5.8.14

अग्निर् होता गृहपतिः स राजेति जातवेदस्यम् अध्यासवत् पशुरूपम् पञ्चमे ऽहनि पञ्चमस्याह्नो रूपम्

agnir hotā gṛhapatiḥ sa rājeti jātavedasyam adhyāsavat paśurūpam pañcame 'hani pañcamasyāhno rūpam

5.9.1

देवक्षेत्रं वा एतद् यत् षष्ठम् अहर् देवक्षेत्रं वा एत आगच्छन्ति ये षष्ठम् अहर् आगच्छन्ति

devakṣetraṃ vā etad yat ṣaṣṭham ahar devakṣetraṃ vā eta āgacchanti ye ṣaṣṭham ahar āgacchanti

5.9.2

न वै देवा अन्योन्यस्य गृहे वसन्ति नर्तुर् ऋतोर् गृहे वसतीत्य् आहुस् तद् यथायथम् ऋत्विज ऋतुयाजान् यजन्त्य् असंप्रदायं तद् यथर्त्व् ऋतून् कल्पयन्ति यथायथं जनताः

na vai devā anyonyasya gṛhe vasanti nartur ṛtor gṛhe vasatīty āhus tad yathāyatham ṛtvija ṛtuyājān yajanty asaṃpradāyaṃ tad yathartv ṛtūn kalpayanti yathāyathaṃ janatāḥ

5.9.3

तद् आहुर् नर्तुप्रैषैः प्रेषितव्यं नर्तुप्रैषैर् वषट्कृत्यं वाग् वा ऋतुप्रैषा आप्यते वै वाक् षष्ठे ऽहनीति

tad āhur nartupraiṣaiḥ preṣitavyaṃ nartupraiṣair vaṣaṭkṛtyaṃ vāg vā ṛtupraiṣā āpyate vai vāk ṣaṣṭhe 'hanīti

5.9.4

यद् ऋतुप्रैषैः प्रेष्येयुर् यद् ऋतुप्रैषैर् वषट्कुर्युर् वाचम् एव तद् आप्तां श्रान्ताम् ऋक्णवहीं वहराविणीम् ऋच्छेयुः

yad ṛtupraiṣaiḥ preṣyeyur yad ṛtupraiṣair vaṣaṭkuryur vācam eva tad āptāṃ śrāntām ṛkṇavahīṃ vaharāviṇīm ṛccheyuḥ

5.9.5

यद् व् एभिर् न प्रेष्येयुर् यद् व् एभिर् न वषट्कुर्युर् अच्युताद् यज्ञस्य च्यवेरन् यज्ञात् प्राणात् प्रजापतेः पशुभ्यो जिह्मा ईयुः

yad v ebhir na preṣyeyur yad v ebhir na vaṣaṭkuryur acyutād yajñasya cyaveran yajñāt prāṇāt prajāpateḥ paśubhyo jihmā īyuḥ

5.9.6

तस्माद् ऋग्मेभ्य एवाधि प्रेषितव्यम् ऋग्मेभ्यो ऽधि वषट्कृत्यं तन् न वाचम् आप्तां श्रान्ताम् ऋक्णवहीं वहराविणीम् ऋच्छन्ति नाच्युताद् यज्ञस्य च्यवन्ते न यज्ञात् प्राणात् प्रजापतेः पशुभ्यो जिह्मा यन्ति

tasmād ṛgmebhya evādhi preṣitavyam ṛgmebhyo 'dhi vaṣaṭkṛtyaṃ tan na vācam āptāṃ śrāntām ṛkṇavahīṃ vaharāviṇīm ṛcchanti nācyutād yajñasya cyavante na yajñāt prāṇāt prajāpateḥ paśubhyo jihmā yanti

5.10.1

पारुच्छेपीर् उपदधति पूर्वयोः सवनयोः पुरस्तात् प्रस्थितयाज्यानां रोहितं वै नामैतच् छन्दो यत् पारुच्छेपम् एतेन वा इन्द्रः सप्त स्वर्गांल्लोकान् अरोहत्

pārucchepīr upadadhati pūrvayoḥ savanayoḥ purastāt prasthitayājyānāṃ rohitaṃ vai nāmaitac chando yat pārucchepam etena vā indraḥ sapta svargāṃllokān arohat

5.10.2

रोहति सप्त स्वर्गांल्लोकान् य एवं वेद

rohati sapta svargāṃllokān ya evaṃ veda

5.10.3

तद् आहुर् यत् पञ्चपदा एव पञ्चमस्याह्नो रूपं षट्पदाः षष्ठस्याथ कस्मात् सप्तपदाः षष्ठे ऽहञ्छस्यन्त इति

tad āhur yat pañcapadā eva pañcamasyāhno rūpaṃ ṣaṭpadāḥ ṣaṣṭhasyātha kasmāt saptapadāḥ ṣaṣṭhe 'hañchasyanta iti

5.10.4

षड्भिर् एव पदैः षष्ठम् अहर् आप्नुवन्त्य् अपच्छिद्येवैतद् अहर् यत् सप्तमं तद् एव सप्तमेन पदेनाभ्यारभ्य वसन्ति वाचम् एव तत् पुनर् उपयन्ति संतत्यै

ṣaḍbhir eva padaiḥ ṣaṣṭham ahar āpnuvanty apacchidyevaitad ahar yat saptamaṃ tad eva saptamena padenābhyārabhya vasanti vācam eva tat punar upayanti saṃtatyai

