साध्याश् च त्वाप्त्याश् च देवाः पाङ्क्तेन छन्दसा त्रिणवेन स्तोमेन शाक्वरेण साम्नारोहन्तु तान् अन्व् आरोह राज्याय माहाराज्यायाधिपत्याय स्वावश्यायातिष्ठायारोहेत्य् एताम् आसन्दीम् आरोहयेत्

vasavas tvā gāyatreṇa chandasā trivṛtā stomena rathaṃtareṇa sāmnārohantu tān anv āroha sāmrājyāya rudrās tvā traiṣṭubhena chandasā pañcadaśena stomena bṛhatā sāmnārohantu tān anv āroha bhaujyāyādityās tvā jāgatena chandasā saptadaśena stomena vairūpeṇa sāmnārohantu tān anv āroha svārājyāya viśve tvā devā ānuṣṭubhena chandasaikaviṃśena stomena vairājena sāmnārohantu tān anv āroha vairājyāya marutaś ca tvāṅgirasaś ca devā atichandasā chandasā trayastriṃśena stomena raivatena sāmnārohantu tān anv āroha pārameṣṭhyāya sādhyāś ca tvāptyāś ca devāḥ pāṅktena chandasā triṇavena stomena śākvareṇa sāmnārohantu tān anv āroha rājyāya māhārājyāyādhipatyāya svāvaśyāyātiṣṭhāyārohety etām āsandīm ārohayet

8.17.5

तम् एतस्याम् आसन्द्याम् आसीनं राजकर्तारो ब्रूयुर् न वा अनभ्युत्क्रुष्टः क्षत्रियो वीर्यं कर्तुम् अर्हत्य् अभ्य् एनम् उत्क्रोशामेति तथेति तं राजकर्तारो ऽभ्युत्क्रोशन्तीमं जना अभ्युत्क्रोशत सम्राजं साम्राज्यम् भोजम् भोजपितरं स्वराजं स्वाराज्यं विराजं वैराज्यम् परमेष्ठिनम् पारमेष्ठ्यं राजानां राजपितरं क्षत्रम् अजनि क्षत्रियो ऽजनि विश्वस्य भूतस्याधिपतिर् अजनि विशाम् अत्ताजन्य् अमित्राणां हन्ताजनि ब्राह्मणानाम् गोप्ताजनि धर्मस्य गोप्ताजनीति

tam etasyām āsandyām āsīnaṃ rājakartāro brūyur na vā anabhyutkruṣṭaḥ kṣatriyo vīryaṃ kartum arhaty abhy enam utkrośāmeti tatheti taṃ rājakartāro 'bhyutkrośantīmaṃ janā abhyutkrośata samrājaṃ sāmrājyam bhojam bhojapitaraṃ svarājaṃ svārājyaṃ virājaṃ vairājyam parameṣṭhinam pārameṣṭhyaṃ rājānāṃ rājapitaraṃ kṣatram ajani kṣatriyo 'jani viśvasya bhūtasyādhipatir ajani viśām attājany amitrāṇāṃ hantājani brāhmaṇānām goptājani dharmasya goptājanīti

8.17.6

तम् अभ्युत्क्रुष्टम् एवंविद् अभिषेक्ष्यन्न् एतयर्चाभिमन्त्रयेत

tam abhyutkruṣṭam evaṃvid abhiṣekṣyann etayarcābhimantrayeta

8.18.1

निषसाद धृतव्रतो वरुणः पस्त्यास्व् आ साम्राज्याय भौज्याय स्वाराज्याय वैराज्याय पारमेष्ठ्याय राज्याय माहाराज्यायाधिपत्याय स्वावश्यायातिष्ठाय सुक्रतुर् इति तम् एतस्याम् आसन्द्याम् आसीनम् एवंवित् पुरस्तात् तिष्ठन् प्रत्यङ्मुख औदुम्बर्यार्द्रया शाखया सपलाशया जातरूपमयेन च पवित्रेणान्तर्धायाभिषिञ्चतीमा आपः शिवतमा इत्य् एतेन तृचेन देवस्य त्वेति च यजुषा भूर् भुवः स्वर् इत्य् एताभिश् च व्याहृतिभिः

niṣasāda dhṛtavrato varuṇaḥ pastyāsv ā sāmrājyāya bhaujyāya svārājyāya vairājyāya pārameṣṭhyāya rājyāya māhārājyāyādhipatyāya svāvaśyāyātiṣṭhāya sukratur iti tam etasyām āsandyām āsīnam evaṃvit purastāt tiṣṭhan pratyaṅmukha audumbaryārdrayā śākhayā sapalāśayā jātarūpamayena ca pavitreṇāntardhāyābhiṣiñcatīmā āpaḥ śivatamā ity etena tṛcena devasya tveti ca yajuṣā bhūr bhuvaḥ svar ity etābhiś ca vyāhṛtibhiḥ

