6.13.2

यद् एवैनाः संप्रगीर्य होत्रा इत्य् आचक्षते तेन समाः

yad evaināḥ saṃpragīrya hotrā ity ācakṣate tena samāḥ

6.13.3

यद् उक्थिन्यो ऽन्या होत्रा अनुक्था अन्यास् तेनो विषमाः

yad ukthinyo 'nyā hotrā anukthā anyās teno viṣamāḥ

6.13.4

एवम् उ हास्यैता उक्थिन्यः सर्वाः समाः समृद्धा भवन्ति

evam u hāsyaitā ukthinyaḥ sarvāḥ samāḥ samṛddhā bhavanti

6.13.5

अथाह शंसन्ति प्रातःसवने शंसन्ति माध्यंदिने होत्रकाः कथम् एषां तृतीयसवने शस्तम् भवतीति

athāha śaṃsanti prātaḥsavane śaṃsanti mādhyaṃdine hotrakāḥ katham eṣāṃ tṛtīyasavane śastam bhavatīti

6.13.6

यद् एव माध्यंदिने द्वे द्वे सूक्ते शंसन्तीति ब्रूयात् तेनेति

yad eva mādhyaṃdine dve dve sūkte śaṃsantīti brūyāt teneti

6.13.7

अथाह यद् द्व्युक्थो होता कथं होत्रका द्व्युक्था भवन्तीति

athāha yad dvyuktho hotā kathaṃ hotrakā dvyukthā bhavantīti

6.13.8

यद् एव द्विदेवत्याभिर् यजन्तीति ब्रूयात् तेनेति

yad eva dvidevatyābhir yajantīti brūyāt teneti

6.14.1

अथाह यद् एतास् तिस्र उक्थिन्यो होत्राः कथम् इतरा उक्थिन्यो भवन्तीति

athāha yad etās tisra ukthinyo hotrāḥ katham itarā ukthinyo bhavantīti

6.14.2

आज्यम् एवाग्नीध्रीयाया उक्थम् मरुत्वतीयम् पोत्रीयायै वैश्वदेवं नेष्ट्रीयायै ता वा एता होत्रा एवंन्यङ्गा एव भवन्ति

ājyam evāgnīdhrīyāyā uktham marutvatīyam potrīyāyai vaiśvadevaṃ neṣṭrīyāyai tā vā etā hotrā evaṃnyaṅgā eva bhavanti

6.14.3

अथाह यद् एकप्रैषा अन्ये होत्रका अथ कस्माद् द्विप्रैषः पोता द्विप्रैषो नेष्टेति

athāha yad ekapraiṣā anye hotrakā atha kasmād dvipraiṣaḥ potā dvipraiṣo neṣṭeti

6.14.3

यत्र अदः गायत्री सुपर्णः भूत्वा सोमम् आहरत् तत् एतासाम् होत्राणाम् इन्द्रः उक्थानि परिलुप्य होत्रे प्रददौ

yatra adaḥ gāyatrī suparṇaḥ bhūtvā somam āharat tat etāsām hotrāṇām indraḥ ukthāni parilupya hotre pradadau

6.14.5

अथाह यद्धोता यक्षद्धोता यक्षद् इति मैत्रावरुणो होत्रे प्रेष्यत्य् अथ कस्माद् अहोतृभ्यः सद्भ्यो होत्राशंसिभ्यो होता यक्षद्धोता यक्षद् इति प्रेष्यतीति

athāha yaddhotā yakṣaddhotā yakṣad iti maitrāvaruṇo hotre preṣyaty atha kasmād ahotṛbhyaḥ sadbhyo hotrāśaṃsibhyo hotā yakṣaddhotā yakṣad iti preṣyatīti

6.14.6

प्राणो वै होता प्राणः सर्व ऋत्विजः प्राणो यक्षत् प्राणो यक्षद् इत्य् एव तद् आह

prāṇo vai hotā prāṇaḥ sarva ṛtvijaḥ prāṇo yakṣat prāṇo yakṣad ity eva tad āha

6.14.7

अथाहास्त्य् उद्गातॄणाम् प्रैषः नाṁ इति अस्तीति ब्रूयाद् यद् एवैतत् प्रशास्ता जपं जपित्वा स्तुध्वम् इत्य् आह स एषाम् प्रैषः

athāhāsty udgātṝṇām praiṣaḥ nāṁ iti astīti brūyād yad evaitat praśāstā japaṃ japitvā studhvam ity āha sa eṣām praiṣaḥ