5.10.5

संततैस् त्र्यहैर् अव्यवच्छिन्नैर् यन्ति य एवं विद्वांसो यन्ति

saṃtatais tryahair avyavacchinnair yanti ya evaṃ vidvāṃso yanti

5.11.1

देवासुरा वा एषु लोकेषु समयतन्त ते वै देवाः षष्ठेनैवाह्नैभ्यो लोकेभ्यो ऽसुरान् प्राणुदन्त तेषां यान्य् अन्तर्हस्तीनानि वसून्य् आसंस् तान्य् आदाय समुद्रम् प्रौप्यन्त त एतेनैव छन्दसानुहायान्तर्हस्तीनानि वसून्य् आददत तद् यद् एतत् पदम् पुनःपदं स एवाङ्कुश आसञ्जनाय

devāsurā vā eṣu lokeṣu samayatanta te vai devāḥ ṣaṣṭhenaivāhnaibhyo lokebhyo 'surān prāṇudanta teṣāṃ yāny antarhastīnāni vasūny āsaṃs tāny ādāya samudram praupyanta ta etenaiva chandasānuhāyāntarhastīnāni vasūny ādadata tad yad etat padam punaḥpadaṃ sa evāṅkuśa āsañjanāya

5.11.2

अद्विषतो वसु दत्ते निर् एनम् एभ्यः सर्वेभ्यो लोकेभ्यो नुदते य एवं वेद

adviṣato vasu datte nir enam ebhyaḥ sarvebhyo lokebhyo nudate ya evaṃ veda

5.12.1

द्यौर् वै देवता षष्ठम् अहर् वहति त्रयस्त्रिंशः स्तोमो रैवतं सामातिछन्दाश् छन्दो यथादेवतम् एनेन यथास्तोमं यथासाम यथाछन्दसं राध्नोति य एवं वेद

dyaur vai devatā ṣaṣṭham ahar vahati trayastriṃśaḥ stomo raivataṃ sāmātichandāś chando yathādevatam enena yathāstomaṃ yathāsāma yathāchandasaṃ rādhnoti ya evaṃ veda

5.12.2

यद् वै समानोदर्कं तत् षष्ठस्याह्नो रूपं यद्ध्येव तृतीयम् अहस् तद् एतत् पुनर् यत् षष्ठं यद् अश्ववद् यद् अन्तवद् यत् पुनरावृत्तं यत् पुनर्निनृत्तं यद् रतवद् यत् पर्यस्तवद् यत् त्रिवद् यद् अन्तरूपं यद् उत्तमे पदे देवता निरुच्यते यद् असौ लोको ऽभ्युदितः

yad vai samānodarkaṃ tat ṣaṣṭhasyāhno rūpaṃ yaddhyeva tṛtīyam ahas tad etat punar yat ṣaṣṭhaṃ yad aśvavad yad antavad yat punarāvṛttaṃ yat punarninṛttaṃ yad ratavad yat paryastavad yat trivad yad antarūpaṃ yad uttame pade devatā nirucyate yad asau loko 'bhyuditaḥ

5.12.3

यत् पारुच्छेपं यत् सप्तपदं यन् नाराशंसं यन् नाभानेदिष्ठं यद् रैवतं यद् अतिछन्दा यत् कृतं यत् तृतीयस्याह्नो रूपं एतानि वै षष्ठस्याह्नो रूपाणि

yat pārucchepaṃ yat saptapadaṃ yan nārāśaṃsaṃ yan nābhānediṣṭhaṃ yad raivataṃ yad atichandā yat kṛtaṃ yat tṛtīyasyāhno rūpaṃ etāni vai ṣaṣṭhasyāhno rūpāṇi

5.12.4

अयं जायत मनुषो धरीमणीति षष्ठस्याह्न आज्यम् भवति पारुच्छेपम् अतिछन्दाः सप्तपदं षष्ठे ऽहनि षष्ठस्याह्नो रूपम्

ayaṃ jāyata manuṣo dharīmaṇīti ṣaṣṭhasyāhna ājyam bhavati pārucchepam atichandāḥ saptapadaṃ ṣaṣṭhe 'hani ṣaṣṭhasyāhno rūpam

5.12.5

स्तीर्णम् बर्हिर् उप नो याहि वीतय आ वां रथो नियुत्वान् वक्षद् अवसे सुषुमा यातम् अद्रिभिर् युवां स्तोमेभिर् देवयन्तो अश्विना वर् मह इन्द्र वृषन्न् इन्द्रास्तु श्रौषﾱ ओ षू णो अग्ने शृणुहि त्वम् ईﾱइतो ये देवासो दिव्य् एकादश स्थेयम् अददाद् रभसम् ऋणच्युतम् इति प्रौगम् पारुच्छेपम् अतिछन्दाः सप्तपदं षष्ठे ऽहनि षष्ठस्याह्नो रूपम्

stīrṇam barhir upa no yāhi vītaya ā vāṃ ratho niyutvān vakṣad avase suṣumā yātam adribhir yuvāṃ stomebhir devayanto aśvinā var maha indra vṛṣann indrāstu śrauṣaﾱ o ṣū ṇo agne śṛṇuhi tvam īﾱito ye devāso divy ekādaśa stheyam adadād rabhasam ṛṇacyutam iti praugam pārucchepam atichandāḥ saptapadaṃ ṣaṣṭhe 'hani ṣaṣṭhasyāhno rūpam

5.12.6

स पूर्व्यो महानाम् इति मरुत्वतीयस्य प्रतिपद् अन्तो वै महद् अन्तः षष्ठम् अहः षष्ठे ऽहनि षष्ठस्याह्नो रूपम्

sa pūrvyo mahānām iti marutvatīyasya pratipad anto vai mahad antaḥ ṣaṣṭham ahaḥ ṣaṣṭhe 'hani ṣaṣṭhasyāhno rūpam

Aitareyabrāhmaṇa