6.18.3

य एक इद्धव्यश् चर्षणीनाम् इति भरद्वाजो यस् तिग्मशृङ्गो वृषभो न भीम उद् उ ब्रह्माण्य् ऐरत श्रवस्येति वसिष्ठो ऽस्मा इद् उ प्र तवसे तुरायेति नोधाः

ya eka iddhavyaś carṣaṇīnām iti bharadvājo yas tigmaśṛṅgo vṛṣabho na bhīma ud u brahmāṇy airata śravasyeti vasiṣṭho 'smā id u pra tavase turāyeti nodhāḥ

6.18.4

त एते प्रातःसवने षﾱअहस्तोत्रियाञ्छस्त्वा माध्यंदिने ऽहीनसूक्तानि शंसन्ति

ta ete prātaḥsavane ṣaﾱahastotriyāñchastvā mādhyaṃdine 'hīnasūktāni śaṃsanti

6.18.5

तान्य् एतान्य् अहीनसूक्तान्य् आ सत्यो यातु मघवान् ऋजीषीति सत्यवन् मैत्रावरुणो ऽस्मा इद् उ प्र तवसे तुरायेन्द्राय ब्रह्माणि राततमा इन्द्र ब्रह्माणि गोतमासो अक्रन्न् इति ब्रह्मण्वद् ब्राह्मणाच्छंसी शासद् वह्निर् जनयन्त वह्निम् इति वह्निवद् अछावाकः

tāny etāny ahīnasūktāny ā satyo yātu maghavān ṛjīṣīti satyavan maitrāvaruṇo 'smā id u pra tavase turāyendrāya brahmāṇi rātatamā indra brahmāṇi gotamāso akrann iti brahmaṇvad brāhmaṇācchaṃsī śāsad vahnir janayanta vahnim iti vahnivad achāvākaḥ

6.18.6

तद् आहुः कस्माद् अछावाको वह्निवद् एतत् सूक्तम् उभयत्र शंसति पराञ्चिषु चैवाहःस्व् अभ्यावर्तिषु चेति

tad āhuḥ kasmād achāvāko vahnivad etat sūktam ubhayatra śaṃsati parāñciṣu caivāhaḥsv abhyāvartiṣu ceti

6.18.7

वीर्यवान् वा एष बह्वृचो वह्निवद् एतत् सूक्तं वहति ह वै वह्निर् धुरो यासु युज्यते तस्माद् अछावाको वह्निवद् एतत् सूक्तम् उभयत्र शंसति पराञ्चिषु चैवाहःस्व् अभ्यावर्तिषु च

vīryavān vā eṣa bahvṛco vahnivad etat sūktaṃ vahati ha vai vahnir dhuro yāsu yujyate tasmād achāvāko vahnivad etat sūktam ubhayatra śaṃsati parāñciṣu caivāhaḥsv abhyāvartiṣu ca

6.18.8

तानि पञ्चस्व् अहःसु भवन्ति चतुर्विंशे ऽभिजिति विषुवति विश्वजिति महाव्रते ऽहीनानि ह वा एतान्य् अहानि न ह्य् एषु किंचन हीयते पराञ्चीनि ह वा एतान्य् अहान्य् अनभ्यावर्तीनि तस्माद् एनान्य् एतेष्व् अहःसु शंसन्ति

tāni pañcasv ahaḥsu bhavanti caturviṃśe 'bhijiti viṣuvati viśvajiti mahāvrate 'hīnāni ha vā etāny ahāni na hy eṣu kiṃcana hīyate parāñcīni ha vā etāny ahāny anabhyāvartīni tasmād enāny eteṣv ahaḥsu śaṃsanti

6.18.9

यद् एनानि शंसन्त्य् अहीनान् स्वर्गांल्लोकान् सर्वरूपान् सर्वसमृद्धान् अवाप्नवामेति

yad enāni śaṃsanty ahīnān svargāṃllokān sarvarūpān sarvasamṛddhān avāpnavāmeti

6.18.10

यद् एवैनानि शंसन्तीन्द्रम् एवैतैर् निह्वयन्ते यथर्षभं वाशितायै

yad evaināni śaṃsantīndram evaitair nihvayante yatharṣabhaṃ vāśitāyai

6.18.11

यद् व् एवैनानि शंसन्त्य् अहीनस्य संतत्या अहीनम् एव तत् संतन्वन्ति

yad v evaināni śaṃsanty ahīnasya saṃtatyā ahīnam eva tat saṃtanvanti

6.19.1

ततो वा एतांस् त्रीन् सम्पातान् मैत्रावरुणो विपर्यासम् एकैकम् अहर् अहः शंसति

tato vā etāṃs trīn sampātān maitrāvaruṇo viparyāsam ekaikam ahar ahaḥ śaṃsati

6.19.2

एवा त्वाम् इन्द्र वज्रिन्न् अत्रेति प्रथमे ऽहनि यन् न इन्द्रो जुजुषे यच् च वष्टीति द्वितीये कथा महाम् अवृधत् कस्य होतुर् इति तृतीये

evā tvām indra vajrinn atreti prathame 'hani yan na indro jujuṣe yac ca vaṣṭīti dvitīye kathā mahām avṛdhat kasya hotur iti tṛtīye