8.19.1

प्राच्यां त्वा दिशि वसवो देवाः षड्भिश् चैव पञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभिः साम्राज्याय दक्षिणस्यां त्वा दिशि रुद्रा देवाः षड्भिश् चैव पञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभिर् भौज्याय प्रतीच्यां त्वा दिश्य् आदित्या देवाः षड्भिश् चैव पञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभिः स्वाराज्यायोदीच्यां त्वा दिशि विश्वे देवाः षड्भिश् चैव पञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभिर् वैराज्यायोर्ध्वायां त्वा दिशि मरुतश् चाङ्गिरसश् च देवाः षड्भिश् चैव पञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभिः पारमेष्ठ्यायास्यां त्वा ध्रुवायां मध्यमायाम् प्रतिष्ठायां दिशि साध्याश् चाप्त्याश् च देवाः षड्भिश् चैवपञ्चविंशैर् अहोभिर् अभिषिञ्चन्त्व् एतेन च तृचेनैतेन च यजुषैताभिश् च व्याहृतिभी राज्याय माहाराज्याधिपत्याय स्वावश्यायाधिष्ठायेति स परमेष्ठी प्राजापत्यो भवति

prācyāṃ tvā diśi vasavo devāḥ ṣaḍbhiś caiva pañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhiḥ sāmrājyāya dakṣiṇasyāṃ tvā diśi rudrā devāḥ ṣaḍbhiś caiva pañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhir bhaujyāya pratīcyāṃ tvā diśy ādityā devāḥ ṣaḍbhiś caiva pañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhiḥ svārājyāyodīcyāṃ tvā diśi viśve devāḥ ṣaḍbhiś caiva pañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhir vairājyāyordhvāyāṃ tvā diśi marutaś cāṅgirasaś ca devāḥ ṣaḍbhiś caiva pañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhiḥ pārameṣṭhyāyāsyāṃ tvā dhruvāyāṃ madhyamāyām pratiṣṭhāyāṃ diśi sādhyāś cāptyāś ca devāḥ ṣaḍbhiś caivapañcaviṃśair ahobhir abhiṣiñcantv etena ca tṛcenaitena ca yajuṣaitābhiś ca vyāhṛtibhī rājyāya māhārājyādhipatyāya svāvaśyāyādhiṣṭhāyeti sa parameṣṭhī prājāpatyo bhavati

8.19.2

स एतेनैन्द्रेन महाभिषेकेणाभिषिक्तः क्षत्रियः सर्वा जितीर् जयति सर्वांल् लोकान् विन्दति सर्वेषां राज्ञां श्रैष्ठ्यम् अतिष्ठाम् परमतां गच्छति साम्राज्यम् भौज्यं स्वाराज्यम् पारमेष्ठ्यं राज्यम् माहाराज्यम् आधिपत्यं जित्वास्मिंल्लोके स्वयम्भूः स्वराﾱ अमृतो ऽमुष्मिन् स्वर्गे लोके सर्वान् कामान् आप्त्वामृतः सम्भवति यम् एतेनैन्द्रेण महाभिषेकेण क्षत्रियं शापयित्वाभिषिञ्चति

sa etenaindrena mahābhiṣekeṇābhiṣiktaḥ kṣatriyaḥ sarvā jitīr jayati sarvāṃl lokān vindati sarveṣāṃ rājñāṃ śraiṣṭhyam atiṣṭhām paramatāṃ gacchati sāmrājyam bhaujyaṃ svārājyam pārameṣṭhyaṃ rājyam māhārājyam ādhipatyaṃ jitvāsmiṃlloke svayambhūḥ svarāﾱ amṛto 'muṣmin svarge loke sarvān kāmān āptvāmṛtaḥ sambhavati yam etenaindreṇa mahābhiṣekeṇa kṣatriyaṃ śāpayitvābhiṣiñcati

Aitareyabrāhmaṇa