5.18.8

कुविद् अङ्ग नमसा ये वृधासः पीवोअन्नाṁ रयिवृधः सुमेधा उच्छन्न् उषसः सुदिना अरिप्रा उशन्ता दूता न दभाय गोपा यावत् तरस् तन्वो यावद् ओजः प्रति वां सूर उदिते सूक्तैर् धेनुः प्रत्नस्य काम्यं दुहाना ब्रह्मा णा इन्द्रोप याहि विद्वान् ऊर्ध्वो अग्निः सुमतिं वस्वो अश्रेद् उत स्या नः सरस्वती जुषाणेति प्रौगम् प्रतिवद् अन्तर्वद् द्विहूतवद् ऊर्ध्ववद् अष्टमे ऽहन्य् अष्टमस्याह्नो रूपम्

kuvid aṅga namasā ye vṛdhāsaḥ pīvoannāṁ rayivṛdhaḥ sumedhā ucchann uṣasaḥ sudinā ariprā uśantā dūtā na dabhāya gopā yāvat taras tanvo yāvad ojaḥ prati vāṃ sūra udite sūktair dhenuḥ pratnasya kāmyaṃ duhānā brahmā ṇā indropa yāhi vidvān ūrdhvo agniḥ sumatiṃ vasvo aśred uta syā naḥ sarasvatī juṣāṇeti praugam prativad antarvad dvihūtavad ūrdhvavad aṣṭame 'hany aṣṭamasyāhno rūpam

5.18.9

तद् उ त्रैष्टुभं त्रिष्टुप्प्रातःसवन एष त्र्यहः

tad u traiṣṭubhaṃ triṣṭupprātaḥsavana eṣa tryahaḥ

5.18.10

विश्वानरस्य वस् पतिम् इन्द्र इत् सोमपा एक इन्द्र नेदीय एद् इह्य् उत्तिष्ठ ब्रह्मणस्पते ऽग्निर् नेता त्वं सोम क्रतुभिः पिन्वन्त्य् अपो बृहद् इन्द्राय गायतेति द्वितीयेनाह्ना समान आतानो ऽष्टमे ऽहन्य् अष्टमस्याह्नो रूपम्

viśvānarasya vas patim indra it somapā eka indra nedīya ed ihy uttiṣṭha brahmaṇaspate 'gnir netā tvaṃ soma kratubhiḥ pinvanty apo bṛhad indrāya gāyateti dvitīyenāhnā samāna ātāno 'ṣṭame 'hany aṣṭamasyāhno rūpam

5.18.11

शंसा महाम् इन्द्रं यस्मिन् विश्वा इति सूक्तम् महद्वद् अष्टमे ऽहन्य् अष्टमस्याह्नो रूपम्

śaṃsā mahām indraṃ yasmin viśvā iti sūktam mahadvad aṣṭame 'hany aṣṭamasyāhno rūpam

5.18.12

महश् चित् त्वम् इन्द्र यत एतान् इति सूक्तम् महद्वद् अष्टमे ऽहन्य् अष्टमस्याह्नो रूपम्

mahaś cit tvam indra yata etān iti sūktam mahadvad aṣṭame 'hany aṣṭamasyāhno rūpam

5.18.13

पिबा सोमम् अभि यम् उग्र तर्द इति सूक्तम् ऊर्वं गव्यम् महि गृणान इन्द्रेति महद्वद् अष्टमे ऽहन्य् अष्टमस्याह्नो रूपम्

pibā somam abhi yam ugra tarda iti sūktam ūrvaṃ gavyam mahi gṛṇāna indreti mahadvad aṣṭame 'hany aṣṭamasyāhno rūpam

5.18.14

महाṁ इन्द्रो नृवद् आ चर्षणिप्रा इति सूक्तम् महद्वद् अष्टमे ऽहनि अष्टमस्याह्नो रूपम्

mahāṁ indro nṛvad ā carṣaṇiprā iti sūktam mahadvad aṣṭame 'hani aṣṭamasyāhno rūpam

5.18.15

तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते

tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate

5.18.16

तम् अस्य द्यावापृथिवी सचेतसेति सूक्तं यद् ऐत् कृण्वानो महिमानम् इन्द्रियम् इति महद्वद् अष्टमे ऽहन्य् अष्टमस्याह्नो रूपम्

tam asya dyāvāpṛthivī sacetaseti sūktaṃ yad ait kṛṇvāno mahimānam indriyam iti mahadvad aṣṭame 'hany aṣṭamasyāhno rūpam

