5.15.8

ब्रह्मणा हि स क्ﾱप्तः

brahmaṇā hi sa kﾱptaḥ

5.15.5

अहश् च कृष्णम् अहर् अर्जुनं चेत्य् आग्निमारुतस्य प्रतिपद् अहश् चाहश् चेति पुनरावृत्तम् पुनर्निनृत्तं षष्ठे ऽहनि षष्ठस्याह्नो रूपम्

ahaś ca kṛṣṇam ahar arjunaṃ cety āgnimārutasya pratipad ahaś cāhaś ceti punarāvṛttam punarninṛttaṃ ṣaṣṭhe 'hani ṣaṣṭhasyāhno rūpam

5.15.6

मध्वो वो नाम मारुतं यजत्रा इति मारुतम् बह्वभिव्याहृत्यम् अन्तो वै बह्व् अन्तः षष्ठम् अहः षष्ठे ऽहनि षष्ठस्याह्नो रूपम्

madhvo vo nāma mārutaṃ yajatrā iti mārutam bahvabhivyāhṛtyam anto vai bahv antaḥ ṣaṣṭham ahaḥ ṣaṣṭhe 'hani ṣaṣṭhasyāhno rūpam

5.15.7

जातवेदसे सुनवाम सोमम् इति जातवेदस्याच्युता

jātavedase sunavāma somam iti jātavedasyācyutā

5.15.8

स प्रत्नथा सहसा जायमान इति जातवेदस्यं समानोदर्कं षष्ठे ऽहनि षष्ठस्याह्नो रूपम्

sa pratnathā sahasā jāyamāna iti jātavedasyaṃ samānodarkaṃ ṣaṣṭhe 'hani ṣaṣṭhasyāhno rūpam

5.15.9

धारयन् धारयन्न् इति शंसति प्रस्रंसाद् वा अन्तस्य बिभाय तद् यथा पुनराग्रन्थम् पुनर्निग्रन्थम् अन्तम् बध्नीयान् मयूखं वान्ततो धारणाय निहन्यात् तादृक् तद् यद् धारयन् धारयन्न् इति शंसति संतत्यै

dhārayan dhārayann iti śaṃsati prasraṃsād vā antasya bibhāya tad yathā punarāgrantham punarnigrantham antam badhnīyān mayūkhaṃ vāntato dhāraṇāya nihanyāt tādṛk tad yad dhārayan dhārayann iti śaṃsati saṃtatyai

5.15.10

संततैस् त्र्यहैर् अव्यवच्छिन्नैर् यन्ति य एवं विद्वांसो यन्ति यन्ति

saṃtatais tryahair avyavacchinnair yanti ya evaṃ vidvāṃso yanti yanti

5.16.1

यद् वा एति च प्रेति च तत् सप्तमस्याह्नो रूपम्

yad vā eti ca preti ca tat saptamasyāhno rūpam

5.16.2

यद्ध्येव प्रथमम् अहस् तद् एवैतत् पुनर् यत् सप्तमम्

yaddhyeva prathamam ahas tad evaitat punar yat saptamam

5.16.3

यद् युक्तवद् यद् रथवद् यद् आशुमद् यत् पिबवद् यत् प्रथमे पदे देवता निरुच्यते यद् अयं लोको ऽभ्युदितः

yad yuktavad yad rathavad yad āśumad yat pibavad yat prathame pade devatā nirucyate yad ayaṃ loko 'bhyuditaḥ

5.16.4

यज् जातवद् यद् अनिरुक्तम्

yaj jātavad yad aniruktam

5.16.5

यत् करिष्यद् यत् प्रथमस्याह्नो रूपम् एतानि वै सप्तमस्याह्नो रूपाणि

yat kariṣyad yat prathamasyāhno rūpam etāni vai saptamasyāhno rūpāṇi

5.16.6

समुद्राद् ऊर्मिर् मधुमाṁ उद् आरद् इति सप्तमस्याह्न आज्यम् भवत्य् अनिरुक्तम् सप्तमे ऽहनि सप्तमस्याह्नो रूपम्

samudrād ūrmir madhumāṁ ud ārad iti saptamasyāhna ājyam bhavaty aniruktam saptame 'hani saptamasyāhno rūpam

