5.29.8

तस्माद् उदिते होतव्यम्

tasmād udite hotavyam

5.30.1

एते ह वै संवत्सरस्य चक्रे यद् अहोरात्रे ताभ्याम् एव तत् संवत्सरम् एति स यो ऽनुदिते जुहोति यथैकतश्चक्रेण यायात् तादृक् तद् अथ य उदिते जुहोति यथोभयतश्चक्रेण यान् क्षिप्रम् अध्वानं समश्नुवीत तादृक् तत्

ete ha vai saṃvatsarasya cakre yad ahorātre tābhyām eva tat saṃvatsaram eti sa yo 'nudite juhoti yathaikataścakreṇa yāyāt tādṛk tad atha ya udite juhoti yathobhayataścakreṇa yān kṣipram adhvānaṃ samaśnuvīta tādṛk tat

5.30.2

तद् एषाभि यज्ञगाथा गीयते

tad eṣābhi yajñagāthā gīyate

5.30.3

बृहद्रथंतराभ्याम् इदम् एति युक्तं यद् भूतं भविष्यच् चापि सर्वं ताभ्याम् इयाद् अग्नीन् आधाय धीरो दिवैवान्यज् जुहुयान् नक्तम् अन्यद् इति

bṛhadrathaṃtarābhyām idam eti yuktaṃ yad bhūtaṃ bhaviṣyac cāpi sarvaṃ tābhyām iyād agnīn ādhāya dhīro divaivānyaj juhuyān naktam anyad iti

5.30.4

राथंतरी वै रात्र्य् अहर् बार्हतम् अग्निर् वै रथंतरम् आदित्यो बृहद् एते ह वा एनं देवते ब्रध्नस्य विष्टपं स्वर्गं लोकं गमयतो य एवं विद्वान् उदिते जुहोति तस्माद् उदिते होतव्यम्

rāthaṃtarī vai rātry ahar bārhatam agnir vai rathaṃtaram ādityo bṛhad ete ha vā enaṃ devate bradhnasya viṣṭapaṃ svargaṃ lokaṃ gamayato ya evaṃ vidvān udite juhoti tasmād udite hotavyam

5.30.5

तद् एषाभि यज्ञगाथा गीयते

tad eṣābhi yajñagāthā gīyate

5.30.6

यथा ह वा स्थूरिणैकेन यायाद् अकृत्वान्यद् उपयोजनाय एवं यन्ति ते बहवो जनासः पुरोदयाज् जुह्वति ये ऽग्निहोत्रम् इति

yathā ha vā sthūriṇaikena yāyād akṛtvānyad upayojanāya evaṃ yanti te bahavo janāsaḥ purodayāj juhvati ye 'gnihotram iti

5.30.7

तां वा एतां देवताम् प्रयतीं सर्वम् इदम् अनुप्रैति यद् इदं किंचैतस्यै हीदं देवताया अनुचरं सर्वं यद् इदं किंच सैषानुचरवती देवता

tāṃ vā etāṃ devatām prayatīṃ sarvam idam anupraiti yad idaṃ kiṃcaitasyai hīdaṃ devatāyā anucaraṃ sarvaṃ yad idaṃ kiṃca saiṣānucaravatī devatā

5.30.8

विन्दते ह वा अनुचरम् भवत्य् अस्यानुचरो य एवं वेद

vindate ha vā anucaram bhavaty asyānucaro ya evaṃ veda

5.30.9

स वा एष एकातिथिः स एष जुह्वत्सु वसति

sa vā eṣa ekātithiḥ sa eṣa juhvatsu vasati

5.30.10

तद् यद् अदो गाथा भवति

tad yad ado gāthā bhavati

5.30.11

अनेनसम् एनसा सो ऽभिशस्ताद् एनस्वतो वापहराद् एनः एकातिथिम् अप सायं रुणद्धि बिसानि स्तेनो अप सो जहारेति

anenasam enasā so 'bhiśastād enasvato vāpaharād enaḥ ekātithim apa sāyaṃ ruṇaddhi bisāni steno apa so jahāreti

5.30.12

एष ह वै स एकातिथिः स एष जुह्वत्सु वसत्य् एतां वाव स देवताम् अपरुणद्धि यो ऽलम् अग्निहोत्राय सन् नाग्निहोत्रं जुहोति तम् एषा देवतापरोद्धापरुणद्ध्य् अस्माच् च लोकाद् अमुष्माच् चोभाभ्यां यो ऽलम् अग्निहोत्राय सन् नाग्निहोत्रं जुहोति

eṣa ha vai sa ekātithiḥ sa eṣa juhvatsu vasaty etāṃ vāva sa devatām aparuṇaddhi yo 'lam agnihotrāya san nāgnihotraṃ juhoti tam eṣā devatāparoddhāparuṇaddhy asmāc ca lokād amuṣmāc cobhābhyāṃ yo 'lam agnihotrāya san nāgnihotraṃ juhoti

