5.2.8

अन्तो वै महद् अन्तस् तृतीयम् अहस् तृतीये ऽहनि तृतीयस्याह्नो रूपम्

anto vai mahad antas tṛtīyam ahas tṛtīye 'hani tṛtīyasyāhno rūpam

5.2.9

घृतेन द्यावापृथिवी अभीवृते इति द्यावापृथिवीयं घृतश्रिया घृतपृचा घृतावृधेति पुनरावृत्तम् पुनर्निनृत्तं तृतीये ऽहनि तृतीयस्याह्नो रूपम्

ghṛtena dyāvāpṛthivī abhīvṛte iti dyāvāpṛthivīyaṃ ghṛtaśriyā ghṛtapṛcā ghṛtāvṛdheti punarāvṛttam punarninṛttaṃ tṛtīye 'hani tṛtīyasyāhno rūpam

5.2.10

अनश्वो जातो अनभीशुर् उक्थ्य इत्य् आर्भवम् रथस् त्रिचक्र इति त्रिवत् तृतीये ऽहनि तृतीयस्याह्नो रूपम्

anaśvo jāto anabhīśur ukthya ity ārbhavam rathas tricakra iti trivat tṛtīye 'hani tṛtīyasyāhno rūpam

5.2.11

परावतो ये दिधिषन्त आप्यम् इति वैश्वदेवम् अन्तो वै परावतो ऽन्तस् तृतीयम् अहस् तृतीये ऽहनि तृतीयस्याह्नो रूपम्

parāvato ye didhiṣanta āpyam iti vaiśvadevam anto vai parāvato 'ntas tṛtīyam ahas tṛtīye 'hani tṛtīyasyāhno rūpam

5.2.12

तद् उ गायम् एतेन वै गयः प्लातो विश्वेषां देवानाम् प्रियं धामोपागच्छत् स परमं लोकम् अजयत्

tad u gāyam etena vai gayaḥ plāto viśveṣāṃ devānām priyaṃ dhāmopāgacchat sa paramaṃ lokam ajayat

5.2.13

उप विश्वेषां देवानाम् प्रियं धाम गच्छति जयति परमं लोकं य एवं वेद

upa viśveṣāṃ devānām priyaṃ dhāma gacchati jayati paramaṃ lokaṃ ya evaṃ veda

5.2.14

वैश्वानराय धिषणाम् ऋतावृध इत्य् आग्निमारुतस्य प्रतिपद् अन्तो वै धिषणान्तस् तृतीयम् अहस् तृतीये ऽहनि तृतीयस्याह्नो रूपम्

vaiśvānarāya dhiṣaṇām ṛtāvṛdha ity āgnimārutasya pratipad anto vai dhiṣaṇāntas tṛtīyam ahas tṛtīye 'hani tṛtīyasyāhno rūpam

5.2.15

धारावरा मरुतो धृष्ण्वोजस इति मारुतम् बह्वभिव्याहृत्यम् अन्तो वै बह्व् अन्तस् तृतीयम् अहस् तृतीये ऽहनि तृतीयस्याह्नो रूपम्

dhārāvarā maruto dhṛṣṇvojasa iti mārutam bahvabhivyāhṛtyam anto vai bahv antas tṛtīyam ahas tṛtīye 'hani tṛtīyasyāhno rūpam

5.2.16

जातवेदसे सुनवाम सोमम् इति जातवेदस्याच्युता

jātavedase sunavāma somam iti jātavedasyācyutā

5.2.17

त्वम् अग्ने प्रथमो अङ्गिरा ऋषिर् इति जातवेदस्यम् पुरस्तादुदर्कं तृतीये ऽहनि तृतीयस्याह्नो रूपं त्वं त्वम् इत्य् उत्तरं त्र्यहम् अभिवदति संतत्यै

tvam agne prathamo aṅgirā ṛṣir iti jātavedasyam purastādudarkaṃ tṛtīye 'hani tṛtīyasyāhno rūpaṃ tvaṃ tvam ity uttaraṃ tryaham abhivadati saṃtatyai

