6.33.12

यद् व् एवैतशप्रलापाः

yad v evaitaśapralāpāḥ

6.33.13

अयातयामा वा अक्षितिर् ऐतशप्रलापो ऽयातयामा मे यज्ञे ऽसद् अक्षितिर् मे यज्ञे ऽसदिति

ayātayāmā vā akṣitir aitaśapralāpo 'yātayāmā me yajñe 'sad akṣitir me yajñe 'saditi

6.33.14

तं वा एतम् ऐतशप्रलापं शंसति पदावग्राहं यथा निविदम्

taṃ vā etam aitaśapralāpaṃ śaṃsati padāvagrāhaṃ yathā nividam

6.33.15

तस्योत्तमेन पदेन प्रणौति यथा निविदः

tasyottamena padena praṇauti yathā nividaḥ

6.33.16

प्रवल्हिकाः शंसति प्रवल्हिकाभिर् वै देवा असुरान् प्रवल्ह्याथैनान् अत्यायंस् तथैवैतद् यजमानाः प्रवल्हिकाभिर् एवाप्रियम् भ्रातृव्यम् प्रवल्ह्याथैनम् अतियन्ति

pravalhikāḥ śaṃsati pravalhikābhir vai devā asurān pravalhyāthainān atyāyaṃs tathaivaitad yajamānāḥ pravalhikābhir evāpriyam bhrātṛvyam pravalhyāthainam atiyanti

6.33.17

ता अर्धर्चशः शंसति प्रतिष्ठाया एव

tā ardharcaśaḥ śaṃsati pratiṣṭhāyā eva

6.33.18

आजिज्ञासेन्याः शंसत्य् आजिज्ञासेन्याभिर् वै देवा असुरान् आज्ञायाथैनान् अत्यायंस् तथैवैतद् यजमाना आजिज्ञासेन्याभिर् एवाप्रियम् भ्रातृव्यम् आज्ञायाथैनम् अतियन्ति ता अर्धर्चशः शंसति प्रतिष्ठाया एव

ājijñāsenyāḥ śaṃsaty ājijñāsenyābhir vai devā asurān ājñāyāthainān atyāyaṃs tathaivaitad yajamānā ājijñāsenyābhir evāpriyam bhrātṛvyam ājñāyāthainam atiyanti tā ardharcaśaḥ śaṃsati pratiṣṭhāyā eva

6.33.19

प्रतिराधं शंसति प्रतिराधेन वै देवा असुरान् प्रतिराध्याथैनान् अत्यायंस् तथैवैतद् यजमानाः प्रतिराधेनैवाप्रियम् भ्रातृव्यम् प्रतिराध्याथैनम् अतियन्ति

pratirādhaṃ śaṃsati pratirādhena vai devā asurān pratirādhyāthainān atyāyaṃs tathaivaitad yajamānāḥ pratirādhenaivāpriyam bhrātṛvyam pratirādhyāthainam atiyanti

6.33.20

अतिवादं शंसत्य् अतिवादेन वै देवा असुरान् अत्युद्याथैनान् अत्यायंस् तथैवैतद् यजमाना अतिवादेनैवाप्रियम् भ्रातृव्यम् अत्युद्याथैनम् अतियन्ति तम् अर्धर्चशः शंसति प्रतिष्ठाया एव

ativādaṃ śaṃsaty ativādena vai devā asurān atyudyāthainān atyāyaṃs tathaivaitad yajamānā ativādenaivāpriyam bhrātṛvyam atyudyāthainam atiyanti tam ardharcaśaḥ śaṃsati pratiṣṭhāyā eva

6.34.1

देयनीथं शंसति

deyanīthaṃ śaṃsati

6.34.2

आदित्याश् च ह वा अङ्गिरसश् च स्वर्गे लोके ऽस्पर्धन्त वयम् पूर्व एष्यामो वयम् इति ते हाङ्गिरसः पूर्वे श्वःसुत्यां स्वर्गस्य लोकस्य ददृशुस् ते ऽग्निम् प्रजिघ्युर् अङ्गिरसां वा एको ऽग्निः परेह्य् आदित्येभ्यः श्वःसुत्यां स्वर्गस्य लोकस्य प्रब्रूहीति ते हादित्या अग्निम् एव दृष्ट्वा सद्यःसुत्यां स्वर्गस्य लोकस्य ददृशुस् तान् एत्याब्रवीच् छ्वःसुत्यां वः स्वर्गस्य लोकस्य प्रब्रूम इति ते होचुर् अथ वयं तुभ्यं सद्यःसुत्यां स्वर्गस्य लोकस्य प्रब्रूमस् त्वयैव वयं होत्रा स्वर्गं लोकम् एष्याम इति स तथेत्य् उक्त्वा प्रत्युक्तः पुनर् आजगाम

