5.20.4

यच्छुचिवद् यत् सत्यवद् यत् क्षेतिवद् यद् गतवद् यद् ओकवत्

yacchucivad yat satyavad yat kṣetivad yad gatavad yad okavat

5.20.5

यत् कृतं यत् तृतीयस्याह्नो रूपम् एतानि वै नवमस्याह्नो रूपाणि

yat kṛtaṃ yat tṛtīyasyāhno rūpam etāni vai navamasyāhno rūpāṇi

5.20.6

अगन्म महा नमसा यविष्ठम् इति नवमस्याह्न आज्यं भवति गतवन् नवमे ऽहनि नवमस्याह्नो रूपम्

aganma mahā namasā yaviṣṭham iti navamasyāhna ājyaṃ bhavati gatavan navame 'hani navamasyāhno rūpam

5.20.7

तद् उ त्रैष्टुभं त्रिष्टुप्प्रातःसवन एष त्र्यहः

tad u traiṣṭubhaṃ triṣṭupprātaḥsavana eṣa tryahaḥ

5.20.8

प्र वीरया शुचयो दद्रिरे ते ते सत्येन मनसा दीध्याना दिवि क्षयन्ता रजसः पृथिव्याम् आ विश्ववाराश्विना गतं नो ऽयं सोम इन्द्र तुभ्यं सुन्व आ तु प्र ब्रह्माणो अङ्गिरसो नक्षन्त सरस्वतीं देवयन्तो हवन्त आ नो दिवो बृहतः पर्वताद् आ सरस्वत्य् अभि नो नेषि वस्य इति प्रौगं शुचिवत् सत्यवत् क्षेतिवद् गतवद् ओकवन् नवमे ऽहनि नवमस्याह्नो रूपम्

pra vīrayā śucayo dadrire te te satyena manasā dīdhyānā divi kṣayantā rajasaḥ pṛthivyām ā viśvavārāśvinā gataṃ no 'yaṃ soma indra tubhyaṃ sunva ā tu pra brahmāṇo aṅgiraso nakṣanta sarasvatīṃ devayanto havanta ā no divo bṛhataḥ parvatād ā sarasvaty abhi no neṣi vasya iti praugaṃ śucivat satyavat kṣetivad gatavad okavan navame 'hani navamasyāhno rūpam

5.20.9

तद् उ त्रैष्टुभं त्रिष्टुप्प्रातःसवन एष त्र्यहः

tad u traiṣṭubhaṃ triṣṭupprātaḥsavana eṣa tryahaḥ

5.20.10

तं तम् इद् राधसे महे त्रय इन्द्रस्य सोमा इन्द्र नेदीय एद् इहि प्र नूनम् ब्रह्मणस्पतिर् अग्निर् नेता त्वं सोम क्रतुभिः पिन्वन्त्य् अपो नकिः सुदासो रथम् इति तृतीयेनाह्ना समान आतानो नवमे ऽहनि नवमस्याह्नो रूपम्

taṃ tam id rādhase mahe traya indrasya somā indra nedīya ed ihi pra nūnam brahmaṇaspatir agnir netā tvaṃ soma kratubhiḥ pinvanty apo nakiḥ sudāso ratham iti tṛtīyenāhnā samāna ātāno navame 'hani navamasyāhno rūpam

5.20.11

इन्द्रः स्वाहा पिबतु यस्य सोम इति सूक्तम् अन्तो वै स्वाहाकारो ऽन्तो नवमम् अहर् नवमे ऽहनि नवमस्याह्नो रूपम्

indraḥ svāhā pibatu yasya soma iti sūktam anto vai svāhākāro 'nto navamam ahar navame 'hani navamasyāhno rūpam

5.20.12

गायत् साम नभन्यं यथा वेर् इति सूक्तम् अर्चाम तद् वावृधानं स्वर्वद् इत्य् अन्तो वै स्वर् अन्तो नवमम् अहर् नवमे ऽहनि नवमस्याह्नो रूपम्

gāyat sāma nabhanyaṃ yathā ver iti sūktam arcāma tad vāvṛdhānaṃ svarvad ity anto vai svar anto navamam ahar navame 'hani navamasyāhno rūpam