5.2.18

संततैस् त्र्यहैर् अव्यवच्छिन्नैर् यन्ति य एवं विद्वांसो यन्ति

saṃtatais tryahair avyavacchinnair yanti ya evaṃ vidvāṃso yanti

5.3.1

आप्यन्ते वै स्तोमा आप्यन्ते छन्दांसि तृतीये ऽहन्य् एतद् एव तत उच्छिष्यते वाग् इत्य् एव तद् एतद् अक्षरं त्र्यक्षरं वाग् इत्य् एकम् अक्षरम् अक्षरम् इति त्र्यक्षरम्

āpyante vai stomā āpyante chandāṃsi tṛtīye 'hany etad eva tata ucchiṣyate vāg ity eva tad etad akṣaraṃ tryakṣaraṃ vāg ity ekam akṣaram akṣaram iti tryakṣaram

5.3.2

स एवैष उत्तरस् त्र्यहो वाग् एकं गौर् एकं द्यौर् एकम्

sa evaiṣa uttaras tryaho vāg ekaṃ gaur ekaṃ dyaur ekam

5.3.3

ततो वै वाग् एव चतुर्थम् अहर् वहति

tato vai vāg eva caturtham ahar vahati

5.3.4

तद् यच् चतुर्थम् अहर् न्यूङ्खयन्त्य् एतद् एव तद् अक्षरम् अभ्यायच्छन्त्य् एतद् वर्धयन्त्य् एतत् प्रबिभावयिषन्ति चतुर्थस्याह्न उद्यत्यै

tad yac caturtham ahar nyūṅkhayanty etad eva tad akṣaram abhyāyacchanty etad vardhayanty etat prabibhāvayiṣanti caturthasyāhna udyatyai

5.3.5

अन्नं वै न्यूङ्खो यदेलवा अभिगेष्णाश् चरन्त्य् अथान्नाद्यम् प्रजायते तद् यच्चतुर्थम् अहर् न्यूङ्खयन्त्य् अन्नम् एव तत् प्रजनयन्त्य् अन्नाद्यस्य प्रजात्यै तस्माच्चतुर्थम् अहर् जातवद् भवति

annaṃ vai nyūṅkho yadelavā abhigeṣṇāś caranty athānnādyam prajāyate tad yaccaturtham ahar nyūṅkhayanty annam eva tat prajanayanty annādyasya prajātyai tasmāccaturtham ahar jātavad bhavati

5.3.6

चतुरक्षरेण न्यूङ्खयेद् इत्य् आहुश् चतुष्पादा वै पशवः पशूनाम् अवरुद्ध्यै

caturakṣareṇa nyūṅkhayed ity āhuś catuṣpādā vai paśavaḥ paśūnām avaruddhyai

5.3.7

त्र्यक्षरेण न्यूङ्खयेद् इत्य् आहुस् त्रयो वा इमे त्रिवृतो लोका एषाम् एव लोकानाम् अभिजित्यै

tryakṣareṇa nyūṅkhayed ity āhus trayo vā ime trivṛto lokā eṣām eva lokānām abhijityai

5.3.8

एकाक्षरेण न्यूङ्खयेद् इति ह स्माह लाङ्गलायनो ब्रह्मा मौद्गल्य एकाक्षरा वै वाग् एष वाव सम्प्रति न्यूङ्खं न्यूङ्खयति य एकाक्षरेण न्यूङ्खयतीति

ekākṣareṇa nyūṅkhayed iti ha smāha lāṅgalāyano brahmā maudgalya ekākṣarā vai vāg eṣa vāva samprati nyūṅkhaṃ nyūṅkhayati ya ekākṣareṇa nyūṅkhayatīti

5.3.9

द्व्यक्षरेणैव न्यूङ्खयेत् प्रतिष्ठाया एव द्विप्रतिष्ठो वै पुरुषश् चतुष्पादाः पशवो यजमानम् एव तद् द्विप्रतिष्ठं चतुष्पात्सु पशुषु प्रतिष्ठापयति तस्माद् द्व्यक्षरेणैव न्यूङ्खयेत्

dvyakṣareṇaiva nyūṅkhayet pratiṣṭhāyā eva dvipratiṣṭho vai puruṣaś catuṣpādāḥ paśavo yajamānam eva tad dvipratiṣṭhaṃ catuṣpātsu paśuṣu pratiṣṭhāpayati tasmād dvyakṣareṇaiva nyūṅkhayet

Aitareyabrāhmaṇa