8.7.5

देवस्य त्वा सवितुः प्रसवे ऽश्विनोर् बाहुभ्याम् पूष्णो हस्ताभ्याम् अग्नेस् तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्याय

devasya tvā savituḥ prasave 'śvinor bāhubhyām pūṣṇo hastābhyām agnes tejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāya

8.7.6

भूर् इति य इच्छेद् इमम् एव प्रत्य् अन्नम् अद्याद् इत्य् अथ य इच्छेद् द्विपुरुषम् भूर् भुव इत्य् अथ य इच्छेत् त्रिपुरुषं वाप्रतिमं वा भूर् भुवः स्वर् इति

bhūr iti ya icched imam eva praty annam adyād ity atha ya icched dvipuruṣam bhūr bhuva ity atha ya icchet tripuruṣaṃ vāpratimaṃ vā bhūr bhuvaḥ svar iti

8.7.7

तद्धैक आहुः सर्वाप्तिर् वा एषा यद् एता व्याहृतयो ऽतिसर्वेण हास्य परस्मै कृतम् भवतीति तम् एतेनाभिषिञ्चेद् देवस्य त्वा सवितुः प्रसवे ऽश्विनोर् बाहुभ्याम् पूष्णो हस्ताभ्याम् अग्नेस् तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्यायेति

taddhaika āhuḥ sarvāptir vā eṣā yad etā vyāhṛtayo 'tisarveṇa hāsya parasmai kṛtam bhavatīti tam etenābhiṣiñced devasya tvā savituḥ prasave 'śvinor bāhubhyām pūṣṇo hastābhyām agnes tejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāyeti

8.7.8

तद् उ पुनः परिचक्षते यद् असर्वेण वाचो ऽभिषिक्तो भवतीश्वरो ह तु पुरायुषः प्रैतोर् इति ह स्माह सत्यकामो जाबालो यम् एताभिर् व्याहृतिभिर् नाभिषिञ्चन्तीति

tad u punaḥ paricakṣate yad asarveṇa vāco 'bhiṣikto bhavatīśvaro ha tu purāyuṣaḥ praitor iti ha smāha satyakāmo jābālo yam etābhir vyāhṛtibhir nābhiṣiñcantīti

8.7.9

ईश्वरो ह सर्वम् आयुर् ऐतोः सर्वम् आप्नोद् विजयेनेत्य् उ ह स्माहोद्दालक आरुणिर् यम् एताभिर् व्याहृतिभिर् अभिषिञ्चन्तीति तम् एतेनैवाभिषिञ्चेद् देवस्य त्वा सवितुः प्रसवे ऽश्विनोर् बाहुभ्याम् पूष्णो हस्ताभ्याम् अग्नेस् तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्याय भूर् भुवः स्वर् इति

īśvaro ha sarvam āyur aitoḥ sarvam āpnod vijayenety u ha smāhoddālaka āruṇir yam etābhir vyāhṛtibhir abhiṣiñcantīti tam etenaivābhiṣiñced devasya tvā savituḥ prasave 'śvinor bāhubhyām pūṣṇo hastābhyām agnes tejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāya bhūr bhuvaḥ svar iti

8.7.10

अथैतानि ह वै क्षत्रियाद् ईजानाद् व्युत्क्रान्तानि भवन्ति ब्रह्मक्षत्रे ऊर्ग् अन्नाद्यम् अपाम् ओषधीनां रसो ब्रह्मवर्चसम् इरा पुष्टिः प्रजातिः क्षत्ररूपं तद् अथो अन्नस्य रस ओषधीनां क्षत्रम् प्रतिष्ठा तद् यद् एवामू पुरस्ताद् आहुती जुहोति तद् अस्मिन् ब्रह्मक्षत्रे दधाति

athaitāni ha vai kṣatriyād ījānād vyutkrāntāni bhavanti brahmakṣatre ūrg annādyam apām oṣadhīnāṃ raso brahmavarcasam irā puṣṭiḥ prajātiḥ kṣatrarūpaṃ tad atho annasya rasa oṣadhīnāṃ kṣatram pratiṣṭhā tad yad evāmū purastād āhutī juhoti tad asmin brahmakṣatre dadhāti

8.8.1

अथ यद् औदुम्बर्य् आसन्दी भवत्य् औदुम्बरश् चमस उदुम्बरशाखोर्ग् वा अन्नाद्यम् उदुम्बर ऊर्जम् एवास्मिंस् तद् अन्नाद्यं दधाति

atha yad audumbary āsandī bhavaty audumbaraś camasa udumbaraśākhorg vā annādyam udumbara ūrjam evāsmiṃs tad annādyaṃ dadhāti

