6.1.3

स ह येनोपोदासर्पत् तद्धाप्य् एतर्ह्य् अर्बुदोदासर्पणी नाम प्रपद् अस्ति

sa ha yenopodāsarpat taddhāpy etarhy arbudodāsarpaṇī nāma prapad asti

6.1.4

तान् ह राजा मदयांचकार ते होचुर् आशीविषो वै नो राजानम् अवेक्षते हन्तास्योष्णीषेणाक्ष्याव् अपिनह्यामेति तथेति तस्य होष्णीषेणाक्ष्याव् अपिनेहुस् तस्माद् उष्णीषम् एव पर्यस्य ग्राव्णो ऽभिष्टुवन्ति तदनुकृति

tān ha rājā madayāṃcakāra te hocur āśīviṣo vai no rājānam avekṣate hantāsyoṣṇīṣeṇākṣyāv apinahyāmeti tatheti tasya hoṣṇīṣeṇākṣyāv apinehus tasmād uṣṇīṣam eva paryasya grāvṇo 'bhiṣṭuvanti tadanukṛti

6.1.5

तान् ह राजा मदयाम् एव चकार ते होचुः स्वेन वै नो मन्त्रेण ग्राव्णो ऽभिष्टौतीति हन्तास्यान्याभिर् ऋग्भिर् मन्त्रम् आपृणचामेति तथेति तस्य हान्याभिर् ऋग्भिर् मन्त्रम् आपपृचुस् ततो हैनान् न मदयांचकार तद् यद् अस्यान्याभिर् ऋग्भिर् मन्त्रम् आपृञ्चन्ति शान्त्या एव

tān ha rājā madayām eva cakāra te hocuḥ svena vai no mantreṇa grāvṇo 'bhiṣṭautīti hantāsyānyābhir ṛgbhir mantram āpṛṇacāmeti tatheti tasya hānyābhir ṛgbhir mantram āpapṛcus tato hainān na madayāṃcakāra tad yad asyānyābhir ṛgbhir mantram āpṛñcanti śāntyā eva

6.1.6

ते ह पाप्मानम् अपजघ्निरे तेषाम् अन्व् अपहतिं सर्पाः पाप्मानम् अपजघ्निरे त एते ऽपहतपाप्मानो हित्वा पूर्वां जीर्णां त्वचं नवयैव प्रयन्ति

te ha pāpmānam apajaghnire teṣām anv apahatiṃ sarpāḥ pāpmānam apajaghnire ta ete 'pahatapāpmāno hitvā pūrvāṃ jīrṇāṃ tvacaṃ navayaiva prayanti

6.1.7

अप पाप्मानं हते य एवं वेद

apa pāpmānaṃ hate ya evaṃ veda

6.2.1

तद् आहुः कियतीभिर् अभिष्टुयाद् इति शतेनेत्य् आहुः शतायुर् वै पुरुषः शतवीर्यः शतेन्द्रिय आयुष्य् एवैनं तद् वीर्य इन्द्रिये दधाति

tad āhuḥ kiyatībhir abhiṣṭuyād iti śatenety āhuḥ śatāyur vai puruṣaḥ śatavīryaḥ śatendriya āyuṣy evainaṃ tad vīrya indriye dadhāti

6.2.2

त्रयस्त्रिंशता वेत्य् आहुस् त्रयस्त्रिंशतो वै स देवानाम् पाप्मनो ऽपाहंस् त्रयस्त्रिंशद् वै तस्य देवा इति

trayastriṃśatā vety āhus trayastriṃśato vai sa devānām pāpmano 'pāhaṃs trayastriṃśad vai tasya devā iti

6.2.3

अपरिमिताभिर् अभिष्टुयाद् अपरिमितो वै प्रजापतिः प्रजापतेर् वा एषा होत्रा यद् ग्रावस्तोत्रीया तस्यां सर्वे कामा अवरुध्यन्ते स यद् अपरिमिताभिर् अभिष्टौति सर्वेषां कामानाम् अवरुद्ध्यै

aparimitābhir abhiṣṭuyād aparimito vai prajāpatiḥ prajāpater vā eṣā hotrā yad grāvastotrīyā tasyāṃ sarve kāmā avarudhyante sa yad aparimitābhir abhiṣṭauti sarveṣāṃ kāmānām avaruddhyai

6.2.4

सर्वान् कामान् अवरुन्द्धे य एवं वेद

sarvān kāmān avarunddhe ya evaṃ veda

6.2.5

तस्माद् अपरिमिताभिर् एवाभिष्टुयात्

tasmād aparimitābhir evābhiṣṭuyāt

6.2.6

तद् आहुः कथम् अभिष्टुयाद् इत्य् अक्षरशः चतुरक्षरशः पच्छः अर्धर्चशः ऋक्शः इति तद् यद् ऋक्शो न तद् अवकल्पते ऽथ यत् पच्छो नो एव तद् अवकल्पते ऽथ यद् अक्षरशश् चतुरक्षरशो वि तथा छन्दांसि लुप्येरन् बहूनि तथाक्षराणि हीयेरन्न् अर्धर्चश एवाभिष्टुयात् प्रतिष्ठाया एव

tad āhuḥ katham abhiṣṭuyād ity akṣaraśaḥ caturakṣaraśaḥ pacchaḥ ardharcaśaḥ ṛkśaḥ iti tad yad ṛkśo na tad avakalpate 'tha yat paccho no eva tad avakalpate 'tha yad akṣaraśaś caturakṣaraśo vi tathā chandāṃsi lupyeran bahūni tathākṣarāṇi hīyerann ardharcaśa evābhiṣṭuyāt pratiṣṭhāyā eva