6.14.8

अथाहास्त्य् अछावाकस्य प्रवराः नाṁ इति अस्तीति ब्रूयाद् यद् एवैनम् अध्वर्युर् आहाछावाक वदस्व यत् ते वाद्यम् इत्य् एषो ऽस्य प्रवरः

athāhāsty achāvākasya pravarāḥ nāṁ iti astīti brūyād yad evainam adhvaryur āhāchāvāka vadasva yat te vādyam ity eṣo 'sya pravaraḥ

6.14.9

अथाह यद् ऐन्द्रावरुणम् मैत्रावरुणस् तृतीयसवने शंसत्य् अथ कस्माद् अस्याग्नेयौ स्तोत्रियानुरूपौ भवत इत्य् अग्निना वै मुखेन देवा असुरान् उक्थेभ्यो निर्जघ्नुस् तस्माद् अस्याग्नेयौ स्तोत्रियानुरूपौ भवतः

athāha yad aindrāvaruṇam maitrāvaruṇas tṛtīyasavane śaṃsaty atha kasmād asyāgneyau stotriyānurūpau bhavata ity agninā vai mukhena devā asurān ukthebhyo nirjaghnus tasmād asyāgneyau stotriyānurūpau bhavataḥ

6.14.10

अथाह यद् ऐन्द्राबार्हस्पत्यम् ब्राह्मणाच्छंसी तृतीयसवने शंसत्य् ऐन्द्रावैष्णवम् अछावाकः कथम् एनयोर् ऐन्द्राः स्तोत्रियानुरूपा भवन्तीतीन्द्रो ह स्म वा असुरान् उक्थेभ्यः प्रजिगाय सो ऽब्रवीत् कश् चाहं चेत्य् अहं चाहं चेति ह स्म देवता अन्ववयन्ति स यद् इन्द्रः पूर्वः प्रजिगाय तस्माद् एनयोर् ऐन्द्राः स्तोत्रियानुरूपा भवन्ति यद् व् अहं चाहं चेति ह स्म देवता अन्ववयुस् तस्मान् नानादेवत्यानि

athāha yad aindrābārhaspatyam brāhmaṇācchaṃsī tṛtīyasavane śaṃsaty aindrāvaiṣṇavam achāvākaḥ katham enayor aindrāḥ stotriyānurūpā bhavantītīndro ha sma vā asurān ukthebhyaḥ prajigāya so 'bravīt kaś cāhaṃ cety ahaṃ cāhaṃ ceti ha sma devatā anvavayanti sa yad indraḥ pūrvaḥ prajigāya tasmād enayor aindrāḥ stotriyānurūpā bhavanti yad v ahaṃ cāhaṃ ceti ha sma devatā anvavayus tasmān nānādevatyāni

6.15.1

अथाह यद् वैश्वदेवं वै तृतीयसवनम् अथ कस्माद् एतान्य् ऐन्द्राणि जागतानि सूक्तानि तृतीयसवन आरम्भणीयानि शस्यन्त इतीन्द्रम् एवैतैर् आरभ्य यन्तीति ब्रूयाद् अथो यज् जागतं वै तृतीयसवनं तज् जगत्काम्यैव तद् यत् किंचात ऊर्ध्वं छन्दः शस्यते तद्ध सर्वं जागतम् भवत्य् एतानि चेद् ऐन्द्राणि जागतानि सूक्तानि तृतीयसवन आरम्भणीयानि शस्यन्ते

athāha yad vaiśvadevaṃ vai tṛtīyasavanam atha kasmād etāny aindrāṇi jāgatāni sūktāni tṛtīyasavana ārambhaṇīyāni śasyanta itīndram evaitair ārabhya yantīti brūyād atho yaj jāgataṃ vai tṛtīyasavanaṃ taj jagatkāmyaiva tad yat kiṃcāta ūrdhvaṃ chandaḥ śasyate taddha sarvaṃ jāgatam bhavaty etāni ced aindrāṇi jāgatāni sūktāni tṛtīyasavana ārambhaṇīyāni śasyante

6.15.2

अथ त्रैष्टुभम् अछावाको ऽन्ततः शंसति सं वां कर्मणेति यद् एव पनाय्यं कर्म तद् एतद् अभिवदति

atha traiṣṭubham achāvāko 'ntataḥ śaṃsati saṃ vāṃ karmaṇeti yad eva panāyyaṃ karma tad etad abhivadati

6.15.3

सम् इषेत्य् अन्नं वा इषो ऽन्नाद्यस्यावरुद्ध्यै

sam iṣety annaṃ vā iṣo 'nnādyasyāvaruddhyai

Aitareyabrāhmaṇa