6.3.6

तद् आहुर् अथ कस्माद् उत्करे तिष्ठन् सुब्रह्मण्याम् आह्वयतीत्य् ऋषयो वै सत्रम् आसत तेषां यो वर्षिष्ठ आसीत् तम् अब्रुवन् सुब्रह्मण्याम् आह्वय त्वं नो नेदिष्ठाद् देवान् ह्वयिष्यसीति वर्षिष्ठम् एवैनं तत् कुर्वन्त्य् अथो वेदिम् एव तत् सर्वाम् प्रीणाति

tad āhur atha kasmād utkare tiṣṭhan subrahmaṇyām āhvayatīty ṛṣayo vai satram āsata teṣāṃ yo varṣiṣṭha āsīt tam abruvan subrahmaṇyām āhvaya tvaṃ no nediṣṭhād devān hvayiṣyasīti varṣiṣṭham evainaṃ tat kurvanty atho vedim eva tat sarvām prīṇāti

6.3.7

तद् आहुः कस्माद् अस्मा ऋषभं दक्षिणाम् अभ्याजन्तीति वृषा वा ऋषभो योषा सुब्रह्मण्या तन् मिथुनं तस्य मिथुनस्य प्रजात्या इति

tad āhuḥ kasmād asmā ṛṣabhaṃ dakṣiṇām abhyājantīti vṛṣā vā ṛṣabho yoṣā subrahmaṇyā tan mithunaṃ tasya mithunasya prajātyā iti

6.3.8

उपांशु पात्नीवतस्याग्नीध्रो यजति रेतो वै पात्नीवत उपांश्व् इव वै रेतसः सिक्तिः

upāṃśu pātnīvatasyāgnīdhro yajati reto vai pātnīvata upāṃśv iva vai retasaḥ siktiḥ

6.3.9

नानुवषट्करोति संस्था वा एषा यद् अनुवषट्कारो नेद्रेतः संस्थापयानीत्य् असंस्थितं वै रेतसः समृद्धं तस्मान् नानुवषट्करोति

nānuvaṣaṭkaroti saṃsthā vā eṣā yad anuvaṣaṭkāro nedretaḥ saṃsthāpayānīty asaṃsthitaṃ vai retasaḥ samṛddhaṃ tasmān nānuvaṣaṭkaroti

6.3.10

नेष्टुर् उपस्थ आसीनो भक्षयति पत्नीभाजनं वै नेष्टाग्निः पत्नीषु रेतो दधाति प्रजात्या अग्निनैव तत् पत्नीषु रेतो दधाति प्रजात्यै

neṣṭur upastha āsīno bhakṣayati patnībhājanaṃ vai neṣṭāgniḥ patnīṣu reto dadhāti prajātyā agninaiva tat patnīṣu reto dadhāti prajātyai

6.3.11

प्रजायते प्रजया पशुभिर् य एवं वेद

prajāyate prajayā paśubhir ya evaṃ veda

6.3.12

दक्षिणा अनु सुब्रह्मण्या संतिष्ठते वाग् वै सुब्रह्मण्यान्नं दक्षिणान्नाद्य एव तद् वाचि यज्ञम् अन्ततः प्रतिष्ठापयन्ति प्रतिष्ठापयन्ति

dakṣiṇā anu subrahmaṇyā saṃtiṣṭhate vāg vai subrahmaṇyānnaṃ dakṣiṇānnādya eva tad vāci yajñam antataḥ pratiṣṭhāpayanti pratiṣṭhāpayanti

6.4.1

देवा वै यज्ञम् अतन्वत तांस् तन्वानान् असुरा अभ्यायन् यज्ञवेशसम् एषां करिष्याम इति तान् दक्षिणत उपायन् यत एषां यज्ञस्य तनिष्ठम् अमन्यन्त ते देवाः प्रतिबुध्य मित्रावरुणौ दक्षिणतः पर्यौहंस् ते मित्रावरुणाभ्याम् एव दक्षिणतः प्रातःसवने ऽसुररक्षांस्य् अपाघ्नत तथैवैतद् यजमाना मित्रावरुणाभ्याम् एव दक्षिणतः प्रातःसवने ऽसुररक्षांस्य् अपघ्नते तस्मान् मैत्रावरुणम् मैत्रावरुणः प्रातःसवने शंसति मित्रावरुणाभ्यां हि देवा दक्षिणतः प्रातःसवने ऽसुररक्षांस्य् अपाघ्नत

