6.15.4

अरिष्टैर् नः पथिभिः पारयन्तेति स्वस्तिताया एवैतद् अहरहः शंसति

ariṣṭair naḥ pathibhiḥ pārayanteti svastitāyā evaitad aharahaḥ śaṃsati

6.15.5

अथाह यज् जागतं वै तृतीयसवनम् अथ कस्माद् एषां त्रिष्टुभः परिधानीया भवन्तीति वीर्यं वै त्रिष्टुब् वीर्य एव तद् अन्ततः प्रतितिष्ठन्तो यन्ति

athāha yaj jāgataṃ vai tṛtīyasavanam atha kasmād eṣāṃ triṣṭubhaḥ paridhānīyā bhavantīti vīryaṃ vai triṣṭub vīrya eva tad antataḥ pratitiṣṭhanto yanti

6.15.6

इयम् इन्द्रं वरुणम् अष्ट मे गीर् इति मैत्रावरुणस्य बृहस्पतिर् नः परि पातु पश्चाद् इति ब्राह्मणाच्छंसिन उभा जिग्यथुर् इत्य् अछावाकस्य

iyam indraṃ varuṇam aṣṭa me gīr iti maitrāvaruṇasya bṛhaspatir naḥ pari pātu paścād iti brāhmaṇācchaṃsina ubhā jigyathur ity achāvākasya

6.15.7

उभौ हि तौ जिग्यतुः

ubhau hi tau jigyatuḥ

6.15.8

न परा जयेथे न परा जिग्य इति

na parā jayethe na parā jigya iti

6.15.9

न हि तयोः कतरश् चन पराजिग्ये

na hi tayoḥ kataraś cana parājigye

6.15.10

इन्द्रश् च विष्णो यद् अपस्पृधेथां त्रेधा सहस्रं वि तद् ऐरयेथाम् इति

indraś ca viṣṇo yad apaspṛdhethāṃ tredhā sahasraṃ vi tad airayethām iti

6.15.11

इन्द्रश् च ह वै विष्णुश् चासुरैर् युयुधाते तान् ह स्म जित्वोचतुः कल्पामहा इति ते ह तथेत्य् असुरा ऊचुः सो ऽब्रवीद् इन्द्रो यावद् एवायं विष्णुस् त्रिर् विक्रमते तावद् अस्माकम् अथ युष्माकम् इतरद् इति स इमांल्लोकान् विचक्रमे ऽथो वेदान् अथो वाचं तद् आहुः किं तत् सहस्रम् इतीमे लोका इमे वेदा अथो वाग् इति ब्रूयात्

indraś ca ha vai viṣṇuś cāsurair yuyudhāte tān ha sma jitvocatuḥ kalpāmahā iti te ha tathety asurā ūcuḥ so 'bravīd indro yāvad evāyaṃ viṣṇus trir vikramate tāvad asmākam atha yuṣmākam itarad iti sa imāṃllokān vicakrame 'tho vedān atho vācaṃ tad āhuḥ kiṃ tat sahasram itīme lokā ime vedā atho vāg iti brūyāt

6.15.12

ऐरयेथाम् ऐरयेथाम् इत्य् अछावाक उक्थ्ये ऽभ्यस्यति स हि तत्रान्त्यो भवति

airayethām airayethām ity achāvāka ukthye 'bhyasyati sa hi tatrāntyo bhavati

6.15.13

अग्निष्टोमे होतातिरात्रे च स हि तत्रान्त्यो भवति

agniṣṭome hotātirātre ca sa hi tatrāntyo bhavati

6.15.14

अभ्यस्येत् षोﾱअशिनि नाभ्यस्यैत् इति अभ्यस्येद् इत्य् आहुः कथम् अन्येष्व् अहःस्व् अभ्यस्यति कथम् अत्र नाभ्यस्येद् इति तस्माद् अभ्यस्येत्

abhyasyet ṣoﾱaśini nābhyasyait iti abhyasyed ity āhuḥ katham anyeṣv ahaḥsv abhyasyati katham atra nābhyasyed iti tasmād abhyasyet

6.16.1

अथाह यन् नाराशंसं वै तृतीयसवनम् अथ कस्माद् अछावाको ऽन्ततः शिल्पेष्व् अनाराशंसीः शंसतीति

athāha yan nārāśaṃsaṃ vai tṛtīyasavanam atha kasmād achāvāko 'ntataḥ śilpeṣv anārāśaṃsīḥ śaṃsatīti

6.16.2

विकृतिर् वै नाराशंसं किम् इव च वै किम् इवच रेतो विक्रियते तत् तदा विकृतम् प्रजातम् भवत्य् अथैतन् मृद्व् इव छन्दः शिथिरं यन् नाराशंसम् अथैषो ऽन्त्यो यद् अछावाकस् तद् दृﾱहतायै दृﾱहे प्रतिष्ठास्याम इति

vikṛtir vai nārāśaṃsaṃ kim iva ca vai kim ivaca reto vikriyate tat tadā vikṛtam prajātam bhavaty athaitan mṛdv iva chandaḥ śithiraṃ yan nārāśaṃsam athaiṣo 'ntyo yad achāvākas tad dṛﾱhatāyai dṛﾱhe pratiṣṭhāsyāma iti