5.20.13

तिष्ठा हरी रथ आ युज्यमानेति सूक्तम् अन्तो वै स्थितम् अन्तो नवमम् अहर् नवमे ऽहनि नवमस्याह्नो रूपम्

tiṣṭhā harī ratha ā yujyamāneti sūktam anto vai sthitam anto navamam ahar navame 'hani navamasyāhno rūpam

5.20.14

इमा उ त्वा पुरुतमस्य कारोर् इति सूक्तं धियो रथेष्ठाम् इत्य् अन्तो वै स्थितम् अन्तो नवमम् अहर् नवमे ऽहनि नवमस्याह्नो रूपम्

imā u tvā purutamasya kāror iti sūktaṃ dhiyo ratheṣṭhām ity anto vai sthitam anto navamam ahar navame 'hani navamasyāhno rūpam

5.20.15

तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते

tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate

5.20.16

प्र मन्दिने पितुमद् अर्चता वच इति सूक्तं समानोदर्कं नवमे ऽहनि नवमस्याह्नो रूपम्

pra mandine pitumad arcatā vaca iti sūktaṃ samānodarkaṃ navame 'hani navamasyāhno rūpam

5.20.17

तद् उ जागतं जगत्यो वा एतस्य त्र्यहस्य मध्यंदिनं वहन्ति तद् वै तच् छन्दो वहति यस्मिन् निविद्धीयते तस्माज् जगतीषु निविदं दधाति

tad u jāgataṃ jagatyo vā etasya tryahasya madhyaṃdinaṃ vahanti tad vai tac chando vahati yasmin nividdhīyate tasmāj jagatīṣu nividaṃ dadhāti

5.20.18

मिथुनानि सूक्तानि शस्यन्ते त्रैष्टुभानि च जागतानि च मिथुनं वै पशवः पशवश् छन्दोमाः पशूनाम् अवरुद्ध्यै

mithunāni sūktāni śasyante traiṣṭubhāni ca jāgatāni ca mithunaṃ vai paśavaḥ paśavaś chandomāḥ paśūnām avaruddhyai

5.20.19

पञ्च सूक्तानि शस्यन्ते पञ्चपदा पङ्क्तिः पाङ्क्तो यज्ञः पाङ्क्ताः पशवः पशवश् छन्दोमाः पशूनाम् अवरुद्ध्यै

pañca sūktāni śasyante pañcapadā paṅktiḥ pāṅkto yajñaḥ pāṅktāḥ paśavaḥ paśavaś chandomāḥ paśūnām avaruddhyai

5.20.20

त्वाम् इद्धि हवामहे त्वं ह्य् एहि चेरव इति बृहत्पृष्ठम् भवति नवमे ऽहनि

tvām iddhi havāmahe tvaṃ hy ehi cerava iti bṛhatpṛṣṭham bhavati navame 'hani

5.20.21

यद् वावानेति धाय्याच्युताभि त्वा शूर नोनुम इति रथंतरस्य योनिम् अनु निवर्तयति राथंतरं ह्य् एतद् अहर् आयतनेनेन्द्र त्रिधातु शरणम् इति सामप्रगाथस् त्रिवान् नवमे ऽहनि नवमस्याह्नो रूपं त्यम् ऊ षु वाजिनं देवजूतम् इति तार्क्ष्यो ऽच्युतः

yad vāvāneti dhāyyācyutābhi tvā śūra nonuma iti rathaṃtarasya yonim anu nivartayati rāthaṃtaraṃ hy etad ahar āyatanenendra tridhātu śaraṇam iti sāmapragāthas trivān navame 'hani navamasyāhno rūpaṃ tyam ū ṣu vājinaṃ devajūtam iti tārkṣyo 'cyutaḥ

5.21.1

सं च त्वे जग्मुर् गिर इन्द्र पूर्वीर् इति सूक्तं गतवन् नवमे ऽहनि नवमस्याह्नो रूपम्

saṃ ca tve jagmur gira indra pūrvīr iti sūktaṃ gatavan navame 'hani navamasyāhno rūpam

5.21.2

कदा भुवन् रथक्षयाणि ब्रह्मेति सूक्तं क्षेतिवद् अन्तरूपं क्षेतीव वा अन्तं गत्वा नवमे ऽहनि नवमस्याह्नो रूपम्

kadā bhuvan rathakṣayāṇi brahmeti sūktaṃ kṣetivad antarūpaṃ kṣetīva vā antaṃ gatvā navame 'hani navamasyāhno rūpam

Aitareyabrāhmaṇa