5.30.13

तस्माद् यो ऽलम् अग्निहोत्राय स्याज् जुहुयात्

tasmād yo 'lam agnihotrāya syāj juhuyāt

5.30.14

तस्माद् आहुर् न सायम् अतिथिर् अपरुध्य इति

tasmād āhur na sāyam atithir aparudhya iti

5.30.15

एतद्ध स्म वै तद् विद्वान् नगरी जानश्रुतेय उदितहोमिनम् ऐकादशाक्षम् मानुतन्तव्यम् उवाच प्रजायाम् एनं विज्ञाता स्मो यदि विद्वान् वा जुहोत्य् अविद्वान् वेति तस्यो हैकादशाक्षे राष्ट्रम् इव प्रजा बभूव राष्ट्रम् इव ह वा अस्य प्रजा भवति य एवं विद्वान् उदिते जुहोति तस्माद् उदिते होतव्यम्

etaddha sma vai tad vidvān nagarī jānaśruteya uditahominam aikādaśākṣam mānutantavyam uvāca prajāyām enaṃ vijñātā smo yadi vidvān vā juhoty avidvān veti tasyo haikādaśākṣe rāṣṭram iva prajā babhūva rāṣṭram iva ha vā asya prajā bhavati ya evaṃ vidvān udite juhoti tasmād udite hotavyam

5.31.1

उद्यन्न् उ खलु वा आदित्य आहवनीयेन रश्मीन् संदधाति स यो ऽनुदिते जुहोति यथा कुमाराय वा वत्साय वाजाताय स्तनम् प्रतिदध्यात् तादृक् तद् अथ य उदिते जुहोति यथा कुमाराय वा वत्साय वा जाताय स्तनम् प्रतिदध्यात् तादृक् तत् तम् अस्मै प्रतिधीयमानम् उभयोर् लोकयोर् अन्नाद्यम् अनु प्रतिधीयते ऽस्माच् च लोकाद् अमुष्माच् चोभाभ्याम्

udyann u khalu vā āditya āhavanīyena raśmīn saṃdadhāti sa yo 'nudite juhoti yathā kumārāya vā vatsāya vājātāya stanam pratidadhyāt tādṛk tad atha ya udite juhoti yathā kumārāya vā vatsāya vā jātāya stanam pratidadhyāt tādṛk tat tam asmai pratidhīyamānam ubhayor lokayor annādyam anu pratidhīyate 'smāc ca lokād amuṣmāc cobhābhyām

5.31.2

स यो ऽनुदिते जुहोति यथा पुरुषाय वा हस्तिने वाप्रयते हस्त आदध्यात् तादृक् तद् अथ य उदिते जुहोति यथा पुरुषाय वा हस्तिने वा प्रयते हस्त आदध्यात् तादृक् तत् तम् एष एतेनैव हस्तेनोर्ध्वं हृत्वा स्वर्गे लोक आदधाति य एवं विद्वान् उदिते जुहोति तस्माद् उदिते होतव्यम्

sa yo 'nudite juhoti yathā puruṣāya vā hastine vāprayate hasta ādadhyāt tādṛk tad atha ya udite juhoti yathā puruṣāya vā hastine vā prayate hasta ādadhyāt tādṛk tat tam eṣa etenaiva hastenordhvaṃ hṛtvā svarge loka ādadhāti ya evaṃ vidvān udite juhoti tasmād udite hotavyam

5.31.3

उद्यन्न् उ खलु वा आदित्यः सर्वाणि भूतानि प्रणयति तस्माद् एनम् प्राण इत्य् आचक्षते प्राणे हास्य सम्प्रति हुतम् भवति य एवं विद्वान् उदिते जुहोति तस्माद् उदिते होतव्यम्

udyann u khalu vā ādityaḥ sarvāṇi bhūtāni praṇayati tasmād enam prāṇa ity ācakṣate prāṇe hāsya samprati hutam bhavati ya evaṃ vidvān udite juhoti tasmād udite hotavyam

5.31.4

एष ह वै सत्यं वदन् सत्ये जुहोति यो ऽस्तमिते सायं जुहोत्य् उदिते प्रातर् भूर् भुवः स्वर् औम् अग्निर् ज्योतिर् ज्योतिर् अग्निर् इति सायं जुहोति भूर् भुवः स्वर् औं सूर्यो ज्योतिर् ज्योतिः सूर्य इति प्रातः सत्यं हास्य वदतः सत्ये हुतं भवति य एवं विद्वान् उदिते जुहोति तस्माद् उदिते होतव्यम्

eṣa ha vai satyaṃ vadan satye juhoti yo 'stamite sāyaṃ juhoty udite prātar bhūr bhuvaḥ svar aum agnir jyotir jyotir agnir iti sāyaṃ juhoti bhūr bhuvaḥ svar auṃ sūryo jyotir jyotiḥ sūrya iti prātaḥ satyaṃ hāsya vadataḥ satye hutaṃ bhavati ya evaṃ vidvān udite juhoti tasmād udite hotavyam

Aitareyabrāhmaṇa