6.19.3

त्रीन् एव सम्पातान् ब्राह्मणाच्छंसी विपर्यासम् एकैकम् अहर् अहः शंसतीन्द्रः पूर्भिद् आतिरद् दासम् अर्कैर् इति प्रथमे ऽहनि य एक इद्धव्यश् चर्षणीनाम् इति द्वितीये यस् तिग्मशृङ्गो वृषभो न भीम इति तृतीये

trīn eva sampātān brāhmaṇācchaṃsī viparyāsam ekaikam ahar ahaḥ śaṃsatīndraḥ pūrbhid ātirad dāsam arkair iti prathame 'hani ya eka iddhavyaś carṣaṇīnām iti dvitīye yas tigmaśṛṅgo vṛṣabho na bhīma iti tṛtīye

6.19.4

त्रीन् एव सम्पातान् अछावाको विपर्यासम् एकैकम् अहर् अहः शंसतीमाम् ऊ षु प्रभृतिं सातये धा इति प्रथमे ऽहनीच्छन्ति त्वा सोम्यासः सखाय इति द्वितीये शासद् वह्निर् दुहितुर् नप्त्यं गाद् इति तृतीये

trīn eva sampātān achāvāko viparyāsam ekaikam ahar ahaḥ śaṃsatīmām ū ṣu prabhṛtiṃ sātaye dhā iti prathame 'hanīcchanti tvā somyāsaḥ sakhāya iti dvitīye śāsad vahnir duhitur naptyaṃ gād iti tṛtīye

6.19.5

तानि वा एतानि नव

tāni vā etāni nava

6.19.6

त्रीणि चाहर् अहः शस्यानि

trīṇi cāhar ahaḥ śasyāni

6.19.7

तानि द्वादश सम्पद्यन्ते द्वादश वै मासाः संवत्सरः संवत्सरः प्रजापतिः प्रजापतिर् यज्ञस् तत् संवत्सरम् प्रजापतिं यज्ञम् आप्नुवन्ति तत् संवत्सरे प्रजापतौ यज्ञे ऽहर् अहः प्रतितिष्ठन्तो यन्ति

tāni dvādaśa sampadyante dvādaśa vai māsāḥ saṃvatsaraḥ saṃvatsaraḥ prajāpatiḥ prajāpatir yajñas tat saṃvatsaram prajāpatiṃ yajñam āpnuvanti tat saṃvatsare prajāpatau yajñe 'har ahaḥ pratitiṣṭhanto yanti

6.19.8

तान्य् अन्तरेणावापम् आवपेरन्

tāny antareṇāvāpam āvaperan

6.19.9

अन्यूङ्ख्या विराजो वैमदीश् चतुर्थे ऽहनि पङ्क्तीः पञ्चमे पारुच्छेपीः षष्ठे

anyūṅkhyā virājo vaimadīś caturthe 'hani paṅktīḥ pañcame pārucchepīḥ ṣaṣṭhe

6.19.10

अथ यान्य् अहानि महास्तोमानि स्युः को अद्य नर्यो देवकाम इति मैत्रावरुण आवपेत वने न वा यो न्य् अधायि चाकन्न् इति ब्राह्मणाच्छंस्य् आ याह्य् अर्वाङ् उप वन्धुरेष्ठा इत्य् अछावाकः

atha yāny ahāni mahāstomāni syuḥ ko adya naryo devakāma iti maitrāvaruṇa āvapeta vane na vā yo ny adhāyi cākann iti brāhmaṇācchaṃsy ā yāhy arvāṅ upa vandhureṣṭhā ity achāvākaḥ

6.19.11

एतानि वा आवपनान्य् एतैर् वा आवपनैर् देवाः स्वर्गम् लोकम् अजयन्न् एतैर् ऋषयस् तथैवैतद् यजमाना एतैर् आवपनैः स्वर्गं लोकं जयन्ति

etāni vā āvapanāny etair vā āvapanair devāḥ svargam lokam ajayann etair ṛṣayas tathaivaitad yajamānā etair āvapanaiḥ svargaṃ lokaṃ jayanti

Aitareyabrāhmaṇa