5.5.14

ता उ विछन्दसः सन्ति द्विपदाः सन्ति चतुष्पदास् तेन चतुर्थस्याह्नो रूपम्

tā u vichandasaḥ santi dvipadāḥ santi catuṣpadās tena caturthasyāhno rūpam

5.5.15

जातवेदसे सुनवाम सोमम् इति जातवेदस्याच्युता

jātavedase sunavāma somam iti jātavedasyācyutā

5.5.16

अग्निं नरो दीधितिभिर् अरण्योर् इति जातवेदस्यं हस्तच्युती जनयन्तेति जातवच् चतुर्थे ऽहनि चतुर्थस्याह्नो रूपम्

agniṃ naro dīdhitibhir araṇyor iti jātavedasyaṃ hastacyutī janayanteti jātavac caturthe 'hani caturthasyāhno rūpam

5.5.17

ता उ विछन्दसः सन्ति विराजः सन्ति त्रिष्टुभस् तेन चतुर्थस्याह्नो रूपम् अह्नो रूपम्

tā u vichandasaḥ santi virājaḥ santi triṣṭubhas tena caturthasyāhno rūpam ahno rūpam

5.6.1

गौर् वै देवता पञ्चमम् अहर् वहति त्रिणवः स्तोमः शाक्वरं साम पङ्क्तिश् छन्दो यथादेवतम् एनेन यथास्तोमं यथासाम यथाछन्दसं राध्नोति य एवं वेद

gaur vai devatā pañcamam ahar vahati triṇavaḥ stomaḥ śākvaraṃ sāma paṅktiś chando yathādevatam enena yathāstomaṃ yathāsāma yathāchandasaṃ rādhnoti ya evaṃ veda

5.6.2

यद् वै नेति न प्रेति यत् स्थितं तत् पञ्चमस्याह्नो रूपम्

yad vai neti na preti yat sthitaṃ tat pañcamasyāhno rūpam

5.6.3

यद्ध्येव द्वितीयम् अहस् तद् एतत् पुनर् यत् पञ्चमम्

yaddhyeva dvitīyam ahas tad etat punar yat pañcamam

5.6.4

यद् ऊर्ध्ववद् यत् प्रतिवद् यद् अन्तर्वद् यद् वृषण्वद् यद् वृधन्वद् यन् मध्यमे पदे देवता निरुच्यते यद् अन्तरिक्षम् अभ्युदितम्

yad ūrdhvavad yat prativad yad antarvad yad vṛṣaṇvad yad vṛdhanvad yan madhyame pade devatā nirucyate yad antarikṣam abhyuditam

5.6.5

यद् दुग्धवद् यद् ऊधवद् यद् धेनुमद् यत् पृश्निमद् यन् मद्वद् यत् पशुरूपं यद् अध्यासवद् विक्षुद्रा इव हि पशवो यज् जागतं जागता हि पशवो यद् बार्हतम् बार्हता हि पशवो यत् पाङ्क्तम् पाङ्क्ता हि पशवो यद् वामं वामम् हि पशवो यद्धविष्मद्धविर् हि पशवो यद् वपुष्मद् वपुर् हि पशवो यच्छाक्वरं यत् पाङ्क्तं यत् कुर्वद् यद् द्वितीयस्याह्नो रूपम् एतानि वै पञ्चमस्याह्नो रूपाणि

yad dugdhavad yad ūdhavad yad dhenumad yat pṛśnimad yan madvad yat paśurūpaṃ yad adhyāsavad vikṣudrā iva hi paśavo yaj jāgataṃ jāgatā hi paśavo yad bārhatam bārhatā hi paśavo yat pāṅktam pāṅktā hi paśavo yad vāmaṃ vāmam hi paśavo yaddhaviṣmaddhavir hi paśavo yad vapuṣmad vapur hi paśavo yacchākvaraṃ yat pāṅktaṃ yat kurvad yad dvitīyasyāhno rūpam etāni vai pañcamasyāhno rūpāṇi

5.6.6

इमम् ऊ षु वो अतिथिम् उषर्बुधम् इति पञ्चमस्याह्न आज्यम् भवति जागतम् अध्यासवत् पशुरूपम् पञ्चमे ऽहनि पञ्चमस्याह्नो रूपम्

imam ū ṣu vo atithim uṣarbudham iti pañcamasyāhna ājyam bhavati jāgatam adhyāsavat paśurūpam pañcame 'hani pañcamasyāhno rūpam