6.2.7

द्विप्रतिष्ठो वै पुरुषश् चतुष्पादाः पशवो यजमानम् एव तद् द्विप्रतिष्ठं चतुष्पात्सु पशुषु प्रतिष्ठापयति तस्माद् अर्धर्चश एवाभिष्टुयात्

dvipratiṣṭho vai puruṣaś catuṣpādāḥ paśavo yajamānam eva tad dvipratiṣṭhaṃ catuṣpātsu paśuṣu pratiṣṭhāpayati tasmād ardharcaśa evābhiṣṭuyāt

6.2.8

तद् आहुर् यन् मध्यंदिने मध्यंदिन एव ग्राव्णो ऽभिष्टौति कथम् अस्येतरयोः सवनयोर् अभिष्टुतम् भवतीति यद् एव गायत्रीभिर् अभिष्टौति गायत्रं वै प्रातःसवनं तेन प्रातःसवने ऽथ यज् जगतीभिर् अभिष्टौति जागतं वै तृतीयसवनं तेन तृतीयसवने

tad āhur yan madhyaṃdine madhyaṃdina eva grāvṇo 'bhiṣṭauti katham asyetarayoḥ savanayor abhiṣṭutam bhavatīti yad eva gāyatrībhir abhiṣṭauti gāyatraṃ vai prātaḥsavanaṃ tena prātaḥsavane 'tha yaj jagatībhir abhiṣṭauti jāgataṃ vai tṛtīyasavanaṃ tena tṛtīyasavane

6.2.9

एवम् उ हास्य मध्यंदिने मध्यंदिन एव ग्राव्णो ऽभिष्टुवतः सर्वेषु सवनेष्व् अभिष्टुतम् भवति य एवं वेद

evam u hāsya madhyaṃdine madhyaṃdina eva grāvṇo 'bhiṣṭuvataḥ sarveṣu savaneṣv abhiṣṭutam bhavati ya evaṃ veda

6.2.10

तद् आहुर् यद् अध्वर्युर् एवान्यान् ऋत्विजः संप्रेष्यत्य् अथ कस्माद् एष एताम् असम्प्रेषितः प्रतिपद्यत इति मनो वै ग्रावस्तोत्रीयासम्प्रेषितं वा इदं मनस् तस्माद् एष एताम् असम्प्रेषितः प्रतिपद्यते

tad āhur yad adhvaryur evānyān ṛtvijaḥ saṃpreṣyaty atha kasmād eṣa etām asampreṣitaḥ pratipadyata iti mano vai grāvastotrīyāsampreṣitaṃ vā idaṃ manas tasmād eṣa etām asampreṣitaḥ pratipadyate

6.3.1

वाग् वै सुब्रह्मण्या तस्यै सोमो राजा वत्सः सोमे राजनि क्रीते सुब्रह्मण्याम् आह्वयन्ति यथा धेनुम् उपह्वयेत् तेन वत्सेन यजमानाय सर्वान् कामान् दुहे

vāg vai subrahmaṇyā tasyai somo rājā vatsaḥ some rājani krīte subrahmaṇyām āhvayanti yathā dhenum upahvayet tena vatsena yajamānāya sarvān kāmān duhe

6.3.2

सर्वान् हास्मै कामान् वाग् दुहे य एवं वेद

sarvān hāsmai kāmān vāg duhe ya evaṃ veda

6.3.3

तद् आहुः किं सुब्रह्मण्यायै सुब्रह्मण्यात्वम् इति वाग् एवेति ब्रूयाद् वाग् वै ब्रह्म च सुब्रह्म चेति

tad āhuḥ kiṃ subrahmaṇyāyai subrahmaṇyātvam iti vāg eveti brūyād vāg vai brahma ca subrahma ceti

6.3.4

तद् आहुर् अथ कस्माद् एनम् पुमांसं सन्तं स्त्रीम् इवाचक्षत इति वाग्घि सुब्रह्मण्येति ब्रूयात् तेनेति

tad āhur atha kasmād enam pumāṃsaṃ santaṃ strīm ivācakṣata iti vāgghi subrahmaṇyeti brūyāt teneti

6.3.5

तद् आहुर् यद् अन्तर्वेदीतर ऋत्विज आर्त्विज्यं कुर्वन्ति बहिर्वेदि सुब्रह्मण्या कथम् अस्यान्तर्वेद्य् आर्त्विज्यं कृतम् भवतीति वेदेर् वा उत्करम् उत्किरन्ति यद् एवोत्करे तिष्ठन्न् आह्वयतीति ब्रूयात् तेनेति

tad āhur yad antarvedītara ṛtvija ārtvijyaṃ kurvanti bahirvedi subrahmaṇyā katham asyāntarvedy ārtvijyaṃ kṛtam bhavatīti veder vā utkaram utkiranti yad evotkare tiṣṭhann āhvayatīti brūyāt teneti

Aitareyabrāhmaṇa