8.9.1

अथोदुम्बरशाखाम् अभि प्रत्यवरोहत्य् ऊर्ग् वा अन्नाद्यम् उदुम्बर ऊर्जम् एव तद् अन्नाद्यम् अभि प्रत्यवरोहति

athodumbaraśākhām abhi pratyavarohaty ūrg vā annādyam udumbara ūrjam eva tad annādyam abhi pratyavarohati

8.9.2

उपर्य् एवासीनो भूमौ पादौ प्रतिष्ठाप्य प्रत्यवरोहम् आह

upary evāsīno bhūmau pādau pratiṣṭhāpya pratyavaroham āha

8.9.3

प्रतितिष्ठामि द्यावापृथिव्योः प्रतितिष्ठामि प्राणापानयोः प्रतितिष्ठाम्य् अहोरात्रयोः प्रतितिष्ठाम्य् अन्नपानयोः प्रति ब्रह्मन् प्रति क्षत्रे प्रत्य् एषु त्रिषु लोकेषु तिष्ठामीति

pratitiṣṭhāmi dyāvāpṛthivyoḥ pratitiṣṭhāmi prāṇāpānayoḥ pratitiṣṭhāmy ahorātrayoḥ pratitiṣṭhāmy annapānayoḥ prati brahman prati kṣatre praty eṣu triṣu lokeṣu tiṣṭhāmīti

8.9.4

अन्ततः सर्वेणात्मना प्रतितिष्ठति सर्वस्मिन् ह वा एतस्मिन् प्रतितिष्ठत्य् उत्तरोत्तरिणीं ह श्रियम् अश्नुते ऽश्नुते ह प्रजानाम् ऐश्वर्यम् आधिपत्यं य एवम् एतेन पुनरभिषेकेणाभिषिक्तः क्षत्रियः प्रत्यवरोहति

antataḥ sarveṇātmanā pratitiṣṭhati sarvasmin ha vā etasmin pratitiṣṭhaty uttarottariṇīṃ ha śriyam aśnute 'śnute ha prajānām aiśvaryam ādhipatyaṃ ya evam etena punarabhiṣekeṇābhiṣiktaḥ kṣatriyaḥ pratyavarohati

8.9.5

एतेन प्रत्यवरोहेण प्रत्यवरूह्योपस्थं कृत्वा प्राङ् आसीनो नमो ब्रह्मणे नमो ब्रह्मणे नमो ब्रह्मण इति त्रिष्कृत्वो ब्रह्मणे नमस्कृत्य वरं ददामि जित्या अभिजित्यै विजित्यै संजित्या इति वाचं विसृजते

etena pratyavaroheṇa pratyavarūhyopasthaṃ kṛtvā prāṅ āsīno namo brahmaṇe namo brahmaṇe namo brahmaṇa iti triṣkṛtvo brahmaṇe namaskṛtya varaṃ dadāmi jityā abhijityai vijityai saṃjityā iti vācaṃ visṛjate

8.9.6

स यन् नमो ब्रह्मणे नमो ब्रह्मणे नमो ब्रह्मण इति त्रिष्कृत्वो ब्रह्मणे नमस्करोति ब्रह्मण एव तत् क्षत्रं वशम् एति तद् यत्र वै ब्रह्मणः क्षत्रं वशम् एति तद् राष्ट्रं समृद्धं तद् वीरवद् आ हास्मिन् वीरो जायते

sa yan namo brahmaṇe namo brahmaṇe namo brahmaṇa iti triṣkṛtvo brahmaṇe namaskaroti brahmaṇa eva tat kṣatraṃ vaśam eti tad yatra vai brahmaṇaḥ kṣatraṃ vaśam eti tad rāṣṭraṃ samṛddhaṃ tad vīravad ā hāsmin vīro jāyate

8.9.7

अथ यद् वरं ददामि जित्या अभिजित्यै विजित्यै संजित्या इति वाचं विसृजत एतद् वै वाचो जितं यद् ददामीत्य् आह यद् एव वाचो जितम् तन् म इदम् अनु कर्म संतिष्ठाता इति

atha yad varaṃ dadāmi jityā abhijityai vijityai saṃjityā iti vācaṃ visṛjata etad vai vāco jitaṃ yad dadāmīty āha yad eva vāco jitam tan ma idam anu karma saṃtiṣṭhātā iti

