6.8.3

अहीनाभिर् अछावाकः स्वर्गस्य लोकस्याप्त्या

ahīnābhir achāvākaḥ svargasya lokasyāptyā

6.8.4

उभयीभिर् ब्राह्मणाच्छंसी तेनो स उभौ व्यन्वारभमाण एतीमं चामुं च लोकम् अथो मैत्रावरुणं चाछावाकं चाथो अहीनं चैकाहम् चाथो संवत्सरं चाग्निष्टोमं चैवम् उ स उभौ व्यन्वारभमाण एति

ubhayībhir brāhmaṇācchaṃsī teno sa ubhau vyanvārabhamāṇa etīmaṃ cāmuṃ ca lokam atho maitrāvaruṇaṃ cāchāvākaṃ cātho ahīnaṃ caikāham cātho saṃvatsaraṃ cāgniṣṭomaṃ caivam u sa ubhau vyanvārabhamāṇa eti

6.8.5

अथ तत ऐकाहिका एव तृतीयसवने होत्रकाणाम् परिधानीया भवन्ति प्रतिष्ठा वा एकाहः प्रतिष्ठायाम् एव तद् यज्ञम् अन्ततः प्रतिष्ठापयन्ति

atha tata aikāhikā eva tṛtīyasavane hotrakāṇām paridhānīyā bhavanti pratiṣṭhā vā ekāhaḥ pratiṣṭhāyām eva tad yajñam antataḥ pratiṣṭhāpayanti

6.8.6

अनवानम् प्रातःसवने यजेत्

anavānam prātaḥsavane yajet

6.8.7

एकां द्वे न स्तोमम् अतिशंसेत् तद् यथाभिहेषते पिपासते क्षिप्रम् प्रयच्छेत् तादृक् तद् अथो क्षिप्रं देवेभ्यो ऽन्नाद्यं सोमपीथम् प्रयच्छानीति क्षिप्रं हास्मिंल्लोके प्रतितिष्ठति

ekāṃ dve na stomam atiśaṃset tad yathābhiheṣate pipāsate kṣipram prayacchet tādṛk tad atho kṣipraṃ devebhyo 'nnādyaṃ somapītham prayacchānīti kṣipraṃ hāsmiṃlloke pratitiṣṭhati

6.8.8

अपरिमिताभिर् उत्तरयोः सवनयोर् अपरिमितो वै स्वर्गो लोकः स्वर्गस्य लोकस्याप्त्यै

aparimitābhir uttarayoḥ savanayor aparimito vai svargo lokaḥ svargasya lokasyāptyai

6.8.9

कामं तद्धोता शंसेद् यद्धोत्रकाः पूर्वेद्युः शंसेयुर् यद् वा होता तद्धोत्रकाः प्राणो वै होताङ्गानि होत्रकाः समानो वा अयम् प्राणो ऽङ्गान्य् अनुसंचरति तस्मात् तत् कामं होता शंसेद् यद्धोत्रकाः पूर्वेद्युः शंसेयुर् यद् वा होता तद्धोत्रकाः

kāmaṃ taddhotā śaṃsed yaddhotrakāḥ pūrvedyuḥ śaṃseyur yad vā hotā taddhotrakāḥ prāṇo vai hotāṅgāni hotrakāḥ samāno vā ayam prāṇo 'ṅgāny anusaṃcarati tasmāt tat kāmaṃ hotā śaṃsed yaddhotrakāḥ pūrvedyuḥ śaṃseyur yad vā hotā taddhotrakāḥ

6.8.10

सूक्तान्तैर् होता परिदधद् एत्य् अथ समान्य एव तृतीयसवने होत्रकाणाम् परिधानीया भवन्त्य् आत्मा वै होताङ्गानि होत्रकाः समाना वा इमे ऽङ्गानाम् अन्तास् तस्मात् समान्य एव तृतीयसवने होत्रकाणाम् परिधानीया भवन्ति भवन्ति

sūktāntair hotā paridadhad ety atha samānya eva tṛtīyasavane hotrakāṇām paridhānīyā bhavanty ātmā vai hotāṅgāni hotrakāḥ samānā vā ime 'ṅgānām antās tasmāt samānya eva tṛtīyasavane hotrakāṇām paridhānīyā bhavanti bhavanti