devā vai yajñam atanvata tāṃs tanvānān asurā abhyāyan yajñaveśasam eṣāṃ kariṣyāma iti tān dakṣiṇata upāyan yata eṣāṃ yajñasya taniṣṭham amanyanta te devāḥ pratibudhya mitrāvaruṇau dakṣiṇataḥ paryauhaṃs te mitrāvaruṇābhyām eva dakṣiṇataḥ prātaḥsavane 'surarakṣāṃsy apāghnata tathaivaitad yajamānā mitrāvaruṇābhyām eva dakṣiṇataḥ prātaḥsavane 'surarakṣāṃsy apaghnate tasmān maitrāvaruṇam maitrāvaruṇaḥ prātaḥsavane śaṃsati mitrāvaruṇābhyāṃ hi devā dakṣiṇataḥ prātaḥsavane 'surarakṣāṃsy apāghnata

6.4.2

ते वै दक्षिणतो ऽपहता असुरा मध्यतो यज्ञम् प्राविशंस् ते देवाः प्रतिबुध्येन्द्रम् मध्यतो ऽदधुस् त इन्द्रेणैव मध्यतः प्रातःसवने ऽसुररक्षांस्य् अपाघ्नत तथैवैतद् यजमाना इन्द्रेणैव मध्यतः प्रातःसवने ऽसुररक्षांस्य् अपघ्नते तस्माद् ऐन्द्रम् ब्राह्मणाच्छंसी प्रातःसवने शंसतीन्द्रेण हि देवा मध्यतः प्रातःसवने ऽसुररक्षांस्य् अपाघ्नत

te vai dakṣiṇato 'pahatā asurā madhyato yajñam prāviśaṃs te devāḥ pratibudhyendram madhyato 'dadhus ta indreṇaiva madhyataḥ prātaḥsavane 'surarakṣāṃsy apāghnata tathaivaitad yajamānā indreṇaiva madhyataḥ prātaḥsavane 'surarakṣāṃsy apaghnate tasmād aindram brāhmaṇācchaṃsī prātaḥsavane śaṃsatīndreṇa hi devā madhyataḥ prātaḥsavane 'surarakṣāṃsy apāghnata

6.4.3

ते वै मध्यतो ऽपहता असुरा उत्तरतो यज्ञम् प्राविशंस् ते देवाः प्रतिबुध्येन्द्राग्नी उत्तरतः पर्यौहंस् त इन्द्राग्निभ्यां एवोत्तरतः प्रातःसवने ऽसुररक्षांस्य् अपाघ्नत तथैवैतद् यजमाना इन्द्राग्निभ्याम् एवोत्तरतः प्रातःसवने ऽसुररक्षांस्य् अपघ्नते तस्माद् ऐन्द्राग्नम् अछावाकः प्रातःसवने शंसतीन्द्राग्निभ्यां हि देवा उत्तरतः प्रातःसवने ऽसुररक्षांस्य् अपाघ्नत

te vai madhyato 'pahatā asurā uttarato yajñam prāviśaṃs te devāḥ pratibudhyendrāgnī uttarataḥ paryauhaṃs ta indrāgnibhyāṃ evottarataḥ prātaḥsavane 'surarakṣāṃsy apāghnata tathaivaitad yajamānā indrāgnibhyām evottarataḥ prātaḥsavane 'surarakṣāṃsy apaghnate tasmād aindrāgnam achāvākaḥ prātaḥsavane śaṃsatīndrāgnibhyāṃ hi devā uttarataḥ prātaḥsavane 'surarakṣāṃsy apāghnata