8.8.2

अथ यद् दधि मधु घृतम् भवत्य् अपां स ओषधीनां रसो ऽपाम् एवास्मिंस् तद् ओषधीनां रसं दधाति

atha yad dadhi madhu ghṛtam bhavaty apāṃ sa oṣadhīnāṃ raso 'pām evāsmiṃs tad oṣadhīnāṃ rasaṃ dadhāti

8.8.3

अथ यद् आतपवर्ष्या आपो भवन्ति तेजश् च ह वै ब्रह्मवर्चसं चातपवर्ष्या आपस् तेज एवास्मिंस् तद् ब्रह्मवर्चसं च दधाति

atha yad ātapavarṣyā āpo bhavanti tejaś ca ha vai brahmavarcasaṃ cātapavarṣyā āpas teja evāsmiṃs tad brahmavarcasaṃ ca dadhāti

8.8.4

अथ यच्छष्पाणि च तोक्मानि च भवन्तीरायै तत् पुष्ट्यै रूपम् अथो प्रजात्या इराम् एवास्मिंस् तत् पुष्टिं दधात्य् अथो प्रजातिम्

atha yacchaṣpāṇi ca tokmāni ca bhavantīrāyai tat puṣṭyai rūpam atho prajātyā irām evāsmiṃs tat puṣṭiṃ dadhāty atho prajātim

8.8.5

अथ यत् सुरा भवति क्षत्ररूपं तद् अथो अन्नस्य रसः क्षत्ररूपम् एवास्मिंस् तद् दधात्य् अथो अन्नस्य रसम्

atha yat surā bhavati kṣatrarūpaṃ tad atho annasya rasaḥ kṣatrarūpam evāsmiṃs tad dadhāty atho annasya rasam

8.8.6

अथ यद् दूर्वा भवति क्षत्रं वा एतद् ओषधीनां यद् दूर्वा क्षत्रं राजन्यो नितत इव हीह क्षत्रियो राष्ट्रे वसन् भवति प्रतिष्ठित इव निततेव दूर्वावरोधैर् भूम्याम् प्रतिष्ठितेव तद् यद् दूर्वा भवत्य् ओषधीनाम् एवास्मिंस् तत् क्षत्रं दधात्य् अथो प्रतिष्ठाम्

atha yad dūrvā bhavati kṣatraṃ vā etad oṣadhīnāṃ yad dūrvā kṣatraṃ rājanyo nitata iva hīha kṣatriyo rāṣṭre vasan bhavati pratiṣṭhita iva nitateva dūrvāvarodhair bhūmyām pratiṣṭhiteva tad yad dūrvā bhavaty oṣadhīnām evāsmiṃs tat kṣatraṃ dadhāty atho pratiṣṭhām

8.8.7

एतानि ह वै यान्य् अस्माद् ईजानाद् व्युत्क्रान्तानि भवन्ति तान्य् एवास्मिंस् तद् दधाति तैर् एवैनं तत् समर्धयति

etāni ha vai yāny asmād ījānād vyutkrāntāni bhavanti tāny evāsmiṃs tad dadhāti tair evainaṃ tat samardhayati

8.8.8

अथास्मै सुराकंसं हस्त आदधाति

athāsmai surākaṃsaṃ hasta ādadhāti

8.8.9

स्वादिष्ठया मदिष्ठया पवस्व सोम धारया इन्द्राय पातवे सुतः

svādiṣṭhayā madiṣṭhayā pavasva soma dhārayā indrāya pātave sutaḥ

8.8.10

इत्य् आधाय शान्तिं वाचयति

ity ādhāya śāntiṃ vācayati

8.8.11

नाना हि वां देवहितं सदस् कृतम् मा संसृक्षाथाम् परमे व्योमनि सुरा त्वम् असि शुष्मिणी सोम एष राजा मैनं हिंसिष्टं स्वां योनिम् आविशन्ताव् इति

nānā hi vāṃ devahitaṃ sadas kṛtam mā saṃsṛkṣāthām parame vyomani surā tvam asi śuṣmiṇī soma eṣa rājā mainaṃ hiṃsiṣṭaṃ svāṃ yonim āviśantāv iti

8.8.12

सोमपीथस्य चैषा सुरापीथस्य च व्यावृत्तिः

somapīthasya caiṣā surāpīthasya ca vyāvṛttiḥ

8.8.13

पीत्वा यं रातिम् मन्येत तस्मा एनाम् प्रयच्छेत् तद्धि मित्रस्य रूपं मित्र एवैनां तद् अन्ततः प्रतिष्ठापयति तथा हि मित्रे प्रतितिष्ठति

pītvā yaṃ rātim manyeta tasmā enām prayacchet taddhi mitrasya rūpaṃ mitra evaināṃ tad antataḥ pratiṣṭhāpayati tathā hi mitre pratitiṣṭhati

8.8.14

प्रतितिष्ठति य एवं वेद

pratitiṣṭhati ya evaṃ veda

Aitareyabrāhmaṇa