8.9.8

विसृज्य वाचम् उपोत्थायाहवनीये समिधम् अभ्यादधाति

visṛjya vācam upotthāyāhavanīye samidham abhyādadhāti

8.9.9

समिद् असि सम् व् एङ्क्ष्वेन्द्रियेण वीर्येण

samid asi sam v eṅkṣvendriyeṇa vīryeṇa

8.9.10

इन्द्रियेणैव तद् वीर्येणात्मानम् अन्ततः समर्धयति

indriyeṇaiva tad vīryeṇātmānam antataḥ samardhayati

8.9.11

आधाय समिधं त्रीणि पदानि प्राङ् उदङ्ङ् अभ्युत्क्रामति

ādhāya samidhaṃ trīṇi padāni prāṅ udaṅṅ abhyutkrāmati

8.9.12

क्ﾱप्तिर् असि दिशाम् मयि देवेभ्यः कल्पत कल्पताम् मे योगक्षेमोऽभयम् मे ऽस्तु

kﾱptir asi diśām mayi devebhyaḥ kalpata kalpatām me yogakṣemo'bhayam me 'stu

8.9.13

इत्य् अपराजितां दिशम् उपतिष्ठते जितस्यैवापुनःपराजयाय तत् तद् इतीṁ

ity aparājitāṃ diśam upatiṣṭhate jitasyaivāpunaḥparājayāya tat tad itīṁ

8.10.1

देवासुरा वा एषु लोकेषु संयेतिरे त एतस्याम् प्राच्यां दिशि येतिरे तांस् ततो ऽसुरा अजयंस् ते दक्षिणस्यां दिशि येतिरे तांस् ततो ऽसुरा अजयंस् ते प्रतीच्यां दिशि येतिरे तांस् ततो ऽसुरा अजयंस् त उदीच्यां दिशि येतिरे तांस् ततो ऽसुरा अजयंस् त एतस्मिन्न् अवान्तरदेशे येतिरे य एष प्राङ् उदङ् ते ह ततो जिग्युः

devāsurā vā eṣu lokeṣu saṃyetire ta etasyām prācyāṃ diśi yetire tāṃs tato 'surā ajayaṃs te dakṣiṇasyāṃ diśi yetire tāṃs tato 'surā ajayaṃs te pratīcyāṃ diśi yetire tāṃs tato 'surā ajayaṃs ta udīcyāṃ diśi yetire tāṃs tato 'surā ajayaṃs ta etasminn avāntaradeśe yetire ya eṣa prāṅ udaṅ te ha tato jigyuḥ

8.10.2

तं यदि क्षत्रिय उपधावेत् सेनयोः समायत्योस् तथा मे कुरु यथाहम् इमां सेनां जयानीति स यदि तथेति ब्रूयाद् वनस्पते वीड्वङ्गो हि भूया इत्य् अस्य रथोपस्थम् अभिमृश्याथैनम् ब्रूयात्

taṃ yadi kṣatriya upadhāvet senayoḥ samāyatyos tathā me kuru yathāham imāṃ senāṃ jayānīti sa yadi tatheti brūyād vanaspate vīḍvaṅgo hi bhūyā ity asya rathopastham abhimṛśyāthainam brūyāt

8.10.3

आतिष्ठस्वैतां ते दिशम् अभिमुखः संनद्धो रथो ऽभिप्रवर्ततां स उदङ् स प्रत्यङ् स दक्षिणा स प्राङ् सो ऽभ्य् अमित्रं इति

ātiṣṭhasvaitāṃ te diśam abhimukhaḥ saṃnaddho ratho 'bhipravartatāṃ sa udaṅ sa pratyaṅ sa dakṣiṇā sa prāṅ so 'bhy amitraṃ iti

8.10.4

अभीवर्तेन हविषेत्य् एवैनम् आवर्तयेद् अथैनम् अन्वीक्षेताप्रतिरथेन शासेन सौपर्णेनेति

abhīvartena haviṣety evainam āvartayed athainam anvīkṣetāpratirathena śāsena sauparṇeneti

8.10.5

जयति ह तां सेनाम्

jayati ha tāṃ senām

8.10.6

यद्य् उ वा एनम् उपधावेत् संग्रामं संयतिष्यमाणस् तथा मे कुरु यथाहम् इमं संग्रामं संजयानीत्य् एतस्याम् एवैनं दिशि यातयेज् जयति ह तं संग्रामम्

yady u vā enam upadhāvet saṃgrāmaṃ saṃyatiṣyamāṇas tathā me kuru yathāham imaṃ saṃgrāmaṃ saṃjayānīty etasyām evainaṃ diśi yātayej jayati ha taṃ saṃgrāmam

8.10.7

यद्य् उ वा एनम् उपधावेद् राष्ट्राद् अपरुध्यमानस् तथा मे कुरु यथाहम् इदं राष्ट्रम् पुनर् अवगच्छानीत्य् एताम् एवैनं दिशम् उपनिष्क्रमयेत् तथा ह राष्ट्रम् पुनर् अवगच्छति

yady u vā enam upadhāved rāṣṭrād aparudhyamānas tathā me kuru yathāham idaṃ rāṣṭram punar avagacchānīty etām evainaṃ diśam upaniṣkramayet tathā ha rāṣṭram punar avagacchati

Aitareyabrāhmaṇa