ādityāś ca ha vā aṅgirasaś ca svarge loke 'spardhanta vayam pūrva eṣyāmo vayam iti te hāṅgirasaḥ pūrve śvaḥsutyāṃ svargasya lokasya dadṛśus te 'gnim prajighyur aṅgirasāṃ vā eko 'gniḥ parehy ādityebhyaḥ śvaḥsutyāṃ svargasya lokasya prabrūhīti te hādityā agnim eva dṛṣṭvā sadyaḥsutyāṃ svargasya lokasya dadṛśus tān etyābravīc chvaḥsutyāṃ vaḥ svargasya lokasya prabrūma iti te hocur atha vayaṃ tubhyaṃ sadyaḥsutyāṃ svargasya lokasya prabrūmas tvayaiva vayaṃ hotrā svargaṃ lokam eṣyāma iti sa tathety uktvā pratyuktaḥ punar ājagāma

6.34.3

ते होचुः प्रावोचाः इति प्रावोचम् इति होवाचाथो मे प्रतिप्रावोचन्न् इति नो हि न प्रत्यज्ञास्थाः इति प्रति वा अज्ञासम् इति होवाच

te hocuḥ prāvocāḥ iti prāvocam iti hovācātho me pratiprāvocann iti no hi na pratyajñāsthāḥ iti prati vā ajñāsam iti hovāca

6.34.4

यशसा वा एषो ऽभ्यैति य आर्त्विज्येन तं यः प्रतिरुन्धेद् यशः स प्रतिरुन्धेत् तस्मान् न प्रत्यरौत्सीति

yaśasā vā eṣo 'bhyaiti ya ārtvijyena taṃ yaḥ pratirundhed yaśaḥ sa pratirundhet tasmān na pratyarautsīti

6.34.5

यदि त्व् अस्माद् अपोज्जिगांसेद् यज्ञेनास्माद् अपोदियात् यदि यदि त्व् अयाज्यः स्वयम् अपोदितं तस्मात्

yadi tv asmād apojjigāṃsed yajñenāsmād apodiyāt yadi yadi tv ayājyaḥ svayam apoditaṃ tasmāt

6.35.1

ते हादित्यान् अङ्गिरसो ऽयाजयंस् तेभ्यो याजयद्भ्य इमाम् पृथिवीम् पूर्णां दक्षिणानाम् अददुस् तान् इयम् प्रतिगृहीतातपत् तां न्यवृञ्जन् सा सिंही भूत्वा विजृम्भन्ती जनान् अचरत् तस्याः शोचत्या इमे प्रदराः प्रादीर्यन्त ये ऽस्या इमे प्रदराः समेव हैव ततः पुरा

te hādityān aṅgiraso 'yājayaṃs tebhyo yājayadbhya imām pṛthivīm pūrṇāṃ dakṣiṇānām adadus tān iyam pratigṛhītātapat tāṃ nyavṛñjan sā siṃhī bhūtvā vijṛmbhantī janān acarat tasyāḥ śocatyā ime pradarāḥ prādīryanta ye 'syā ime pradarāḥ sameva haiva tataḥ purā

6.35.2

तस्माद् आहुर् न निवृत्तदक्षिणाम् प्रतिगृह्णीयान् नेन्मा शुचा विद्धा शुचा विध्याद् इति

tasmād āhur na nivṛttadakṣiṇām pratigṛhṇīyān nenmā śucā viddhā śucā vidhyād iti

6.35.3

यदि त्व् एनाम् प्रतिगृह्णीयाद् अप्रियायैनाम् भ्रातृव्याय दद्यात् परा हैव भवति

yadi tv enām pratigṛhṇīyād apriyāyainām bhrātṛvyāya dadyāt parā haiva bhavati

6.35.4

अथ यो ऽसौ तपतीṁ एषो ऽश्वः श्वेतो रूपं कृत्वाश्वाभिधान्यपिहितेनात्मना प्रतिचक्रम इमं वो नयाम इति स एष देवनीथो ऽनूच्यते

atha yo 'sau tapatīṁ eṣo 'śvaḥ śveto rūpaṃ kṛtvāśvābhidhānyapihitenātmanā praticakrama imaṃ vo nayāma iti sa eṣa devanītho 'nūcyate

6.35.5

आदित्या ह जरितर् अङ्गिरोभ्यो दक्षिणाम् अनयन्

ādityā ha jaritar aṅgirobhyo dakṣiṇām anayan

6.35.6

तां ह जरितर् न प्रत्यायन्न् इति न हि त इमाम् प्रत्यायन्

tāṃ ha jaritar na pratyāyann iti na hi ta imām pratyāyan

Aitareyabrāhmaṇa