6.4.4

ते वा उत्तरतो ऽपहता असुराः पुरस्तात् पर्यद्रवन् समनीकतस् ते देवाः प्रतिबुध्याग्निम् पुरस्तात् प्रातःसवने पर्यौहंस् ते ऽग्निनैव पुरस्तात् प्रातःसवने ऽसुररक्षांस्य् अपाघ्नत तथैवैतद् यजमाना अग्निनैव पुरस्तात् प्रातःसवने ऽसुररक्षांस्य् अपघ्नते तस्माद् आग्नेयम् प्रातःसवनम्

te vā uttarato 'pahatā asurāḥ purastāt paryadravan samanīkatas te devāḥ pratibudhyāgnim purastāt prātaḥsavane paryauhaṃs te 'gninaiva purastāt prātaḥsavane 'surarakṣāṃsy apāghnata tathaivaitad yajamānā agninaiva purastāt prātaḥsavane 'surarakṣāṃsy apaghnate tasmād āgneyam prātaḥsavanam

6.4.5

अप पाप्मानं हते य एवं वेद

apa pāpmānaṃ hate ya evaṃ veda

6.4.6

ते वै पुरस्ताद् अपहता असुराः पश्चात् परीत्य प्राविशंस् ते देवाः प्रतिबुध्य विश्वान् देवान् आत्मानं पश्चात् तृतीयसवने पर्यौहंस् ते विश्वैर् एव देवैर् आत्मभिः पश्चात् तृतीयसवने ऽसुररक्षांस्य् अपाघ्नत तथैवैतद् यजमाना विश्वैर् एव देवैर् आत्मभिः पश्चात् तृतीयसवने ऽसुररक्षांस्य् अपघ्नते तस्माद् वैश्वदेवं तृतीयसवनम्

te vai purastād apahatā asurāḥ paścāt parītya prāviśaṃs te devāḥ pratibudhya viśvān devān ātmānaṃ paścāt tṛtīyasavane paryauhaṃs te viśvair eva devair ātmabhiḥ paścāt tṛtīyasavane 'surarakṣāṃsy apāghnata tathaivaitad yajamānā viśvair eva devair ātmabhiḥ paścāt tṛtīyasavane 'surarakṣāṃsy apaghnate tasmād vaiśvadevaṃ tṛtīyasavanam

6.4.7

अप पाप्मानं हते य एवं वेद

apa pāpmānaṃ hate ya evaṃ veda

6.4.8

ते वै देवा असुरान् एवम् अपाघ्नत सर्वस्माद् एव यज्ञात् ततो वै देवा अभवन् परासुराः

te vai devā asurān evam apāghnata sarvasmād eva yajñāt tato vai devā abhavan parāsurāḥ

6.4.9

भवत्य् आत्मना परास्य द्विषन् पाप्मा भ्रातृव्यो भवति य एवं वेद

bhavaty ātmanā parāsya dviṣan pāpmā bhrātṛvyo bhavati ya evaṃ veda

6.4.10

ते देवा एवं क्ﾱप्तेन यज्ञेनापासुरान् पाप्मानम् अघ्नताजयन् स्वर्गं लोकम्

te devā evaṃ kﾱptena yajñenāpāsurān pāpmānam aghnatājayan svargaṃ lokam

6.4.11

अप ह वै द्विषन्तम् पाप्मानम् भ्रातृव्यं हते जयति स्वर्गं लोकं य एवं वेद यश् चैवं विद्वान् सवनानि कल्पयति

apa ha vai dviṣantam pāpmānam bhrātṛvyaṃ hate jayati svargaṃ lokaṃ ya evaṃ veda yaś caivaṃ vidvān savanāni kalpayati

6.5.1

स्तोत्रियं स्तोत्रियस्यानुरूपं कुर्वन्ति प्रातःसवने ऽहर् एव तद् अह्नो ऽनुरूपं कुर्वन्त्य् अवरेणैव तद् अह्ना परम् अहर् अभ्यारभन्ते

stotriyaṃ stotriyasyānurūpaṃ kurvanti prātaḥsavane 'har eva tad ahno 'nurūpaṃ kurvanty avareṇaiva tad ahnā param ahar abhyārabhante

6.5.2

अथ तथा न मध्यंदिने श्रीर् वै पृष्ठानि तानि तस्मै न तस्थानानि यत् स्तोत्रियं स्तोत्रियस्यानुरूपं कुर्युः

atha tathā na madhyaṃdine śrīr vai pṛṣṭhāni tāni tasmai na tasthānāni yat stotriyaṃ stotriyasyānurūpaṃ kuryuḥ

Aitareyabrāhmaṇa