5.6.7

आ नो यज्ञं दिविस्पृशम् आ नो वायो महे तने रथेन पृथुपाजसा बहवः सूरचक्षस इमा उ वां दिविष्टयः पिबा सुतस्य रसिनो देवं देवं वो ऽवसे देवं देवम् बृहद् उ गायिषे वच इति बार्हतम् प्रौगम् पञ्चमे ऽहनि पञ्चमस्याह्नो

ā no yajñaṃ divispṛśam ā no vāyo mahe tane rathena pṛthupājasā bahavaḥ sūracakṣasa imā u vāṃ diviṣṭayaḥ pibā sutasya rasino devaṃ devaṃ vo 'vase devaṃ devam bṛhad u gāyiṣe vaca iti bārhatam praugam pañcame 'hani pañcamasyāhno

5.6.8

यत् पाञ्चजन्यया विशेति मरुत्वतीयस्य प्रतिपत् पाञ्चजन्ययेति पञ्चमे ऽहनि पञ्चमस्याह्नो रूपम्

yat pāñcajanyayā viśeti marutvatīyasya pratipat pāñcajanyayeti pañcame 'hani pañcamasyāhno rūpam

5.6.9

इन्द्र इत् सोमपा एक इन्द्र नेदीय एद् इह्य् उत् तिष्ठ ब्रह्मणस्पते ऽग्निर् नेता त्वं सोम क्रतुभिः पिन्वन्त्य् अपो बृहद् इन्द्राय गायतेति द्वितीयेनाह्ना समान आतानः पञ्चमे ऽहनि पञ्चमस्याह्नो रूपम्

indra it somapā eka indra nedīya ed ihy ut tiṣṭha brahmaṇaspate 'gnir netā tvaṃ soma kratubhiḥ pinvanty apo bṛhad indrāya gāyateti dvitīyenāhnā samāna ātānaḥ pañcame 'hani pañcamasyāhno rūpam

5.6.10

अवितासि सुन्वतो वृक्तबर्हिष इति सूक्तम् मद्वत् पाङ्क्तम् पञ्चपदम् पञ्चमे ऽहनि पञ्चमस्याह्नो रूपम्

avitāsi sunvato vṛktabarhiṣa iti sūktam madvat pāṅktam pañcapadam pañcame 'hani pañcamasyāhno rūpam

5.6.11

इत्था हि सोम इन् मद इति सूक्तम् मद्वत् पाङ्क्तम् पञ्चपदम् पञ्चमे ऽहनि पञ्चमस्याह्नो रूपम्

itthā hi soma in mada iti sūktam madvat pāṅktam pañcapadam pañcame 'hani pañcamasyāhno rūpam

5.6.12

इन्द्र पिब तुभ्यं सुतो मदायेति सूक्तम् मद्वत् त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते

indra piba tubhyaṃ suto madāyeti sūktam madvat traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate

5.6.13

मरुत्वाṁ इन्द्र मीढ्व इति पर्यासो नेति न प्रेति पञ्चमे ऽहनि पञ्चमस्याह्नो रूपम्

marutvāṁ indra mīḍhva iti paryāso neti na preti pañcame 'hani pañcamasyāhno rūpam

5.6.14

ता उ गायत्र्यो गायत्र्यो वा एतस्य त्र्यहस्य मध्यंदिनं वहन्ति तद् वै तच् छन्दो वहति यस्मिन् निविद्धीयते तस्माद् गायत्रीषु निविदं दधाति

tā u gāyatryo gāyatryo vā etasya tryahasya madhyaṃdinaṃ vahanti tad vai tac chando vahati yasmin nividdhīyate tasmād gāyatrīṣu nividaṃ dadhāti

5.7.1

महानाम्नीष्व् अत्र स्तुवते शाक्वरेण साम्ना राथंतरे ऽहनि पञ्चमे ऽहनि पञ्चमस्याह्नो रूपम्

mahānāmnīṣv atra stuvate śākvareṇa sāmnā rāthaṃtare 'hani pañcame 'hani pañcamasyāhno rūpam

5.7.2

इन्द्रो वा एताभिर् महान् आत्मानं निरमिमीत तस्मान् महानाम्न्यो ऽथो इमे वै लोका महानाम्न्य इमे महान्तः

indro vā etābhir mahān ātmānaṃ niramimīta tasmān mahānāmnyo 'tho ime vai lokā mahānāmnya ime mahāntaḥ

Aitareyabrāhmaṇa