5.18.17

तद् उ जागतं जगत्यो वा एतस्य त्र्यहस्य मध्यंदिनं वहन्ति तद् वै तच् छन्दो वहति यस्मिन् निविद् धीयते तस्माज्जगतीषु निविदं दधाति

tad u jāgataṃ jagatyo vā etasya tryahasya madhyaṃdinaṃ vahanti tad vai tac chando vahati yasmin nivid dhīyate tasmājjagatīṣu nividaṃ dadhāti

5.18.18

मिथुनानि सूक्तानि शस्यन्ते त्रैष्टुभानि च जागतानि च मिथुनं वै पशवः पशवश् छन्दोमाः पशूनाम् अवरुद्ध्यै

mithunāni sūktāni śasyante traiṣṭubhāni ca jāgatāni ca mithunaṃ vai paśavaḥ paśavaś chandomāḥ paśūnām avaruddhyai

5.18.19

महद्वन्ति सूक्तानि शस्यन्ते महद् वा अन्तरिक्षम् अन्तरिक्षस्याप्त्यै

mahadvanti sūktāni śasyante mahad vā antarikṣam antarikṣasyāptyai

5.18.20

पञ्च सूक्तानि शस्यन्ते पञ्चपदा पङ्क्तिः पाङ्क्तो यज्ञः पाङ्क्ताः पशवः पशवश् छन्दोमाः पशूनाम् अवरुद्ध्यै

pañca sūktāni śasyante pañcapadā paṅktiḥ pāṅkto yajñaḥ pāṅktāḥ paśavaḥ paśavaś chandomāḥ paśūnām avaruddhyai

5.18.21

अभि त्वा शूर नोनुमो ऽभि त्वा पूर्वपीतय इति रथंतरं पृष्ठं भवत्य् अष्टमे ऽहनि

abhi tvā śūra nonumo 'bhi tvā pūrvapītaya iti rathaṃtaraṃ pṛṣṭhaṃ bhavaty aṣṭame 'hani

5.18.22

यद् वावानेति धाय्याच्युता

yad vāvāneti dhāyyācyutā

5.18.23

त्वाम् इद्धि हवामह इति बृहतो योनिम् अनु निवर्तयति बार्हतं ह्य् एतद् अहर् आयतनेन

tvām iddhi havāmaha iti bṛhato yonim anu nivartayati bārhataṃ hy etad ahar āyatanena

5.18.24

उभयं शृणवच्च न इति सामप्रगाथो यच् चेदम् अद्य यद् उ च ह्य आसीद् इति बार्हते ऽहन्य् अष्टमे ऽहनि अष्टमस्याह्नो रूपम्

ubhayaṃ śṛṇavacca na iti sāmapragātho yac cedam adya yad u ca hya āsīd iti bārhate 'hany aṣṭame 'hani aṣṭamasyāhno rūpam

5.18.25

त्यम् ऊ षु वाजिनं देवजूतम् इति तार्क्ष्यो ऽच्युतः

tyam ū ṣu vājinaṃ devajūtam iti tārkṣyo 'cyutaḥ

5.19.1

अपूर्व्या पुरुतमान्य् अस्मा इति सूक्तम् महे वीराय तवसे तुरायेति महद्वद् अष्टमे ऽहनि अष्टमस्याह्नो रूपं तां सु ते कीर्तिम् मघवन् महित्वेति सूक्तम् महद्वद् अष्टमे ऽहनि अष्टमस्याह्नो रूपं त्वम् महाṁ इन्द्र यो ह शुष्मैर् इति सूक्तम् महद्वद् अष्टमे ऽहनि अष्टमस्याह्नो रूपं त्वम् महाṁ इन्द्र तुभ्यं ह क्षा इति सूक्तम् महद्वद् अष्टमे ऽहन्य् अष्टमस्याह्नो रूपम्

apūrvyā purutamāny asmā iti sūktam mahe vīrāya tavase turāyeti mahadvad aṣṭame 'hani aṣṭamasyāhno rūpaṃ tāṃ su te kīrtim maghavan mahitveti sūktam mahadvad aṣṭame 'hani aṣṭamasyāhno rūpaṃ tvam mahāṁ indra yo ha śuṣmair iti sūktam mahadvad aṣṭame 'hani aṣṭamasyāhno rūpaṃ tvam mahāṁ indra tubhyaṃ ha kṣā iti sūktam mahadvad aṣṭame 'hany aṣṭamasyāhno rūpam

5.19.2

तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते

tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate

Aitareyabrāhmaṇa