5.16.7

वाग् वै समुद्रो न वै वाक् क्षीयते न समुद्रः क्षीयते तद् यद् एतत् सप्तमस्याह्न आज्यम् भवति यज्ञाद् एव तद् यज्ञं तन्वते वाचम् एव तत् पुनर् उपयन्ति संतत्यै

vāg vai samudro na vai vāk kṣīyate na samudraḥ kṣīyate tad yad etat saptamasyāhna ājyam bhavati yajñād eva tad yajñaṃ tanvate vācam eva tat punar upayanti saṃtatyai

5.16.8

संततैस् त्र्यहैर् अव्यवच्छिन्नैर् यन्ति य एवं विद्वांसो यन्ति

saṃtatais tryahair avyavacchinnair yanti ya evaṃ vidvāṃso yanti

5.16.9

आप्यन्ते वै स्तोमा आप्यन्ते छन्दांसि षष्ठे ऽहनि तद् यथैवाद आज्येनावदानानि पुनः प्रत्यभिघारयन्त्य् अयातयामताया एवम् एवैतत् स्तोमांश् च छन्दांसि च पुनः प्रत्युपयन्त्य् अयातयामतायै यद् एतत् सप्तमस्याह्न आज्यम् भवति

āpyante vai stomā āpyante chandāṃsi ṣaṣṭhe 'hani tad yathaivāda ājyenāvadānāni punaḥ pratyabhighārayanty ayātayāmatāyā evam evaitat stomāṃś ca chandāṃsi ca punaḥ pratyupayanty ayātayāmatāyai yad etat saptamasyāhna ājyam bhavati

5.16.10

तद् उ त्रैष्टुभं त्रिष्टुप्प्रातःसवन एष त्र्यहः

tad u traiṣṭubhaṃ triṣṭupprātaḥsavana eṣa tryahaḥ

5.16.11

आ वायो भूष शुचिपा उप नः प्र याभिर् यासि दाश्वांसम् अच्छा नो नियुद्भिः शतिनीभिर् अध्वरं प्र सोता जीरो अध्वरेष्व् अस्थाद् ये वायव इन्द्रमादनासो या वां शतं नियुतो याः सहस्रं प्र यद् वाम् मित्रावरुणा स्पूर्धन्न् आ गोमता नासत्या रथेना नो देव शवसा याहि शुष्मिन् प्र वो यज्ञेषु देवयन्तो अर्चन् प्र क्षोदसा धायसा सस्र एषेति प्रौगम् एति च प्रेति च सप्तमे ऽहनि सप्तमस्याह्नो रूपं तद् उ त्रैष्टुभं त्रिष्टुप्प्रातःसवन एष त्र्यहः

ā vāyo bhūṣa śucipā upa naḥ pra yābhir yāsi dāśvāṃsam acchā no niyudbhiḥ śatinībhir adhvaraṃ pra sotā jīro adhvareṣv asthād ye vāyava indramādanāso yā vāṃ śataṃ niyuto yāḥ sahasraṃ pra yad vām mitrāvaruṇā spūrdhann ā gomatā nāsatyā rathenā no deva śavasā yāhi śuṣmin pra vo yajñeṣu devayanto arcan pra kṣodasā dhāyasā sasra eṣeti praugam eti ca preti ca saptame 'hani saptamasyāhno rūpaṃ tad u traiṣṭubhaṃ triṣṭupprātaḥsavana eṣa tryahaḥ

5.16.12

आ त्वा रथं यथोतय इदं वसो सुतम् अन्ध इन्द्र नेदीय एद् इहि प्रैतु ब्रह्मणस्पतिर् अग्निर् नेता त्वं सोम क्रतुभिः पिन्वन्त्य् अपः प्र व इन्द्राय बृहत इति प्रथमेनाह्ना समान आतानः सप्तमे ऽहनि सप्तमस्याह्नो रूपम्

ā tvā rathaṃ yathotaya idaṃ vaso sutam andha indra nedīya ed ihi praitu brahmaṇaspatir agnir netā tvaṃ soma kratubhiḥ pinvanty apaḥ pra va indrāya bṛhata iti prathamenāhnā samāna ātānaḥ saptame 'hani saptamasyāhno rūpam

5.16.13

कया शुभा सवयसः सनीﾱआ इति सूक्तं न जायमानो नशते न जात इति जातवत् सप्तमे ऽहनि सप्तमस्याह्नो रूपम्

kayā śubhā savayasaḥ sanīﾱā iti sūktaṃ na jāyamāno naśate na jāta iti jātavat saptame 'hani saptamasyāhno rūpam

Aitareyabrāhmaṇa