6.9.1

आ त्वा वहन्तु हरय इति प्रातःसवन उन्नीयमानेभ्यो ऽन्वाह वृषण्वतीः पीतवतीः सुतवतीर् मद्वती रूपसमृद्धाः

ā tvā vahantu haraya iti prātaḥsavana unnīyamānebhyo 'nvāha vṛṣaṇvatīḥ pītavatīḥ sutavatīr madvatī rūpasamṛddhāḥ

6.9.2

ऐन्द्रीर् अन्वाहैन्द्रो वै यज्ञः

aindrīr anvāhaindro vai yajñaḥ

6.9.3

गायत्रीर् अन्वाह गायत्रं वै प्रातःसवनम्

gāyatrīr anvāha gāyatraṃ vai prātaḥsavanam

6.9.4

नव न्यूनाः प्रातःसवने ऽन्वाह न्यूने वै रेतः सिच्यते

nava nyūnāḥ prātaḥsavane 'nvāha nyūne vai retaḥ sicyate

6.9.5

दश मध्यंदिने ऽन्वाह न्यूने वै रेतः सिक्तम् मध्यं स्त्रियै प्राप्य स्थविष्ठम् भवति

daśa madhyaṃdine 'nvāha nyūne vai retaḥ siktam madhyaṃ striyai prāpya sthaviṣṭham bhavati

6.9.6

नव न्यूनास् तृतीयसवने ऽन्वाह न्यूनाद् वै प्रजाः प्रजायन्ते

nava nyūnās tṛtīyasavane 'nvāha nyūnād vai prajāḥ prajāyante

6.9.7

तद् यद् एतानि केवलसूक्तान्य् अन्वाह यजमानम् एव तद् गर्भम् भूतम् प्रजनयति यज्ञाद् देवयोन्यै

tad yad etāni kevalasūktāny anvāha yajamānam eva tad garbham bhūtam prajanayati yajñād devayonyai

6.9.8

ते हैके सप्त सप्तान्वाहुः सप्त प्रातःसवने सप्त माध्यंदिने सप्त तृतीयसवने यावत्यो वै पुरोनुवाक्यास् तावत्यो याज्याः सप्त वै प्राञ्चो यजन्ति सप्त वषट्कुर्वन्ति तासाम् एताः पुरोनुवाक्या इति वदन्तः

te haike sapta saptānvāhuḥ sapta prātaḥsavane sapta mādhyaṃdine sapta tṛtīyasavane yāvatyo vai puronuvākyās tāvatyo yājyāḥ sapta vai prāñco yajanti sapta vaṣaṭkurvanti tāsām etāḥ puronuvākyā iti vadantaḥ

6.9.9

तत् तथा न कुर्याद् यजमानस्य ह ते रेतो विलुम्पन्त्य् अथो यजमानम् एव यजमानो हि सूक्तम्

tat tathā na kuryād yajamānasya ha te reto vilumpanty atho yajamānam eva yajamāno hi sūktam

6.9.10

नवभिर् वा एतम् मैत्रावरुणो ऽस्माल् लोकाद् अन्तरिक्षलोकम् अभि प्रवहति दशभिर् अन्तरिक्षलोकाद् अमुं लोकम् अभ्य् अन्तरिक्षलोको हि ज्येष्ठो नवभिर् अमुष्माल् लोकात् स्वर्गं लोकम् अभि

navabhir vā etam maitrāvaruṇo 'smāl lokād antarikṣalokam abhi pravahati daśabhir antarikṣalokād amuṃ lokam abhy antarikṣaloko hi jyeṣṭho navabhir amuṣmāl lokāt svargaṃ lokam abhi

6.9.11

न ह वै ते यजमानं स्वर्गं लोकम् अभि वोﾱहुम् अर्हन्ति ये सप्त सप्तान्वाहुः

na ha vai te yajamānaṃ svargaṃ lokam abhi voﾱhum arhanti ye sapta saptānvāhuḥ

6.9.12

तस्मात् केवलश एव सूक्तान्य् अनुब्रूयात्

tasmāt kevalaśa eva sūktāny anubrūyāt

Aitareyabrāhmaṇa