6.16.3

तस्माद् अछावाको ऽन्ततः शिल्पेष्व् अनाराशंसीः शंसति दृﾱहतायै दृﾱहे प्रतिष्ठास्याम इति दृﾱहे प्रतिष्ठास्याम इति

tasmād achāvāko 'ntataḥ śilpeṣv anārāśaṃsīḥ śaṃsati dṛﾱhatāyai dṛﾱhe pratiṣṭhāsyāma iti dṛﾱhe pratiṣṭhāsyāma iti

6.17.1

यः श्वःस्तोत्रियस् तम् अनुरूपं कुर्वन्ति प्रातःसवने ऽहीनसंतत्यै

yaḥ śvaḥstotriyas tam anurūpaṃ kurvanti prātaḥsavane 'hīnasaṃtatyai

6.17.2

यथा वा एकाहः सुत एवम् अहीनस् तद् यथैकाहस्य सुतस्य सवनानि संतिष्ठमानानि यन्त्य् एवम् एवाहीनस्याहानि संतिष्ठमानानि यन्ति तद् यच्छ्वःस्तोत्रियम् अनुरूपं कुर्वन्ति प्रातःसवने ऽहीनसंतत्या अहीनमेव तत् संतन्वन्ति

yathā vā ekāhaḥ suta evam ahīnas tad yathaikāhasya sutasya savanāni saṃtiṣṭhamānāni yanty evam evāhīnasyāhāni saṃtiṣṭhamānāni yanti tad yacchvaḥstotriyam anurūpaṃ kurvanti prātaḥsavane 'hīnasaṃtatyā ahīnameva tat saṃtanvanti

6.17.3

ते वै देवाश् च ऋषयश् चाद्रियन्त समानेन यज्ञं संतनवामेति त एतत् समानं यज्ञस्यापश्यन् समानान् प्रगाथान् समानीः प्रतिपदः समानानि सूक्तानि

te vai devāś ca ṛṣayaś cādriyanta samānena yajñaṃ saṃtanavāmeti ta etat samānaṃ yajñasyāpaśyan samānān pragāthān samānīḥ pratipadaḥ samānāni sūktāni

6.17.4

ओकःसारी वा इन्द्रो यत्र वा इन्द्रः पूर्वं गच्छत्य् ऐव तत्रापरं गच्छति यज्ञस्यैव सेन्द्रतायै

okaḥsārī vā indro yatra vā indraḥ pūrvaṃ gacchaty aiva tatrāparaṃ gacchati yajñasyaiva sendratāyai

6.18.1

तान् वा एतान् सम्पातान् विश्वामित्रः प्रथमम् अपश्यत् तान् विश्वामित्रेण दृष्टान् वामदेवो ऽसृजतैव त्वाम् इन्द्र वज्रिन्न् अत्र यन् न इन्द्रो जुजुषे यच्च वष्टि कथा महाम् अवृधत् कस्य होतुर् इति तान् क्षिप्रं समपतद् यत् क्षिप्रं समपतत् तत् सम्पातानां सम्पातत्वम्

tān vā etān sampātān viśvāmitraḥ prathamam apaśyat tān viśvāmitreṇa dṛṣṭān vāmadevo 'sṛjataiva tvām indra vajrinn atra yan na indro jujuṣe yacca vaṣṭi kathā mahām avṛdhat kasya hotur iti tān kṣipraṃ samapatad yat kṣipraṃ samapatat tat sampātānāṃ sampātatvam

6.18.2

स हेक्षांचक्रे विश्वामित्रो यान् वा अहं सम्पातान् अपश्यं तान् वामदेवो ऽसृष्ट कानि न्व् अहं सूक्तानि सम्पातांस् तत्प्रतिमान् सृजेयेति स एतानि सूक्तानि सम्पातांस् तत्प्रतिमान् असृजत सद्यो ह जातो वृषभः कनीन इन्द्रः पूर्भिद् आतिरद् दासम् अर्कैर् इमाम् ऊ षु प्रभृतिं सातये धा इच्छन्ति त्वा सोम्यासः सखायः शासद् वह्निर् दुहितुर् नप्त्यं गाद् अभि तष्टेव दीधया मनीषाम् इति

sa hekṣāṃcakre viśvāmitro yān vā ahaṃ sampātān apaśyaṃ tān vāmadevo 'sṛṣṭa kāni nv ahaṃ sūktāni sampātāṃs tatpratimān sṛjeyeti sa etāni sūktāni sampātāṃs tatpratimān asṛjata sadyo ha jāto vṛṣabhaḥ kanīna indraḥ pūrbhid ātirad dāsam arkair imām ū ṣu prabhṛtiṃ sātaye dhā icchanti tvā somyāsaḥ sakhāyaḥ śāsad vahnir duhitur naptyaṃ gād abhi taṣṭeva dīdhayā manīṣām iti

Aitareyabrāhmaṇa